ઋગ્વેદ · અધ્યાય 1.046

એષો ઉષા અપૂર્વ્યા વ્ય્ ઉચ્છતિ પ્રિયા દિવઃ ।
સ્તુષે વામ્ અશ્વિના બૃહત્ ॥

યા દસ્રા સિન્ધુમાતરા મનોતરા રયીણામ્ ।
ધિયા દેવા વસુવિદા ॥

વચ્યન્તે વાં કકુહાસો જૂર્ણાયામ્ અધિ વિષ્ટપિ ।
યદ્ વાં રથો વિભિષ્ પતાત્ ॥

હવિષા જારો અપામ્ પિપર્તિ પપુરિર્ નરા ।
પિતા કુટસ્ય ચર્ષણિઃ ॥

આદારો વામ્ મતીનાં નાસત્યા મતવચસા ।
પાતં સોમસ્ય ધૃષ્ણુયા ॥

યા નઃ પીપરદ્ અશ્વિના જ્યોતિષ્મતી તમસ્ તિરઃ ।
તામ્ અસ્મે રાસાથામ્ ઇષમ્ ॥

આ નો નાવા મતીનાં યાતમ્ પારાય ગન્તવે ।
યુઞ્જાથામ્ અશ્વિના રથમ્ ॥

અરિત્રં વાં દિવસ્ પૃથુ તીર્થે સિન્ધૂનાં રથઃ ।
ધિયા યુયુજ્ર ઇન્દવઃ ॥

દિવસ્ કણ્વાસ ઇન્દવો વસુ સિન્ધૂનામ્ પદે ।
સ્વં વવ્રિં કુહ ધિત્સથઃ ॥

અભૂદ્ ઉ ભા ઉ અંશવે હિરણ્યમ્ પ્રતિ સૂર્યઃ ।
વ્ય્ અખ્યજ્ જિહ્વયાસિતઃ ॥

અભૂદ્ ઉ પારમ્ એતવે પન્થા ઋતસ્ય સાધુયા ।
અદર્શિ વિ સ્રુતિર્ દિવઃ ॥

તત્-તદ્ ઇદ્ અશ્વિનોર્ અવો જરિતા પ્રતિ ભૂષતિ ।
મદે સોમસ્ય પિપ્રતોઃ ॥

વાવસાના વિવસ્વતિ સોમસ્ય પીત્યા ગિરા ।
મનુષ્વચ્ છમ્ભૂ આ ગતમ્ ॥

યુવોર્ ઉષા અનુ શ્રિયમ્ પરિજ્મનોર્ ઉપાચરત્ ।
ઋતા વનથો અક્તુભિઃ ॥

ઉભા પિબતમ્ અશ્વિનોભા નઃ શર્મ યચ્છતમ્ ।
અવિદ્રિયાભિર્ ઊતિભિઃ ॥