ઋગ્વેદ · અધ્યાય 3.058

ધેનુઃ પ્રત્નસ્ય કામ્યં દુહાનાન્તઃ પુત્રશ્ ચરતિ દક્ષિણાયાઃ ।
આ દ્યોતનિં વહતિ શુભ્રયામોષસઃ સ્તોમો અશ્વિનાવ્ અજીગઃ ॥

સુયુગ્ વહન્તિ પ્રતિ વામ્ ઋતેનોર્ધ્વા ભવન્તિ પિતરેવ મેધાઃ ।
જરેથામ્ અસ્મદ્ વિ પણેર્ મનીષાં યુવોર્ અવશ્ ચકૃમા યાતમ્ અર્વાક્ ॥

સુયુગ્ભિર્ અશ્વૈઃ સુવૃતા રથેન દસ્રાવ્ ઇમં શૃણુતં શ્લોકમ્ અદ્રેઃ ।
કિમ્ અઙ્ગ વામ્ પ્રત્ય્ અવર્તિં ગમિષ્ઠાહુર્ વિપ્રાસો અશ્વિના પુરાજાઃ ॥

આ મન્યેથામ્ આ ગતં કચ્ ચિદ્ એવૈર્ વિશ્વે જનાસો અશ્વિના હવન્તે ।
ઇમા હિ વાં ગોઋજીકા મધૂનિ પ્ર મિત્રાસો ન દદુર્ ઉસ્રો અગ્રે ॥

તિરઃ પુરૂ ચિદ્ અશ્વિના રજાંસ્ય્ આઙ્ગૂષો વામ્ મઘવાના જનેષુ ।
એહ યાતમ્ પથિભિર્ દેવયાનૈર્ દસ્રાવ્ ઇમે વાં નિધયો મધૂનામ્ ॥

પુરાણમ્ ઓકઃ સખ્યં શિવં વાં યુવોર્ નરા દ્રવિણં જહ્નાવ્યામ્ ।
પુનઃ કૃણ્વાનાઃ સખ્યા શિવાનિ મધ્વા મદેમ સહ નૂ સમાનાઃ ॥

અશ્વિના વાયુના યુવં સુદક્ષા નિયુદ્ભિષ્ ચ સજોષસા યુવાના ।
નાસત્યા તિરોઅહ્ન્યં જુષાણા સોમમ્ પિબતમ્ અસ્રિધા સુદાનૂ ॥

અશ્વિના પરિ વામ્ ઇષઃ પુરૂચીર્ ઈયુર્ ગીર્ભિર્ યતમાના અમૃધ્રાઃ ।
રથો હ વામ્ ઋતજા અદ્રિજૂતઃ પરિ દ્યાવાપૃથિવી યાતિ સદ્યઃ ॥

અશ્વિના મધુષુત્તમો યુવાકુઃ સોમસ્ તમ્ પાતમ્ આ ગતં દુરોણે ।
રથો હ વામ્ ભૂરિ વર્પઃ કરિક્રત્ સુતાવતો નિષ્કૃતમ્ આગમિષ્ઠઃ ॥