રામાયણ · અધ્યાય 7.068

પુરા ત્રેતાયુગે હ્ય્ આસીદ્ અરણ્યં બહુવિસ્તરમ્
સમન્તાદ્ યોજનશતં નિર્મૃગં પક્ષિવર્જિતમ્

તસ્મિન્ નિર્માનુષે ઽરણ્યે કુર્વાણસ્ તપ ઉત્તમમ્
અહમ્ આક્રમિતું શૌમ્ય તદ્ અરણ્યમ્ ઉપાગમમ્

તસ્ય રૂપમ્ અરણ્યસ્ય નિર્દેષ્ટું ન શશાક હ
ફલમૂલૈઃ સુખાસ્વાદૈર્ બહુરૂપૈશ્ ચ પાદપૈઃ

તસ્યારણ્યસ્ય મધ્યે તુ સરો યોજનમ્ આયતમ્
પદ્મોત્પલસમાકીર્ણં સમતિક્રાન્તશૈવલમ્

તદ્ આશ્ચર્યમ્ ઇવાત્યર્થં સુખાસ્વાદમ્ અનુત્તમમ્
અરજસ્કં તથાક્ષોભ્યં શ્રીમત્પક્ષિગણાયુતમ્

તસ્મિન્ સરઃસમીપે તુ મહદ્ અદ્ભુતમ્ આશ્રમમ્
પુરાણં પુણ્યમ્ અત્યર્થં તપસ્વિજનવર્જિતમ્

તત્રાહમ્ અવસં રાત્રિં નૈદાઘીં પુરુષર્ષભ
પ્રભાતે કાલ્યમ્ ઉત્થાય સરસ્ તદ્ ઉપચક્રમે

અથાપશ્યં શવં તત્ર સુપુષ્ટમ્ અજરં ક્વ ચિત્
તિષ્ઠન્તં પરયા લક્ષ્મ્યા તસ્મિંસ્ તોયાશયે નૃપ

તમ્ અર્થં ચિન્તયાનો ઽહં મુહૂર્તં તત્ર રાઘવ
વિષ્ઠિતો ઽસ્મિ સરસ્તીરે કિં ન્વ્ ઇદં સ્યાદ્ ઇતિ પ્રભો

અથાપશ્યં મુહૂર્તાત્ તુ દિવ્યમ્ અદ્ભુતદર્શનમ્
વિમાનં પરમોદારં હંસયુક્તં મનોજવમ્

અત્યર્થં સ્વર્ગિણં તત્ર વિમાને રઘુનન્દન
ઉપાસ્તે ઽપ્સરસાં વીર સહસ્રં દિવ્યભૂષણમ્
ગાન્તિ ગેયાનિ રમ્યાણિ વાદયન્તિ તથાપરાઃ

પશ્યતો મે તદા રામ વિમાનાદ્ અવરુહ્ય ચ
તં શવં ભક્ષયામ્ આસ સ સ્વર્ગી રઘુનન્દન

તતો ભુક્ત્વા યથાકામં માંસં બહુ ચ સુષ્ઠુ ચ
અવતીર્ય સરઃ સ્વર્ગી સંસ્પ્રષ્ટુમ્ ઉપચક્રમે

ઉપસ્પૃશ્ય યથાન્યાયં સ સ્વર્ગી પુરુષર્ષભ
આરોઢુમ્ ઉપચક્રામ વિમાનવરમ્ ઉત્તમમ્

તમ્ અહં દેવસંકાશમ્ આરોહન્તમ્ ઉદીક્ષ્ય વૈ
અથાહમ્ અબ્રુવં વાક્યં તમ્ એવ પુરુષર્ષભ

કો ભવાન્ દેવસંકાશ આહારશ્ ચ વિગર્હિતઃ
ત્વયાયં ભુજ્યતે સૌમ્ય કિં કર્થં વક્તુમ્ અર્હસિ

આશ્ચર્યમ્ ઈદૃશો ભાવો ભાસ્વરો દેવસંમતઃ
આહારો ગર્હિતઃ સૌમ્ય શ્રોતુમ્ ઇચ્છામિ તત્ત્વતઃ