રામાયણ · અધ્યાય 6.006

લઙ્કાયાં તુ કૃતં કર્મ ઘોરં દૃષ્ટ્વા ભવાવહમ્
રાક્ષસેન્દ્રો હનુમતા શક્રેણેવ મહાત્મના
અબ્રવીદ્ રાક્ષસાન્ સર્વાન્ હ્રિયા કિં ચિદ્ અવાઙ્મુખઃ

ધર્ષિતા ચ પ્રવિષ્ટા ચ લઙ્કા દુષ્પ્રસહા પુરી
તેન વાનરમાત્રેણ દૃષ્ટા સીતા ચ જાનકી

પ્રસાદો ધર્ષિતશ્ ચૈત્યઃ પ્રવરા રાક્ષસા હતાઃ
આવિલા ચ પુરી લઙ્કા સર્વા હનુમતા કૃતા

કિં કરિષ્યામિ ભદ્રં વઃ કિં વા યુક્તમ્ અનન્તરમ્
ઉચ્યતાં નઃ સમર્થં યત્ કૃતં ચ સુકૃતં ભવેત્

મન્ત્રમૂલં હિ વિજયં પ્રાહુર્ આર્યા મનસ્વિનઃ
તસ્માદ્ વૈ રોચયે મન્ત્રં રામં પ્રતિ મહાબલાઃ

ત્રિવિધાઃ પુરુષા લોકે ઉત્તમાધમમધ્યમાઃ
તેષાં તુ સમવેતાનાં ગુણદોષં વદામ્ય્ અહમ્

મન્ત્રિભિર્ હિતસંયુક્તૈઃ સમર્થૈર્ મન્ત્રનિર્ણયે
મિત્રૈર્ વાપિ સમાનાર્થૈર્ બાન્ધવૈર્ અપિ વા હિતૈઃ

સહિતો મન્ત્રયિત્વા યઃ કર્મારમ્ભાન્ પ્રવર્તયેત્
દૈવે ચ કુરુતે યત્નં તમ્ આહુઃ પુરુષોત્તમમ્

એકો ઽર્થં વિમૃશેદ્ એકો ધર્મે પ્રકુરુતે મનઃ
એકઃ કાર્યાણિ કુરુતે તમ્ આહુર્ મધ્યમં નરમ્

ગુણદોષાવ્ અનિશ્ચિત્ય ત્યક્ત્વા દૈવવ્યપાશ્રયમ્
કરિષ્યામીતિ યઃ કાર્યમ્ ઉપેક્ષેત્ સ નરાધમઃ

યથેમે પુરુષા નિત્યમ્ ઉત્તમાધમમધ્યમાઃ
એવં મન્ત્રો ઽપિ વિજ્ઞેય ઉત્તમાધમમધ્યમઃ

ઐકમત્યમ્ ઉપાગમ્ય શાસ્ત્રદૃષ્ટેન ચક્ષુષા
મન્ત્રિણો યત્ર નિરસ્તાસ્ તમ્ આહુર્ મન્ત્રમ્ ઉત્તમમ્

બહ્વ્યો ઽપિ મતયો ગત્વા મન્ત્રિણો હ્ય્ અર્થનિર્ણયે
પુનર્ યત્રૈકતાં પ્રાપ્તઃ સ મન્ત્રો મધ્યમઃ સ્મૃતઃ

અન્યોન્યમતિમ્ આસ્થાય યત્ર સંપ્રતિભાષ્યતે
ન ચૈકમત્યે શ્રેયો ઽસ્તિ મન્ત્રઃ સો ઽધમ ઉચ્યતે

તસ્માત્ સુમન્ત્રિતં સાધુ ભવન્તો મન્ત્રિસત્તમાઃ
કાર્યં સંપ્રતિપદ્યન્તામ્ એતત્ કૃત્યતમં મમ

વાનરાણાં હિ વીરાણાં સહસ્રૈઃ પરિવારિતઃ
રામો ઽભ્યેતિ પુરીં લઙ્કામ્ અસ્માકમ્ ઉપરોધકઃ

તરિષ્યતિ ચ સુવ્યક્તં રાઘવઃ સાગરં સુખમ્
તરસા યુક્તરૂપેણ સાનુજઃ સબલાનુગઃ

અસ્મિન્ન્ એવંગતે કાર્યે વિરુદ્ધે વાનરૈઃ સહ
હિતં પુરે ચ સૈન્યે ચ સર્વં સંમન્ત્ર્યતાં મમ