ઋગ્વેદ · અધ્યાય 10.135

યસ્મિન્ વૃક્ષે સુપલાશે દેવૈઃ સમ્પિબતે યમઃ ।
અત્રા નો વિશ્પતિઃ પિતા પુરાણાઁ અનુ વેનતિ ॥

પુરાણાઁ અનુવેનન્તં ચરન્તમ્ પાપયામુયા ।
અસૂયન્ન્ અભ્ય્ અચાકશં તસ્મા અસ્પૃહયમ્ પુનઃ ॥

યં કુમાર નવં રથમ્ અચક્રમ્ મનસાકૃણોઃ ।
એકેષં વિશ્વતઃ પ્રાઞ્ચમ્ અપશ્યન્ન્ અધિ તિષ્ઠસિ ॥

યં કુમાર પ્રાવર્તયો રથં વિપ્રેભ્યસ્ પરિ ।
તં સામાનુ પ્રાવર્તત સમ્ ઇતો નાવ્ય્ આહિતમ્ ॥

કઃ કુમારમ્ અજનયદ્ રથં કો નિર્ અવર્તયત્ ।
કઃ સ્વિત્ તદ્ અદ્ય નો બ્રૂયાદ્ અનુદેયી યથાભવત્ ॥

યથાભવદ્ અનુદેયી તતો અગ્રમ્ અજાયત ।
પુરસ્તાદ્ બુધ્ન આતતઃ પશ્ચાન્ નિરયણં કૃતમ્ ॥

ઇદં યમસ્ય સાદનં દેવમાનં યદ્ ઉચ્યતે ।
ઇયમ્ અસ્ય ધમ્યતે નાળીર્ અયં ગીર્ભિઃ પરિષ્કૃતઃ ॥