Rig Veda · Chapter 1.046

eṣo uṣā apūrvyā vy ucchati priyā divaḥ |
stuṣe vām aśvinā bṛhat ||

yā dasrā sindhumātarā manotarā rayīṇām |
dhiyā devā vasuvidā ||

vacyante vāṁ kakuhāso jūrṇāyām adhi viṣṭapi |
yad vāṁ ratho vibhiṣ patāt ||

haviṣā jāro apām piparti papurir narā |
pitā kuṭasya carṣaṇiḥ ||

ādāro vām matīnāṁ nāsatyā matavacasā |
pātaṁ somasya dhṛṣṇuyā ||

yā naḥ pīparad aśvinā jyotiṣmatī tamas tiraḥ |
tām asme rāsāthām iṣam ||

ā no nāvā matīnāṁ yātam pārāya gantave |
yuñjāthām aśvinā ratham ||

aritraṁ vāṁ divas pṛthu tīrthe sindhūnāṁ rathaḥ |
dhiyā yuyujra indavaḥ ||

divas kaṇvāsa indavo vasu sindhūnām pade |
svaṁ vavriṁ kuha dhitsathaḥ ||

abhūd u bhā u aṁśave hiraṇyam prati sūryaḥ |
vy akhyaj jihvayāsitaḥ ||

abhūd u pāram etave panthā ṛtasya sādhuyā |
adarśi vi srutir divaḥ ||

tat-tad id aśvinor avo jaritā prati bhūṣati |
made somasya pipratoḥ ||

vāvasānā vivasvati somasya pītyā girā |
manuṣvac chambhū ā gatam ||

yuvor uṣā anu śriyam parijmanor upācarat |
ṛtā vanatho aktubhiḥ ||

ubhā pibatam aśvinobhā naḥ śarma yacchatam |
avidriyābhir ūtibhiḥ ||