Rig Veda · Chapter 3.058

dhenuḥ pratnasya kāmyaṁ duhānāntaḥ putraś carati dakṣiṇāyāḥ |
ā dyotaniṁ vahati śubhrayāmoṣasaḥ stomo aśvināv ajīgaḥ ||

suyug vahanti prati vām ṛtenordhvā bhavanti pitareva medhāḥ |
jarethām asmad vi paṇer manīṣāṁ yuvor avaś cakṛmā yātam arvāk ||

suyugbhir aśvaiḥ suvṛtā rathena dasrāv imaṁ śṛṇutaṁ ślokam adreḥ |
kim aṅga vām praty avartiṁ gamiṣṭhāhur viprāso aśvinā purājāḥ ||

ā manyethām ā gataṁ kac cid evair viśve janāso aśvinā havante |
imā hi vāṁ goṛjīkā madhūni pra mitrāso na dadur usro agre ||

tiraḥ purū cid aśvinā rajāṁsy āṅgūṣo vām maghavānā janeṣu |
eha yātam pathibhir devayānair dasrāv ime vāṁ nidhayo madhūnām ||

purāṇam okaḥ sakhyaṁ śivaṁ vāṁ yuvor narā draviṇaṁ jahnāvyām |
punaḥ kṛṇvānāḥ sakhyā śivāni madhvā madema saha nū samānāḥ ||

aśvinā vāyunā yuvaṁ sudakṣā niyudbhiṣ ca sajoṣasā yuvānā |
nāsatyā tiroahnyaṁ juṣāṇā somam pibatam asridhā sudānū ||

aśvinā pari vām iṣaḥ purūcīr īyur gīrbhir yatamānā amṛdhrāḥ |
ratho ha vām ṛtajā adrijūtaḥ pari dyāvāpṛthivī yāti sadyaḥ ||

aśvinā madhuṣuttamo yuvākuḥ somas tam pātam ā gataṁ duroṇe |
ratho ha vām bhūri varpaḥ karikrat sutāvato niṣkṛtam āgamiṣṭhaḥ ||