રેવાખાણ્ડ (સંશોધિત પાઠ) · અધ્યાય 225

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે કોટીશ્વરતીર્થમાહાત્મ્યવર્ણનં નામ ચતુર્વિંશત્યધિકદ્વિશતતમો ઽધ્યાયઃ ॥
ર્ક્વ્ અધ્યાય 225
શ્રીમાર્કણ્ડેય ઉવાચ:
તતઃ ક્રોશાન્તરે ગચ્છેદ્ અલિકાતીર્થમુત્તમમ્ ।
અલિકા નામ ગાન્ધર્વી કુશીલા કુટિલાશયા

ચિત્રસેનસ્ય દૌહિત્રી વિદ્યાનન્દમૃષિં ગતા ।
વવ્રે તે સ્વીકૃતા તેન દશવર્ષાણિ તં શ્રિતા

પતિં જઘાન તં સુપ્તં કસ્મિંશ્ચિત્ કારણાન્તરે ।
ગત્વા નિવેદયામાસ પિતરં રત્નવલ્લભમ્

પિત્રા માત્રા ચ સંત્યક્તા બહુભિર્ભર્ત્સિતા નૃપ ।
ગર્ભઘ્ની ત્વં પતિઘ્ની ત્વમિતિ દર્શય મા મુખમ્

બ્રહ્મઘ્ની યાહિ પાપિષ્ઠે પરિત્યક્તા ગૃહાદ્વ્રજ

માર્કણ્ડેય ઉવાચ:
ઇતિ દુઃખાન્વિતા મૂઢા તાભ્યાં નિર્ભર્ત્સિતા સતી ।
તનું ત્યક્તું મનશ્ચક્રે પ્રાપ્ય તીર્થાન્તરં ક્વચિત્

સંપૃચ્છ્યમાના તીર્થાનિ બ્રાહ્મણેભ્યો યુધિષ્ઠિર ।
શ્રુત્વા પાપહરં તીર્થં રેવાસાગરસઙ્ગમે

તત્ર પાર્થ તપશ્ચક્રે નિરાહારા જિતવ્રતા ।
કૃચ્છ્રાતિકૃચ્છ્રપારાકમહાસાંતપનાદિભિઃ

ચાન્દ્રાયણૈર્બ્રહ્મકૂર્ચૈઃ કર્શયામાસ વૈ તનુમ્ ।
એવં વર્ષશતં સાર્દ્ધં વ્યતીતં તપસા નૃપ

તસ્યા વિશુદ્ધિમ્ ઇચ્છન્ત્યાઃ શિવધ્યાનાર્ચનાદિભિઃ ।
તતઃ કતિપયાહોભિસ્ તસ્યા જ્ઞાત્વા હઠં પરમ્ ।
પરિતુષ્ટઃ શિવઃ પ્રાહ પાર્વત્યા પરિચોદિતઃ

ઈશ્વર ઉવાચ:
પુત્રિ મા સાહસં કાર્ષીઃ શુદ્ધદેહાસિ સામ્પ્રતમ્ ।
તુષ્ટો ઽહં તપસા તે ઽદ્ય વરં વરય વાઞ્છિતમ્

અલિકોવાચ:
યદિ તુષ્ટો ઽસિ દેવેશ વરાર્હા યદ્યહં મતા ।
નાનાપાપાગ્નિતપ્તાયા દેહિ શુદ્ધિં પરાં મમ

ત્વં મે નાથો હ્યનાથાયાસ્ત્વમેવ જગતાં ગુરુઃ ।
દીનાનાથસમુદ્ધર્તા શરણ્યઃ સર્વદેહિનામ્

ઈશ્વર ઉવાચ:
ત્વં ભદ્રે શુદ્ધદેહાસિ મા કિંચિદ્ અનુશોચિથાઃ ।
સ્વનામ્ના સ્થાપયિત્વેહ માં તતઃ સ્વર્ગમેષ્યસિ

ઇત્યુક્ત્વા દેવદેવેશસ્તત્રૈવાન્તરધીયત ।
અલિકાપિ તતો ભક્ત્યા સ્નાત્વા સંસ્થાપ્ય શઙ્કરમ્

દત્ત્વા દાનં ચ વિપ્રેભ્યો લોકમાપ મહોત્કટમ્ ।
પિતરં ચ સમાસાદ્ય માતરં ચ યુધિષ્ઠિર

તૈશ્ચ સંમાનિતા પ્રીત્યા બન્ધુભિઃ સાલિકા તતઃ ।
વિમાનવરમારૂઢા દિવ્યમાલાન્વિતા નૃપ

ગૌરીલોકમનુપ્રાપ્તસખિત્વે ઽદ્યાપિ મોદતે ।
તતઃ પ્રભૃતિ તત્પાર્થ વિખ્યાતમ્ અલિકેશ્વરમ્

તત્ર તીર્થે તુ યા નારી પુરુષો વા યુધિષ્ઠિર ।
સ્નાત્વા સમ્પૂજયેદ્ભક્ત્યા મહાદેવમુમાયુતમ્

સ પાપૈર્વિવિધૈર્મુક્તો લોકમાપ્નોતિ શાંકરમ્ ।
માનસં વાચિકં પાપં કાયિકં યત્પુરા કૃતમ્

સર્વં તદ્વિલયં યાતિ ભોજયિત્વા દ્વિજાન્સદા ।
દીપં દત્ત્વા ચ દેવાગ્રે ન રોગૈઃ પરિભૂયતે

ધૂપપાત્રં વિમાનં ચ ઘણ્ટાં કલશમેવ ચ ।
દત્ત્વા દેવાય રાજેન્દ્ર શાક્રં લોકમવાપ્નુયાત્