ઋગ્વેદ · અધ્યાય 10.064

કથા દેવાનાં કતમસ્ય યામનિ સુમન્તુ નામ શૃણ્વતામ્ મનામહે ।
કો મૃળાતિ કતમો નો મયસ્ કરત્ કતમ ઊતી અભ્ય્ આ વવર્તતિ ॥

ક્રતૂયન્તિ ક્રતવો હૃત્સુ ધીતયો વેનન્તિ વેનાઃ પતયન્ત્ય્ આ દિશઃ ।
ન મર્ડિતા વિદ્યતે અન્ય એભ્યો દેવેષુ મે અધિ કામા અયંસત ॥

નરા વા શંસમ્ પૂષણમ્ અગોહ્યમ્ અગ્નિં દેવેદ્ધમ્ અભ્ય્ અર્ચસે ગિરા ।
સૂર્યામાસા ચન્દ્રમસા યમં દિવિ ત્રિતં વાતમ્ ઉષસમ્ અક્તુમ્ અશ્વિના ॥

કથા કવિસ્ તુવીરવાન્ કયા ગિરા બૃહસ્પતિર્ વાવૃધતે સુવૃક્તિભિઃ ।
અજ એકપાત્ સુહવેભિર્ ઋક્વભિર્ અહિઃ શૃણોતુ બુધ્ન્યો3 હવીમનિ ॥

દક્ષસ્ય વાદિતે જન્મનિ વ્રતે રાજાના મિત્રાવરુણા વિવાસસિ ।
અતૂર્તપન્થાઃ પુરુરથો અર્યમા સપ્તહોતા વિષુરૂપેષુ જન્મસુ ॥

તે નો અર્વન્તો હવનશ્રુતો હવં વિશ્વે શૃણ્વન્તુ વાજિનો મિતદ્રવઃ ।
સહસ્રસા મેધસાતાવ્ ઇવ ત્મના મહો યે ધનં સમિથેષુ જભ્રિરે ॥

પ્ર વો વાયું રથયુજમ્ પુરંધિં સ્તોમૈઃ કૃણુધ્વં સખ્યાય પૂષણમ્ ।
તે હિ દેવસ્ય સવિતુઃ સવીમનિ ક્રતું સચન્તે સચિતઃ સચેતસઃ ॥

ત્રિઃ સપ્ત સસ્રા નદ્યો મહીર્ અપો વનસ્પતીન્ પર્વતાઁ અગ્નિમ્ ઊતયે ।
કૃશાનુમ્ અસ્તૄન્ તિષ્યં સધસ્થ આ રુદ્રં રુદ્રેષુ રુદ્રિયં હવામહે ॥

સરસ્વતી સરયુઃ સિન્ધુર્ ઊર્મિભિર્ મહો મહીર્ અવસા યન્તુ વક્ષણીઃ ।
દેવીર્ આપો માતરઃ સૂદયિત્ન્વો ઘૃતવત્ પયો મધુમન્ નો અર્ચત ॥

ઉત માતા બૃહદ્દિવા શૃણોતુ નસ્ ત્વષ્ટા દેવેભિર્ જનિભિઃ પિતા વચઃ ।
ઋભુક્ષા વાજો રથસ્પતિર્ ભગો રણ્વઃ શંસઃ શશમાનસ્ય પાતુ નઃ ॥

રણ્વઃ સંદૃષ્ટૌ પિતુમાઁ ઇવ ક્ષયો ભદ્રા રુદ્રાણામ્ મરુતામ્ ઉપસ્તુતિઃ ।
ગોભિઃ ષ્યામ યશસો જનેષ્વ્ આ સદા દેવાસ ઇળયા સચેમહિ ॥

યામ્ મે ધિયમ્ મરુત ઇન્દ્ર દેવા અદદાત વરુણ મિત્ર યૂયમ્ ।
તામ્ પીપયત પયસેવ ધેનું કુવિદ્ ગિરો અધિ રથે વહાથ ॥

કુવિદ્ અઙ્ગ પ્રતિ યથા ચિદ્ અસ્ય નઃ સજાત્યસ્ય મરુતો બુબોધથ ।
નાભા યત્ર પ્રથમં સંનસામહે તત્ર જામિત્વમ્ અદિતિર્ દધાતુ નઃ ॥

તે હિ દ્યાવાપૃથિવી માતરા મહી દેવી દેવાઞ્ જન્મના યજ્ઞિયે ઇતઃ ।
ઉભે બિભૃત ઉભયમ્ ભરીમભિઃ પુરૂ રેતાંસિ પિતૃભિશ્ ચ સિઞ્ચતઃ ॥

વિ ષા હોત્રા વિશ્વમ્ અશ્નોતિ વાર્યમ્ બૃહસ્પતિર્ અરમતિઃ પનીયસી ।
ગ્રાવા યત્ર મધુષુદ્ ઉચ્યતે બૃહદ્ અવીવશન્ત મતિભિર્ મનીષિણઃ ॥

એવા કવિસ્ તુવીરવાઁ ઋતજ્ઞા દ્રવિણસ્યુર્ દ્રવિણસશ્ ચકાનઃ ।
ઉક્થેભિર્ અત્ર મતિભિશ્ ચ વિપ્રો ઽપીપયદ્ ગયો દિવ્યાનિ જન્મ ॥

એવા પ્લતેઃ સૂનુર્ અવીવૃધદ્ વો વિશ્વ આદિત્યા અદિતે મનીષી ।
ઈશાનાસો નરો અમર્ત્યેનાસ્તાવિ જનો દિવ્યો ગયેન ॥