ઋગ્વેદ · અધ્યાય 4.034

ઋભુર્ વિભ્વા વાજ ઇન્દ્રો નો અચ્છેમં યજ્ઞં રત્નધેયોપ યાત ।
ઇદા હિ વો ધિષણા દેવ્ય્ અહ્નામ્ અધાત્ પીતિં સમ્ મદા અગ્મતા વઃ ॥

વિદાનાસો જન્મનો વાજરત્ના ઉત ઋતુભિર્ ઋભવો માદયધ્વમ્ ।
સં વો મદા અગ્મત સમ્ પુરંધિઃ સુવીરામ્ અસ્મે રયિમ્ એરયધ્વમ્ ॥

અયં વો યજ્ઞ ઋભવો ઽકારિ યમ્ આ મનુષ્વત્ પ્રદિવો દધિધ્વે ।
પ્ર વો ઽચ્છા જુજુષાણાસો અસ્થુર્ અભૂત વિશ્વે અગ્રિયોત વાજાઃ ॥

અભૂદ્ ઉ વો વિધતે રત્નધેયમ્ ઇદા નરો દાશુષે મર્ત્યાય ।
પિબત વાજા ઋભવો દદે વો મહિ તૃતીયં સવનમ્ મદાય ॥

આ વાજા યાતોપ ન ઋભુક્ષા મહો નરો દ્રવિણસો ગૃણાનાઃ ।
આ વઃ પીતયો ઽભિપિત્વે અહ્નામ્ ઇમા અસ્તં નવસ્વ ઇવ ગ્મન્ ॥

આ નપાતઃ શવસો યાતનોપેમં યજ્ઞં નમસા હૂયમાનાઃ ।
સજોષસઃ સૂરયો યસ્ય ચ સ્થ મધ્વઃ પાત રત્નધા ઇન્દ્રવન્તઃ ॥

સજોષા ઇન્દ્ર વરુણેન સોમં સજોષાઃ પાહિ ગિર્વણો મરુદ્ભિઃ ।
અગ્રેપાભિર્ ઋતુપાભિઃ સજોષા ગ્નાસ્પત્નીભી રત્નધાભિઃ સજોષાઃ ॥

સજોષસ આદિત્યૈર્ માદયધ્વં સજોષસ ઋભવઃ પર્વતેભિઃ ।
સજોષસો દૈવ્યેના સવિત્રા સજોષસઃ સિન્ધુભી રત્નધેભિઃ ॥

યે અશ્વિના યે પિતરા ય ઊતી ધેનું તતક્ષુર્ ઋભવો યે અશ્વા ।
યે અંસત્રા ય ઋધગ્ રોદસી યે વિભ્વો નરઃ સ્વપત્યાનિ ચક્રુઃ ॥

યે ગોમન્તં વાજવન્તં સુવીરં રયિં ધત્થ વસુમન્તમ્ પુરુક્ષુમ્ ।
તે અગ્રેપા ઋભવો મન્દસાના અસ્મે ધત્ત યે ચ રાતિં ગૃણન્તિ ॥

નાપાભૂત ન વો ઽતીતૃષામાનિઃશસ્તા ઋભવો યજ્ઞે અસ્મિન્ ।
સમ્ ઇન્દ્રેણ મદથ સમ્ મરુદ્ભિઃ સં રાજભી રત્નધેયાય દેવાઃ ॥