રામાયણ · અધ્યાય 5.026

સા રાક્ષસેન્દ્રસ્ય વચો નિશમ્ય તદ્ રાવણસ્યાપ્રિયમ્ અપ્રિયાર્તા
સીતા વિતત્રાસ યથા વનાન્તે સિંહાભિપન્ના ગજરાજકન્યા

સા રાક્ષસી મધ્યગતા ચ ભીરુર્ વાગ્ભિર્ ભૃશં રાવણતર્જિતા ચ
કાન્તારમધ્યે વિજને વિસૃષ્ટા બાલેવ કન્યા વિલલાપ સીતા

સત્યં બતેદં પ્રવદન્તિ લોકે નાકાલમૃત્યુર્ ભવતીતિ સન્તઃ
યત્રાહમ્ એવં પરિભર્ત્સ્યમાના જીવામિ કિં ચિત્ ક્ષણમ્ અપ્ય્ અપુણ્યા

સુખાદ્ વિહીનં બહુદુઃખપૂર્ણમ્ ઇદં તુ નૂનં હૃદયં સ્થિરં મે
વિદીર્યતે યન્ ન સહસ્રધાદ્ય વજ્રાહતં શૃઙ્ગમ્ ઇવાચલસ્ય

નૈવાસ્તિ નૂનં મમ દોષમ્ અત્ર વધ્યાહમ્ અસ્યાપ્રિયદર્શનસ્ય
ભાવં ન ચાસ્યાહમ્ અનુપ્રદાતુમ્ અલં દ્વિજો મન્ત્રમ્ ઇવાદ્વિજાય

નૂનં મમાઙ્ગાન્ય્ અચિરાદ્ અનાર્યઃ શસ્ત્રૈઃ શિતૈશ્ છેત્સ્યતિ રાક્ષસેન્દ્રઃ
તસ્મિન્ન્ અનાગચ્છતિ લોકનાથે ગર્ભસ્થજન્તોર્ ઇવ શલ્યકૃન્તઃ

દુઃખં બતેદં મમ દુઃખિતાયા માસૌ ચિરાયાભિગમિષ્યતો દ્વૌ
બદ્ધસ્ય વધ્યસ્ય યથા નિશાન્તે રાજાપરાધાદ્ ઇવ તસ્કરસ્ય

હા રામ હા લક્ષ્મણ હા સુમિત્રે હા રામ માતઃ સહ મે જનન્યા
એષા વિપદ્યામ્ય્ અહમ્ અલ્પભાગ્યા મહાર્ણવે નૌર્ ઇવ મૂઢ વાતા

તરસ્વિનૌ ધારયતા મૃગસ્ય સત્ત્વેન રૂપં મનુજેન્દ્રપુત્રૌ
નૂનં વિશસ્તૌ મમ કારણાત્ તૌ સિંહર્ષભૌ દ્વાવ્ ઇવ વૈદ્યુતેન

નૂનં સ કાલો મૃગરૂપધારી મામ્ અલ્પભાગ્યાં લુલુભે તદાનીમ્
યત્રાર્યપુત્રં વિસસર્જ મૂઢા રામાનુજં લક્ષ્મણપૂર્વકં ચ

હા રામ સત્યવ્રત દીર્ઘવાહો હા પૂર્ણચન્દ્રપ્રતિમાનવક્ત્ર
હા જીવલોકસ્ય હિતઃ પ્રિયશ્ ચ વધ્યાં ન માં વેત્સિ હિ રાક્ષસાનામ્

અનન્યદેવત્વમ્ ઇયં ક્ષમા ચ ભૂમૌ ચ શય્યા નિયમશ્ ચ ધર્મે
પતિવ્રતાત્વં વિફલં મમેદં કૃતં કૃતઘ્નેષ્વ્ ઇવ માનુષાણામ્

મોઘો હિ ધર્મશ્ ચરિતો મમાયં તથૈકપત્નીત્વમ્ ઇદં નિરર્થમ્
યા ત્વાં ન પશ્યામિ કૃશા વિવર્ણા હીના ત્વયા સંગમને નિરાશા

પિતુર્ નિર્દેશં નિયમેન કૃત્વા વનાન્ નિવૃત્તશ્ ચરિતવ્રતશ્ ચ
સ્ત્રીભિસ્ તુ મન્યે વિપુલેક્ષણાભિઃ સંરંસ્યસે વીતભયઃ કૃતાર્થઃ

અહં તુ રામ ત્વયિ જાતકામા ચિરં વિનાશાય નિબદ્ધભાવા
મોઘં ચરિત્વાથ તપોવ્રતં ચ ત્યક્ષ્યામિ ધિગ્ જીવિતમ્ અલ્પભાગ્યા

સા જીવિતં ક્ષિપ્રમ્ અહં ત્યજેયં વિષેણ શસ્ત્રેણ શિતેન વાપિ
વિષસ્ય દાતા ન તુ મે ઽસ્તિ કશ્ ચિચ્ છસ્ત્રસ્ય વા વેશ્મનિ રાક્ષસસ્ય

શોકાભિતપ્તા બહુધા વિચિન્ત્ય સીતાથ વેણ્યુદ્ગ્રથનં ગૃહીત્વા
ઉદ્બધ્ય વેણ્યુદ્ગ્રથનેન શીઘ્રમ્ અહં ગમિષ્યામિ યમસ્ય મૂલમ્

ઇતીવ સીતા બહુધા વિલપ્ય સર્વાત્મના રામમ્ અનુસ્મરન્તી
પ્રવેપમાના પરિશુષ્કવક્ત્રા નગોત્તમં પુષ્પિતમ્ આસસાદ

ઉપસ્થિતા સા મૃદુર્ સર્વગાત્રી શાખાં ગૃહીત્વાથ નગસ્ય તસ્ય
તસ્યાસ્ તુ રામં પ્રવિચિન્તયન્ત્યા રામાનુજં સ્વં ચ કુલં શુભાઙ્ગ્યાઃ

શોકાનિમિત્તાનિ તદા બહૂનિ ધૈર્યાર્જિતાનિ પ્રવરાણિ લોકે
પ્રાદુર્નિમિત્તાનિ તદા બભૂવુઃ પુરાપિ સિદ્ધાન્ય્ ઉપલક્ષિતાનિ