ઋગ્વેદ · અધ્યાય 4.033

પ્ર ઋભુભ્યો દૂતમ્ ઇવ વાચમ્ ઇષ્ય ઉપસ્તિરે શ્વૈતરીં ધેનુમ્ ઈળે ।
યે વાતજૂતાસ્ તરણિભિર્ એવૈઃ પરિ દ્યાં સદ્યો અપસો બભૂવુઃ ॥

યદારમ્ અક્રન્ન્ ઋભવઃ પિતૃભ્યામ્ પરિવિષ્ટી વેષણા દંસનાભિઃ ।
આદ્ ઇદ્ દેવાનામ્ ઉપ સખ્યમ્ આયન્ ધીરાસઃ પુષ્ટિમ્ અવહન્ મનાયૈ ॥

પુનર્ યે ચક્રુઃ પિતરા યુવાના સના યૂપેવ જરણા શયાના ।
તે વાજો વિભ્વાઁ ઋભુર્ ઇન્દ્રવન્તો મધુપ્સરસો નો ઽવન્તુ યજ્ઞમ્ ॥

યત્ સંવત્સમ્ ઋભવો ગામ્ અરક્ષન્ યત્ સંવત્સમ્ ઋભવો મા અપિંશન્ ।
યત્ સંવત્સમ્ અભરન્ ભાસો અસ્યાસ્ તાભિઃ શમીભિર્ અમૃતત્વમ્ આશુઃ ॥

જ્યેષ્ઠ આહ ચમસા દ્વા કરેતિ કનીયાન્ ત્રીન્ કૃણવામેત્ય્ આહ ।
કનિષ્ઠ આહ ચતુરસ્ કરેતિ ત્વષ્ટ ઋભવસ્ તત્ પનયદ્ વચો વઃ ॥

સત્યમ્ ઊચુર્ નર એવા હિ ચક્રુર્ અનુ સ્વધામ્ ઋભવો જગ્મુર્ એતામ્ ।
વિભ્રાજમાનાઁશ્ ચમસાઁ અહેવાવેનત્ ત્વષ્ટા ચતુરો દદૃશ્વાન્ ॥

દ્વાદશ દ્યૂન્ યદ્ અગોહ્યસ્યાતિથ્યે રણન્ન્ ઋભવઃ સસન્તઃ ।
સુક્ષેત્રાકૃણ્વન્ન્ અનયન્ત સિન્ધૂન્ ધન્વાતિષ્ઠન્ન્ ઓષધીર્ નિમ્નમ્ આપઃ ॥

રથં યે ચક્રુઃ સુવૃતં નરેષ્ઠાં યે ધેનું વિશ્વજુવં વિશ્વરૂપામ્ ।
ત આ તક્ષન્ત્વ્ ઋભવો રયિં નઃ સ્વવસઃ સ્વપસઃ સુહસ્તાઃ ॥

અપો હ્ય્ એષામ્ અજુષન્ત દેવા અભિ ક્રત્વા મનસા દીધ્યાનાઃ ।
વાજો દેવાનામ્ અભવત્ સુકર્મેન્દ્રસ્ય ઋભુક્ષા વરુણસ્ય વિભ્વા ॥

યે હરી મેધયોક્થા મદન્ત ઇન્દ્રાય ચક્રુઃ સુયુજા યે અશ્વા ।
તે રાયસ્ પોષં દ્રવિણાન્ય્ અસ્મે ધત્ત ઋભવઃ ક્ષેમયન્તો ન મિત્રમ્ ॥

ઇદાહ્નઃ પીતિમ્ ઉત વો મદં ધુર્ ન ઋતે શ્રાન્તસ્ય સખ્યાય દેવાઃ ।
તે નૂનમ્ અસ્મે ઋભવો વસૂનિ તૃતીયે અસ્મિન્ સવને દધાત ॥