રામાયણ · અધ્યાય 6.008

તતો નીલામ્બુદનિભઃ પ્રહસ્તો નામ રાક્ષસઃ
અબ્રવીત્ પ્રાઞ્જલિર્ વાક્યં શૂરઃ સેનાપતિસ્ તદા

દેવદાનવગન્ધર્વાઃ પિશાચપતગોરગાઃ
ન ત્વાં ધર્ષયિતું શક્તાઃ કિં પુનર્ વાનરા રણે

સર્વે પ્રમત્તા વિશ્વસ્તા વઞ્ચિતાઃ સ્મ હનૂમતા
ન હિ મે જીવતો ગચ્છેજ્ જીવન્ સ વનગોચરઃ

સર્વાં સાગરપર્યન્તાં સશૈલવનકાનનામ્
કરોમ્ય્ અવાનરાં ભૂમિમ્ આજ્ઞાપયતુ માં ભવાન્

રક્ષાં ચૈવ વિધાસ્યામિ વાનરાદ્ રજનીચર
નાગમિષ્યતિ તે દુઃખં કિં ચિદ્ આત્માપરાધજમ્

અબ્રવીચ્ ચ સુસંક્રુદ્ધો દુર્મુખો નામ રાક્ષસઃ
ઇદં ન ક્ષમણીયં હિ સર્વેષાં નઃ પ્રધર્ષણમ્

અયં પરિભવો ભૂયઃ પુરસ્યાન્તઃપુરસ્ય ચ
શ્રીમતો રાક્ષસેન્દ્રસ્ય વાનરેન્દ્રપ્રધર્ષણમ્

અસ્મિન્ મુહૂર્તે હત્વૈકો નિવર્તિષ્યામિ વાનરાન્
પ્રવિષ્ટાન્ સાગરં ભીમમ્ અમ્બરં વા રસાતલમ્

તતો ઽબ્રવીત્ સુસંક્રુદ્ધો વજ્રદંષ્ટ્રો મહાબલઃ
પ્રગૃહ્ય પરિઘં ઘોરં માંસશોણિતરૂપિતમ્

કિં વો હનુમતા કાર્યં કૃપણેન તપસ્વિના
રામે તિષ્ઠતિ દુર્ધર્ષે સુગ્રીવે સહલક્ષ્મણે

અદ્ય રામં સસુગ્રીવં પરિઘેણ સલક્ષ્મણમ્
આગમિષ્યામિ હત્વૈકો વિક્ષોભ્ય હરિવાહિનીમ્

કૌમ્ભકર્ણિસ્ તતો વીરો નિકુમ્ભો નામ વીર્યવાન્
અબ્રવીત્ પરમકુર્દ્ધો રાવણં લોકરાવણમ્

સર્વે ભવન્તસ્ તિષ્ઠન્તુ મહારાજેન સંગતાઃ
અહમ્ એકો હનિષ્યામિ રાઘવં સહલક્ષ્મણમ્

તતો વજ્રહનુર્ નામ રાક્ષસઃ પર્વતોપમઃ
ક્રુદ્ધઃ પરિલિહન્ વક્ત્રં જિહ્વયા વાક્યમ્ અબ્રવીત્

સ્વૈરં કુર્વન્તુ કાર્યાણિ ભવન્તો વિગતજ્વરાઃ
એકો ઽહં ભક્ષયિષ્યામિ તાન્ સર્વાન્ હરિયૂથપાન્

સ્વસ્થાઃ ક્રીડન્તુ નિશ્ચિન્તાઃ પિબન્તુ મધુવારુણીમ્
અહમ્ એકો હનિષ્યામિ સુગ્રીવં સહલક્ષ્મણમ્
સાઙ્ગદં ચ હનૂમન્તં રામં ચ રણકુઞ્જરમ્