ઋગ્વેદ · અધ્યાય 3.059

મિત્રો જનાન્ યાતયતિ બ્રુવાણો મિત્રો દાધાર પૃથિવીમ્ ઉત દ્યામ્ ।
મિત્રઃ કૃષ્ટીર્ અનિમિષાભિ ચષ્ટે મિત્રાય હવ્યં ઘૃતવજ્ જુહોત ॥

પ્ર સ મિત્ર મર્તો અસ્તુ પ્રયસ્વાન્ યસ્ ત આદિત્ય શિક્ષતિ વ્રતેન ।
ન હન્યતે ન જીયતે ત્વોતો નૈનમ્ અંહો અશ્નોત્ય્ અન્તિતો ન દૂરાત્ ॥

અનમીવાસ ઇળયા મદન્તો મિતજ્ઞવો વરિમન્ન્ આ પૃથિવ્યાઃ ।
આદિત્યસ્ય વ્રતમ્ ઉપક્ષિયન્તો વયમ્ મિત્રસ્ય સુમતૌ સ્યામ ॥

અયમ્ મિત્રો નમસ્યઃ સુશેવો રાજા સુક્ષત્રો અજનિષ્ટ વેધાઃ ।
તસ્ય વયં સુમતૌ યજ્ઞિયસ્યાપિ ભદ્રે સૌમનસે સ્યામ ॥

મહાઁ આદિત્યો નમસોપસદ્યો યાતયજ્જનો ગૃણતે સુશેવઃ ।
તસ્મા એતત્ પન્યતમાય જુષ્ટમ્ અગ્નૌ મિત્રાય હવિર્ આ જુહોત ॥

મિત્રસ્ય ચર્ષણીધૃતો ઽવો દેવસ્ય સાનસિ ।
દ્યુમ્નં ચિત્રશ્રવસ્તમમ્ ॥

અભિ યો મહિના દિવમ્ મિત્રો બભૂવ સપ્રથાઃ ।
અભિ શ્રવોભિઃ પૃથિવીમ્ ॥

મિત્રાય પઞ્ચ યેમિરે જના અભિષ્ટિશવસે ।
સ દેવાન્ વિશ્વાન્ બિભર્તિ ॥

મિત્રો દેવેષ્વ્ આયુષુ જનાય વૃક્તબર્હિષે ।
ઇષ ઇષ્ટવ્રતા અકઃ ॥