રામાયણ · અધ્યાય 7.062

હતે તુ લવણે દેવાઃ સેન્દ્રાઃ સાગ્નિપુરોગમાઃ
ઊચુઃ સુમધુરાં વાણીં શત્રુઘ્નાં શત્રુતાપનમ્

દિષ્ટ્યા તે વિજયો વત્સ દિષ્ટ્ય લવણરાક્ષસઃ
હતઃ પુરુષશાર્દૂલવરં વરય રાઘવ

વરદાઃ સ્મ મહાબાહો સર્વ એવ સમાગતાઃ
વિજયાકાઙ્ક્ષિણસ્ તુભ્યમ્ અમોઘં દર્શનં હિ નઃ

દેવાનાં ભાષિતં શ્રુત્વા શૂરો મૂર્ધ્નિ કૃતાઞ્જલિઃ
પ્રત્યુવાચ મહાબાહુઃ શત્રુઘ્નઃ પ્રયતાત્મવાન્

ઇમાં મધુપુરીં રમ્યાં મધુરાં દેવ નિર્મિતામ્
નિવેશં પ્રપ્નુયાં શીઘ્રમ્ એષ મે ઽસ્તુ વરો મતઃ

તં દેવાઃ પ્રીતમનસો બાઢમ્ ઇત્ય્ એવ રાઘવમ્
ભવિષ્યતિ પુરી રમ્યા શૂરસેના ન સંશયઃ

તે તથોક્ત્વા મહાત્માનો દિવમ્ આરુરુહુસ્ તદા
શત્રુઘ્નો ઽપિ મહાતેજાસ્ તાં સેનાં સમુપાનયત્

સા સેન શીઘ્રમ્ આગચ્છચ્ છ્રુત્વા શત્રુઘ્નશાસનમ્
નિવેશનં ચ શત્રુઘ્નઃ શાસનેન સમારભત્

સા પુરી દિવ્યસંકાશા વર્ષે દ્વાદશમે શુભા
નિવિષ્ટા શૂરસેનાનાં વિષયશ્ ચાકુતોભયઃ

ક્ષેત્રાણિ સસ્ય યુક્તાનિ કાલે વર્ષતિ વાસવઃ
અરોગા વીરપુરુષા શત્રુઘ્નભુજપાલિતા

અર્ધચન્દ્રપ્રતીકાશા યમુનાતીરશોભિતા
શોભિતા ગૃહમુખ્યૈશ્ ચ શોભિતા ચત્વરાપણૈઃ

યચ્ ચ તેન મહચ્ છૂન્યં લવણેન કૃતં પુરા
શોભયામ્ આસ તદ્ વીરો નાનાપણ્યસમૃદ્ધિભિઃ

તાં સમૃદ્ધાં સમૃદ્ધાર્થઃ શત્રુઘ્નો ભરતાનુજઃ
નિરીક્ષ્ય પરમપ્રીતઃ પરં હર્ષમ્ ઉપાગમત્

તસ્ય બુદ્ધિઃ સમુત્પન્ના નિવેશ્ય મધુરાં પુરીમ્
રામપાદૌ નિરીક્ષેયં વર્ષે દ્વાદશમે શુભે