રામાયણ · અધ્યાય 7.066

નારદસ્ય તુ તદ્ વાક્યં શ્રુત્વામૃતમયં યથા
પ્રહર્ષમ્ અતુલં લેભે લક્ષ્મણં ચેદમ્ અબ્રવીત્

ગચ્છ સૌમ્ય દ્વિજશ્રેષ્ઠં સમાશ્વાસય લક્ષ્મણ
બાલસ્ય ચ શરીરં તત્ તૈલદ્રોણ્યાં નિધાપય

ગન્ધૈશ્ ચ પરમોદારૈસ્ તૈલૈશ્ ચ સુસુગન્ધિભિઃ
યથા ન ક્ષીયતે બાલસ્ તથા સૌમ્ય વિધીયતામ્

યથા શરીરે બાલસ્ય ગુપ્તસ્યાક્લિષ્ટકર્મણઃ
વિપત્તિઃ પરિભેદો વા ભવેન્ ન ચ તથા કુરુ

તથા સંદિશ્ય કાકુત્સ્થો લક્ષ્મણં શુભલક્ષણમ્
મનસા પુષ્પકં દધ્યાવ્ આગચ્છેતિ મહાયશાઃ

ઇઙ્ગિતં સ તુ વિજ્ઞાય પુષ્પકો હેમભૂષિતઃ
આજગામ મુહૂર્તેન સંપીપં રાઘવસ્ય વૈ

સો ઽબ્રવીત્ પ્રણતો ભૂત્વા અયમ્ અસ્મિ નરાધિપ
વશ્યસ્ તવ મહાબાહો કિંકરઃ સમુપસ્થિતઃ

ભાષિતં રુચિરં શ્રુત્વા પુષ્પકસ્ય નરાધિપઃ
અભિવાદ્ય મહર્ષીસ્ તાન્ વિમાનં સો ઽધ્યરોહત

ધનુર્ ગૃહીત્વા તૂણીં ચ ખગ્દં ચ રુચિરપ્રભમ્
નિક્ષિપ્ય નગરે વીરૌ સૌમિત્રિભરતાવ્ ઉભૌ

પ્રાયાત્ પ્રતીચીં સ મરૂન્ વિચિન્વંશ્ ચ સમન્તતઃ
ઉત્તરામ્ અગમચ્ છ્રીમાન્ દિશં હિમવદાવૃતમ્

અપશ્યમાનસ્ તત્રાપિ સ્વલ્પમ્ અપ્ય્ અથ દુષ્કૃતમ્
પૂર્વામ્ અપિ દિશં સર્વામ્ અથાપશ્યન્ નરાધિપઃ

દક્ષિણાં દિશમ્ આક્રામત્ તતો રાજર્ષિનન્દનઃ
શૈવલસ્યોત્તરે પાર્શ્વે દદર્શ સુમહત્ સરઃ

તસ્મિન્ સરસિ તપ્યન્તં તાપસં સુમહત્ તપઃ
દદર્શ રાઘવઃ શ્રીમાંલ્ લમ્બમાનમ્ અધો મુખમ્

અથૈનં સમુપાગમ્ય તપ્યન્તં તપ ઉત્તમમ્
ઉવાચ રાઘવો વાક્યં ધન્યસ્ ત્વમ્ અસિ સુવ્રત

કસ્યાં યોન્યાં તપોવૃદ્ધવર્તસે દૃઢવિક્રમ
કૌતૂહલાત્ ત્વાં પૃચ્છામિ રામો દાશરથિર્ હ્ય્ અહમ્

મનીષિતસ્ તે કો ન્વ્ અર્થઃ સ્વર્ગલાભો વરાશ્રયઃ
યમ્ અશ્રિત્ય તપસ્ તપ્તં શ્રોતુમ્ ઇચ્છામિ તાપસ

બ્રાહ્મણો વાસિ ભદ્રં તે ક્ષત્રિયો વાસિ દુર્જયઃ
વૈશ્યો વા યદિ વા શૂદ્રઃ સત્યમ્ એતદ્ બ્રવીહિ મે