રામાયણ · અધ્યાય 7.063

તતો દ્વાદશમે વર્ષે શત્રુઘ્નો રામપાલિતામ્
અયોધ્યાં ચકમે ગન્તુમ્ અલ્પભૃત્યબલાનુગઃ

મન્ત્રિણો બલમુખ્યાંશ્ ચ નિવર્ત્ય ચ પુરોધસં
જગામ રથમુખ્યેન હયયુક્તેન ભાસ્વતા

સ ગત્વા ગણિતાન્ વાસાન્ સપ્તાષ્ટૌ રઘુનન્દનઃ
અયોધ્યામ્ અગમત્ તૂર્ણં રાઘવોત્સુકદર્શનઃ

સ પ્રવિશ્ય પુરીં રમ્યાં શ્રીમાન્ ઇક્ષ્વાકુનન્દનઃ
પ્રવિવેશ મહાબાહુર્ યત્ર રામો મહાદ્યુતિઃ

સો ઽભિવાદ્ય મહાત્માનં જ્વલન્તમ્ ઇવ તેજસા
ઉવાચ પ્રાઞ્જલિર્ ભૂત્વા રામં સત્યપરાક્રમમ્

યદ્ આજ્ઞપ્તં મહારાજ સર્વં તત્ કૃતવાન્ અહમ્
હતઃ સ લવણઃ પાપઃ પુરી સા ચ નિવેશિતા

દ્વાદશં ચ ગતં વર્ષં ત્વાં વિના રઘુનન્દન
નોત્સહેયમ્ અહં વસ્તું ત્વયા વિરહિતો નૃપ

સ મે પ્રસાદં કાકુત્સ્થ કુરુષ્વામિતવિક્રમ
માતૃહીનો યથા વત્સસ્ ત્વાં વિના પ્રવસામ્ય્ અહમ્

એવં બ્રુવાણં શત્રુઘ્નં પરિષ્વજ્યેદમ્ અબ્રવીત્
મા વિષાદં કૃથા વીર નૈતત્ ક્ષત્રિય ચેષ્ટિતમ્

નાવસીદન્તિ રાજાનો વિપ્રવાસેષુ રાઘવ
પ્રજાશ્ ચ પરિપાલ્યા હિ ક્ષત્રધર્મેણ રાઘવ

કાલે કાલે ચ માં વીર અયોધ્યામ્ અવલોકિતુમ્
આગચ્છ ત્વં નરશ્રેષ્ઠ ગન્તાસિ ચ પુરં તવ

મમાપિ ત્વં સુદયિતઃ પ્રાણૈર્ અપિ ન સંશયઃ
અવશ્યં કરણીયં ચ રાજ્યસ્ય પરિપાલનમ્

તસ્માત્ ત્વં વસ કાકુત્સ્થ પઞ્ચરાત્રં મયા સહ
ઊર્ધ્વં ગન્તાસિ મધુરાં સભૃત્યબલવાહનઃ

રામસ્યૈતદ્ વચઃ શ્રુત્વા ધર્મયુક્તં મનોઽનુગમ્
શત્રુઘ્નો દીનયા વાચા બાઢમ્ ઇત્ય્ એવ ચાબ્રવીત્

સ પઞ્ચરાત્રં કાકુત્સ્થો રાઘવસ્ય યથાજ્ઞયા
ઉષ્ય તત્ર મહેષ્વાસો ગમનાયોપચક્રમે

આમન્ત્ર્ય તુ મહાત્માનં રામં સત્યપરાક્રમમ્
ભરતં લક્ષ્મણં ચૈવ મહારથમ્ ઉપારુહત્

દૂરં તાભ્યામ્ અનુગતો લક્ષ્મણેન મહાત્મના
ભરતેન ચ શત્રુઘ્નો જગામાશુ પુરીં તદા