Rig Veda · Chapter 10.114

gharmā samantā trivṛtaṁ vy āpatus tayor juṣṭim mātariśvā jagāma |
divas payo didhiṣāṇā aveṣan vidur devāḥ sahasāmānam arkam ||

tisro deṣṭrāya nirṛtīr upāsate dīrghaśruto vi hi jānanti vahnayaḥ |
tāsāṁ ni cikyuḥ kavayo nidānam pareṣu yā guhyeṣu vrateṣu ||

catuṣkapardā yuvatiḥ supeśā ghṛtapratīkā vayunāni vaste |
tasyāṁ suparṇā vṛṣaṇā ni ṣedatur yatra devā dadhire bhāgadheyam ||

ekaḥ suparṇaḥ sa samudram ā viveśa sa idaṁ viśvam bhuvanaṁ vi caṣṭe |
tam pākena manasāpaśyam antitas tam mātā reḻhi sa u reḻhi mātaram ||

suparṇaṁ viprāḥ kavayo vacobhir ekaṁ santam bahudhā kalpayanti |
chandāṁsi ca dadhato adhvareṣu grahān somasya mimate dvādaśa ||

ṣaṭtriṁśām̐ś ca caturaḥ kalpayantaś chandāṁsi ca dadhata ādvādaśam |
yajñaṁ vimāya kavayo manīṣa ṛksāmābhyām pra rathaṁ vartayanti ||

caturdaśānye mahimāno asya taṁ dhīrā vācā pra ṇayanti sapta |
āpnānaṁ tīrthaṁ ka iha pra vocad yena pathā prapibante sutasya ||

sahasradhā pañcadaśāny ukthā yāvad dyāvāpṛthivī tāvad it tat |
sahasradhā mahimānaḥ sahasraṁ yāvad brahma viṣṭhitaṁ tāvatī vāk ||

kaś chandasāṁ yogam ā veda dhīraḥ ko dhiṣṇyām prati vācam papāda |
kam ṛtvijām aṣṭamaṁ śūram āhur harī indrasya ni cikāya kaḥ svit ||

bhūmyā antam pary eke caranti rathasya dhūrṣu yuktāso asthuḥ |
śramasya dāyaṁ vi bhajanty ebhyo yadā yamo bhavati harmye hitaḥ ||