રામાયણ · અધ્યાય 7.067

તસ્ય તદ્ વચનં શ્રુત્વા રામસ્યાક્લિષ્ટકર્મણઃ
અવાક્શિરાસ્ તથાભૂતો વાક્યમ્ એતદ્ ઉવાચ હ

શૂદ્રયોન્યાં પ્રસૂતો ઽસ્મિ તપ ઉગ્રં સમાસ્થિતઃ
દેવત્વં પ્રાર્થયે રામ સશરીરો મહાયશઃ

ન મિથ્યાહં વદે રાજન્ દેવલોકજિગીષયા
શૂદ્રં માં વિદ્ધિ કાકુત્સ્થ શમ્બૂકં નામ નામતઃ

ભાષતસ્ તસ્ય શૂદ્રસ્ય ખડ્ગં સુરુચિરપ્રભમ્
નિષ્કૃષ્ય કોશાદ્ વિમલં શિરશ્ ચિચ્છેદ રાઘવઃ

તસ્મિન્ મુહૂર્તે બાલો ઽસૌ જીવેન સમયુજ્યત

તતો ઽગસ્ત્યાશ્રમપદં રામઃ કમલલોચનઃ
સ ગત્વા વિનયેનૈવ તં નત્વા મુમુદે સુખી

સો ઽભિવાદ્ય મહાત્માનં જ્વલન્તમ્ ઇવ તેજસા
આતિથ્યં પરમં પ્રાપ્ય નિષસાદ નરાધિપઃ

તમ્ ઉવાચ મહાતેજાઃ કુમ્ભયોનિર્ મહાતપાઃ
સ્વાગતં તે નરશ્રેષ્ઠ દિષ્ટ્યા પ્રાપ્તો ઽસિ રાઘવ

ત્વં મે બહુમતો રામ ગુણૈર્ બહુભિર્ ઉત્તમૈઃ
અતિથિઃ પૂજનીયશ્ ચ મામ રાજન્ હૃદિ સ્થિતઃ

સુરા હિ કથયન્તિ ત્વામ્ આગતં શૂદ્રઘાતિનમ્
બ્રાહ્મણસ્ય તુ ધર્મેણ ત્વયા જીવાપિતઃ સુતઃ

ઉષ્યતાં ચેહ રજનીં સકાશે મમ રાઘવ
પ્રભાતે પુષ્પકેણ ત્વં ગન્તા સ્વપુરમ્ એવ હિ

ઇદં ચાભરણં સૌમ્ય નિર્મિતં વિશ્વકર્મણા
દિવ્યં દિવ્યેન વપુષા દીપ્યમાનં સ્વતેજસા
પ્રતિગૃહ્ણીષ્વ કાકુત્સ્થ મત્પ્રિયં કુરુ રાઘવ

દત્તસ્ય હિ પુનર્ દાનં સુમહત્ ફલમ્ ઉચ્યતે
તસ્માત્ પ્રદાસ્યે વિધિવત્ તત્ પ્રતીચ્છ નરર્ષભ

તદ્ રામઃ પ્રતિજગ્રાહ મુનેસ્ તસ્ય મહાત્મનઃ
દિવ્યમ્ આભરણં ચિત્રં પ્રદીપ્તમ્ ઇવ ભાસ્કરમ્

પ્રતિગૃહ્ય તતો રામસ્ તદ્ આભરણમ્ ઉત્તમમ્
આગમં તસ્ય દિવ્યસ્ય પ્રષ્ટુમ્ એવોપચક્રમે

અત્યદ્ભુતમ્ ઇદં બ્રહ્મન્ વપુષા યુક્તમ્ ઉત્તમમ્
કથં ભગવતા પ્રાપ્તં કુતો વા કેન વાહૃતમ્

કુતૂહલતયા બ્રહ્મન્ પૃચ્છામિ ત્વાં મહાયશઃ
આશ્ચર્યાણાં બહૂનાં હિ નિધિઃ પરમકો ભવાન્

એવં બ્રુવતિ કાકુત્સ્થે મુનિર્ વાક્યમ્ અથાબ્રવીત્
શૃણુ રામ યથાવૃત્તં પુરા ત્રેતાયુગે ગતે