ઋગ્વેદ · અધ્યાય 10.114

ઘર્મા સમન્તા ત્રિવૃતં વ્ય્ આપતુસ્ તયોર્ જુષ્ટિમ્ માતરિશ્વા જગામ ।
દિવસ્ પયો દિધિષાણા અવેષન્ વિદુર્ દેવાઃ સહસામાનમ્ અર્કમ્ ॥

તિસ્રો દેષ્ટ્રાય નિરૃતીર્ ઉપાસતે દીર્ઘશ્રુતો વિ હિ જાનન્તિ વહ્નયઃ ।
તાસાં નિ ચિક્યુઃ કવયો નિદાનમ્ પરેષુ યા ગુહ્યેષુ વ્રતેષુ ॥

ચતુષ્કપર્દા યુવતિઃ સુપેશા ઘૃતપ્રતીકા વયુનાનિ વસ્તે ।
તસ્યાં સુપર્ણા વૃષણા નિ ષેદતુર્ યત્ર દેવા દધિરે ભાગધેયમ્ ॥

એકઃ સુપર્ણઃ સ સમુદ્રમ્ આ વિવેશ સ ઇદં વિશ્વમ્ ભુવનં વિ ચષ્ટે ।
તમ્ પાકેન મનસાપશ્યમ્ અન્તિતસ્ તમ્ માતા રેળ્હિ સ ઉ રેળ્હિ માતરમ્ ॥

સુપર્ણં વિપ્રાઃ કવયો વચોભિર્ એકં સન્તમ્ બહુધા કલ્પયન્તિ ।
છન્દાંસિ ચ દધતો અધ્વરેષુ ગ્રહાન્ સોમસ્ય મિમતે દ્વાદશ ॥

ષટ્ત્રિંશાઁશ્ ચ ચતુરઃ કલ્પયન્તશ્ છન્દાંસિ ચ દધત આદ્વાદશમ્ ।
યજ્ઞં વિમાય કવયો મનીષ ઋક્સામાભ્યામ્ પ્ર રથં વર્તયન્તિ ॥

ચતુર્દશાન્યે મહિમાનો અસ્ય તં ધીરા વાચા પ્ર ણયન્તિ સપ્ત ।
આપ્નાનં તીર્થં ક ઇહ પ્ર વોચદ્ યેન પથા પ્રપિબન્તે સુતસ્ય ॥

સહસ્રધા પઞ્ચદશાન્ય્ ઉક્થા યાવદ્ દ્યાવાપૃથિવી તાવદ્ ઇત્ તત્ ।
સહસ્રધા મહિમાનઃ સહસ્રં યાવદ્ બ્રહ્મ વિષ્ઠિતં તાવતી વાક્ ॥

કશ્ છન્દસાં યોગમ્ આ વેદ ધીરઃ કો ધિષ્ણ્યામ્ પ્રતિ વાચમ્ પપાદ ।
કમ્ ઋત્વિજામ્ અષ્ટમં શૂરમ્ આહુર્ હરી ઇન્દ્રસ્ય નિ ચિકાય કઃ સ્વિત્ ॥

ભૂમ્યા અન્તમ્ પર્ય્ એકે ચરન્તિ રથસ્ય ધૂર્ષુ યુક્તાસો અસ્થુઃ ।
શ્રમસ્ય દાયં વિ ભજન્ત્ય્ એભ્યો યદા યમો ભવતિ હર્મ્યે હિતઃ ॥