Rig Veda · Chapter 4.034

ṛbhur vibhvā vāja indro no acchemaṁ yajñaṁ ratnadheyopa yāta |
idā hi vo dhiṣaṇā devy ahnām adhāt pītiṁ sam madā agmatā vaḥ ||

vidānāso janmano vājaratnā uta ṛtubhir ṛbhavo mādayadhvam |
saṁ vo madā agmata sam puraṁdhiḥ suvīrām asme rayim erayadhvam ||

ayaṁ vo yajña ṛbhavo 'kāri yam ā manuṣvat pradivo dadhidhve |
pra vo 'cchā jujuṣāṇāso asthur abhūta viśve agriyota vājāḥ ||

abhūd u vo vidhate ratnadheyam idā naro dāśuṣe martyāya |
pibata vājā ṛbhavo dade vo mahi tṛtīyaṁ savanam madāya ||

ā vājā yātopa na ṛbhukṣā maho naro draviṇaso gṛṇānāḥ |
ā vaḥ pītayo 'bhipitve ahnām imā astaṁ navasva iva gman ||

ā napātaḥ śavaso yātanopemaṁ yajñaṁ namasā hūyamānāḥ |
sajoṣasaḥ sūrayo yasya ca stha madhvaḥ pāta ratnadhā indravantaḥ ||

sajoṣā indra varuṇena somaṁ sajoṣāḥ pāhi girvaṇo marudbhiḥ |
agrepābhir ṛtupābhiḥ sajoṣā gnāspatnībhī ratnadhābhiḥ sajoṣāḥ ||

sajoṣasa ādityair mādayadhvaṁ sajoṣasa ṛbhavaḥ parvatebhiḥ |
sajoṣaso daivyenā savitrā sajoṣasaḥ sindhubhī ratnadhebhiḥ ||

ye aśvinā ye pitarā ya ūtī dhenuṁ tatakṣur ṛbhavo ye aśvā |
ye aṁsatrā ya ṛdhag rodasī ye vibhvo naraḥ svapatyāni cakruḥ ||

ye gomantaṁ vājavantaṁ suvīraṁ rayiṁ dhattha vasumantam purukṣum |
te agrepā ṛbhavo mandasānā asme dhatta ye ca rātiṁ gṛṇanti ||

nāpābhūta na vo 'tītṛṣāmāniḥśastā ṛbhavo yajñe asmin |
sam indreṇa madatha sam marudbhiḥ saṁ rājabhī ratnadheyāya devāḥ ||