રામાયણ · અધ્યાય 5.027

તથાગતાં તાં વ્યથિતામ્ અનિન્દિતાં વ્યપેતહર્ષાં પરિદીનમાનસામ્
શુભાં નિમિત્તાનિ શુભાનિ ભેજિરે નરં શ્રિયા જુષ્ટમ્ ઇવોપજીવિનઃ

તસ્યાઃ શુભં વામમ્ અરાલપક્ષ્મ રાજીવૃતં કૃષ્ણવિશાલશુક્લમ્
પ્રાસ્પન્દતૈકં નયનં સુકેશ્યા મીનાહતં પદ્મમ્ ઇવાભિતામ્રમ્

ભુજશ્ ચ ચાર્વઞ્ચિતપીનવૃત્તઃ પરાર્ધ્ય કાલાગુરુચન્દનાર્હઃ
અનુત્તમેનાધ્યુષિતઃ પ્રિયેણ ચિરેણ વામઃ સમવેપતાશુ

ગજેન્દ્રહસ્તપ્રતિમશ્ ચ પીનસ્ તયોર્ દ્વયોઃ સંહતયોઃ સુજાતઃ
પ્રસ્પન્દમાનઃ પુનર્ ઊરુર્ અસ્યા રામં પુરસ્તાત્ સ્થિતમ્ આચચક્ષે

શુભં પુનર્ હેમસમાનવર્ણમ્ ઈષદ્રજોધ્વસ્તમ્ ઇવામલાક્ષ્યાઃ
વાસઃ સ્થિતાયાઃ શિખરાગ્રદન્ત્યાઃ કિં ચિત્ પરિસ્રંસત ચારુગાત્ર્યાઃ

એતૈર્ નિમિત્તૈર્ અપરૈશ્ ચ સુભ્રૂઃ સંબોધિતા પ્રાગ્ અપિ સાધુસિદ્ધૈઃ
વાતાતપક્લાન્તમ્ ઇવ પ્રનષ્ટં વર્ષેણ બીજં પ્રતિસંજહર્ષ

તસ્યાઃ પુનર્ બિમ્બફલોપમૌષ્ઠં સ્વક્ષિભ્રુકેશાન્તમ્ અરાલપક્ષ્મ
વક્ત્રં બભાસે સિતશુક્લદંષ્ટ્રં રાહોર્ મુખાચ્ ચન્દ્ર ઇવ પ્રમુક્તઃ

સા વીતશોકા વ્યપનીતતન્દ્રી શાન્તજ્વરા હર્ષવિબુદ્ધસત્ત્વા
અશોભતાર્યા વદનેન શુક્લે શીતાન્શુના રાત્રિર્ ઇવોદિતેન