રામાયણ · અધ્યાય 6.007

ઇત્ય્ ઉક્તા રાક્ષસેન્દ્રેણ રાક્ષસાસ્ તે મહાબલાઃ
ઊચુઃ પ્રાઞ્જલયઃ સર્વે રાવણં રાક્ષસેશ્વરમ્

રાજન્ પરિઘશક્ત્યૃષ્ટિશૂલપટ્ટસસંકુલમ્
સુમહન્ નો બલં કસ્માદ્ વિષાદં ભજતે ભવાન્

કૈલાસશિખરાવાસી યક્ષૈર્ બહુભિર્ આવૃતઃ
સુમહત્ કદનં કૃત્વા વશ્યસ્ તે ધનદઃ કૃતઃ

સ મહેશ્વરસખ્યેન શ્લાઘમાનસ્ ત્વયા વિભો
નિર્જિતઃ સમરે રોષાલ્ લોકપાલો મહાબલઃ

વિનિહત્ય ચ યક્ષૌઘાન્ વિક્ષોભ્ય ચ વિગૃહ્ય ચ
ત્વયા કૈલાસશિખરાદ્ વિમાનમ્ ઇદમ્ આહૃતમ્

મયેન દાનવેન્દ્રેણ ત્વદ્ભયાત્ સખ્યમ્ ઇચ્છતા
દુહિતા તવ ભાર્યાર્થે દત્તા રાક્ષસપુંગવ

દાનવેન્દ્રો મધુર્ નામ વીર્યોત્સિક્તો દુરાસદઃ
વિગૃહ્ય વશમ્ આનીતઃ કુમ્ભીનસ્યાઃ સુખાવહઃ

નિર્જિતાસ્ તે મહાબાહો નાગા ગત્વા રસાતલમ્
વાસુકિસ્ તક્ષકઃ શઙ્ખો જટી ચ વશમ્ આહૃતાઃ

અક્ષયા બલવન્તશ્ ચ શૂરા લબ્ધવરાઃ પુનઃ
ત્વયા સંવત્સરં યુદ્ધ્વા સમરે દાનવા વિભો

સ્વબલં સમુપાશ્રિત્ય નીતા વશમ્ અરિંદમ
માયાશ્ ચાધિગતાસ્ તત્ર બહવો રાક્ષસાધિપ

શૂરાશ્ ચ બલવન્તશ્ ચ વરુણસ્ય સુતા રણે
નિર્જિતાસ્ તે મહાબાહો ચતુર્વિધબલાનુગાઃ

મૃત્યુદણ્ડમહાગ્રાહં શાલ્મલિદ્વીપમણ્ડિતમ્
અવગાહ્ય ત્વયા રાજન્ યમસ્ય બલસાગરમ્

જયશ્ ચ વિપ્લુલઃ પ્રાપ્તો મૃત્યુશ્ ચ પ્રતિષેધિતઃ
સુયુદ્ધેન ચ તે સર્વે લોકાસ્ તત્ર સુતોષિતાઃ

ક્ષત્રિયૈર્ બહુભિર્ વીરૈઃ શક્રતુલ્યપરાક્રમૈઃ
આસીદ્ વસુમતી પૂર્ણા મહદ્ભિર્ ઇવ પાદપૈઃ

તેષાં વીર્યગુણોત્સાહૈર્ ન સમો રાઘવો રણે
પ્રસહ્ય તે ત્વયા રાજન્ હતાઃ પરમદુર્જયાઃ

રાજન્ નાપદ્ અયુક્તેયમ્ આગતા પ્રાકૃતાજ્ જનાત્
હૃદિ નૈવ ત્વયા કાર્યા ત્વં વધિષ્યસિ રાઘવમ્