રામાયણ · અધ્યાય 5.063

તતઃ પ્રસ્રવણં શૈલં તે ગત્વા ચિત્રકાનનમ્
પ્રણમ્ય શિરસા રામં લક્ષ્મણં ચ મહાબલમ્

યુવરાજં પુરસ્કૃત્ય સુગ્રીવમ્ અભિવાદ્ય ચ
પ્રવૃત્તમ્ અથ સીતાયાઃ પ્રવક્તુમ્ ઉપચક્રમુઃ

રાવણાન્તઃપુરે રોધં રાક્ષસીભિશ્ ચ તર્જનમ્
રામે સમનુરાગં ચ યશ્ ચાપિ સમયઃ કૃતઃ

એતદ્ આખ્યાન્તિ તે સર્વે હરયો રામ સંનિધૌ
વૈદેહીમ્ અક્ષતાં શ્રુત્વા રામસ્ તૂત્તરમ્ અબ્રવીત્

ક્વ સીતા વર્તતે દેવી કથં ચ મયિ વર્તતે
એતન્ મે સર્વમ્ આખ્યાત વૈદેહીં પ્રતિ વાનરાઃ

રામસ્ય ગદિતં શ્રુત્વ હરયો રામસંનિધૌ
ચોદયન્તિ હનૂમન્તં સીતાવૃત્તાન્તકોવિદમ્

શ્રુત્વા તુ વચનં તેષાં હનૂમાન્ મારુતાત્મજઃ
ઉવાચ વાક્યં વાક્યજ્ઞઃ સીતાયા દર્શનં યથા

સમુદ્રં લઙ્ઘયિત્વાહં શતયોજનમ્ આયતમ્
અગચ્છં જાનકીં સીતાં માર્ગમાણો દિદૃક્ષયા

તત્ર લઙ્કેતિ નગરી રાવણસ્ય દુરાત્મનઃ
દક્ષિણસ્ય સમુદ્રસ્ય તીરે વસતિ દક્ષિણે

તત્ર દૃષ્ટા મયા સીતા રાવણાન્તઃપુરે સતી
સંન્યસ્ય ત્વયિ જીવન્તી રામા રામ મનોરથમ્

દૃષ્ટા મે રાક્ષસી મધ્યે તર્જ્યમાના મુહુર્ મુહુઃ
રાક્ષસીભિર્ વિરૂપાભી રક્ષિતા પ્રમદાવને

દુઃખમ્ આપદ્યતે દેવી તવાદુઃખોચિતા સતી
રાવણાન્તઃપુરે રુદ્ધ્વા રાક્ષસીભિઃ સુરક્ષિતા

એકવેણીધરા દીના ત્વયિ ચિન્તાપરાયણા
અધઃશય્યા વિવર્ણાઙ્ગી પદ્મિનીવ હિમાગમે

રાવણાદ્ વિનિવૃત્તાર્થા મર્તવ્યકૃતનિશ્ચયા
દેવી કથં ચિત્ કાકુત્સ્થ ત્વન્મના માર્ગિતા મયા

ઇક્ષ્વાકુવંશવિખ્યાતિં શનૈઃ કીર્તયતાનઘ
સ મયા નરશાર્દૂલ વિશ્વાસમ્ ઉપપાદિતા

તતઃ સંભાષિતા દેવી સર્વમ્ અર્થં ચ દર્શિતા
રામસુગ્રીવસખ્યં ચ શ્રુત્વા પ્રીતિમ્ ઉપાગતા

નિયતઃ સમુદાચારો ભક્તિશ્ ચાસ્યાસ્ તથા ત્વયિ
એવં મયા મહાભાગા દૃષ્ટા જનકનન્દિની
ઉગ્રેણ તપસા યુક્તા ત્વદ્ભક્ત્યા પુરુષર્ષભ

અભિજ્ઞાનં ચ મે દત્તં યથાવૃત્તં તવાન્તિકે
ચિત્રકૂટે મહાપ્રાજ્ઞ વાયસં પ્રતિ રાઘવ

વિજ્ઞાપ્યશ્ ચ નર વ્યાઘ્રો રામો વાયુસુત ત્વયા
અખિલેનેહ યદ્ દૃષ્ટમ્ ઇતિ મામ્ આહ જાનકી

ઇદં ચાસ્મૈ પ્રદાતવ્યં યત્નાત્ સુપરિરક્ષિતમ્
બ્રુવતા વચનાન્ય્ એવં સુગ્રીવસ્યોપશૃણ્વતઃ

એષ ચૂડામણિઃ શ્રીમાન્ મયા તે યત્નરક્ષિતઃ
મનઃશિલાયાસ્ તિકલસ્ તં સ્મરસ્વેતિ ચાબ્રવીત્

એષ નિર્યાતિતઃ શ્રીમાન્ મયા તે વારિસંભવઃ
એતં દૃષ્ટ્વા પ્રમોદિષ્યે વ્યસને ત્વામ્ ઇવાનઘ

જીવિતં ધારયિષ્યામિ માસં દશરથાત્મજ
ઊર્ધ્વં માસાન્ ન જીવેયં રક્ષસાં વશમ્ આગતા

ઇતિ મામ્ અબ્રવીત્ સીતા કૃશાઙ્ગી ધર્મ ચારિણી
રાવણાન્તઃપુરે રુદ્ધા મૃગીવોત્ફુલ્લલોચના

એતદ્ એવ મયાખ્યાતં સર્વં રાઘવ યદ્ યથા
સર્વથા સાગરજલે સંતારઃ પ્રવિધીયતામ્

તૌ જાતાશ્વાસૌ રાજપુત્રૌ વિદિત્વા તચ્ ચાભિજ્ઞાનં રાઘવાય પ્રદાય
દેવ્યા ચાખ્યાતં સર્વમ્ એવાનુપૂર્વ્યાદ્ વાચા સંપૂર્ણં વાયુપુત્રઃ શશંસ