Rig Veda · Chapter 10.064

kathā devānāṁ katamasya yāmani sumantu nāma śṛṇvatām manāmahe |
ko mṛḻāti katamo no mayas karat katama ūtī abhy ā vavartati ||

kratūyanti kratavo hṛtsu dhītayo venanti venāḥ patayanty ā diśaḥ |
na marḍitā vidyate anya ebhyo deveṣu me adhi kāmā ayaṁsata ||

narā vā śaṁsam pūṣaṇam agohyam agniṁ deveddham abhy arcase girā |
sūryāmāsā candramasā yamaṁ divi tritaṁ vātam uṣasam aktum aśvinā ||

kathā kavis tuvīravān kayā girā bṛhaspatir vāvṛdhate suvṛktibhiḥ |
aja ekapāt suhavebhir ṛkvabhir ahiḥ śṛṇotu budhnyo3 havīmani ||

dakṣasya vādite janmani vrate rājānā mitrāvaruṇā vivāsasi |
atūrtapanthāḥ pururatho aryamā saptahotā viṣurūpeṣu janmasu ||

te no arvanto havanaśruto havaṁ viśve śṛṇvantu vājino mitadravaḥ |
sahasrasā medhasātāv iva tmanā maho ye dhanaṁ samitheṣu jabhrire ||

pra vo vāyuṁ rathayujam puraṁdhiṁ stomaiḥ kṛṇudhvaṁ sakhyāya pūṣaṇam |
te hi devasya savituḥ savīmani kratuṁ sacante sacitaḥ sacetasaḥ ||

triḥ sapta sasrā nadyo mahīr apo vanaspatīn parvatām̐ agnim ūtaye |
kṛśānum astṝn tiṣyaṁ sadhastha ā rudraṁ rudreṣu rudriyaṁ havāmahe ||

sarasvatī sarayuḥ sindhur ūrmibhir maho mahīr avasā yantu vakṣaṇīḥ |
devīr āpo mātaraḥ sūdayitnvo ghṛtavat payo madhuman no arcata ||

uta mātā bṛhaddivā śṛṇotu nas tvaṣṭā devebhir janibhiḥ pitā vacaḥ |
ṛbhukṣā vājo rathaspatir bhago raṇvaḥ śaṁsaḥ śaśamānasya pātu naḥ ||

raṇvaḥ saṁdṛṣṭau pitumām̐ iva kṣayo bhadrā rudrāṇām marutām upastutiḥ |
gobhiḥ ṣyāma yaśaso janeṣv ā sadā devāsa iḻayā sacemahi ||

yām me dhiyam maruta indra devā adadāta varuṇa mitra yūyam |
tām pīpayata payaseva dhenuṁ kuvid giro adhi rathe vahātha ||

kuvid aṅga prati yathā cid asya naḥ sajātyasya maruto bubodhatha |
nābhā yatra prathamaṁ saṁnasāmahe tatra jāmitvam aditir dadhātu naḥ ||

te hi dyāvāpṛthivī mātarā mahī devī devāñ janmanā yajñiye itaḥ |
ubhe bibhṛta ubhayam bharīmabhiḥ purū retāṁsi pitṛbhiś ca siñcataḥ ||

vi ṣā hotrā viśvam aśnoti vāryam bṛhaspatir aramatiḥ panīyasī |
grāvā yatra madhuṣud ucyate bṛhad avīvaśanta matibhir manīṣiṇaḥ ||

evā kavis tuvīravām̐ ṛtajñā draviṇasyur draviṇasaś cakānaḥ |
ukthebhir atra matibhiś ca vipro 'pīpayad gayo divyāni janma ||

evā plateḥ sūnur avīvṛdhad vo viśva ādityā adite manīṣī |
īśānāso naro amartyenāstāvi jano divyo gayena ||