રામાયણ · અધ્યાય 4.043

વિશેષેણ તુ સુગ્રીવો હનુમત્યર્થમ્ ઉક્તવાન્
સ હિ તસ્મિન્ હરિશ્રેષ્ઠે નિશ્ચિતાર્થો ઽર્થસાધને

ન ભૂમૌ નાન્તરિક્ષે વા નામ્બરે નામરાલયે
નાપ્સુ વા ગતિસંગં તે પશ્યામિ હરિપુંગવ

સાસુરાઃ સહગન્ધર્વાઃ સનાગનરદેવતાઃ
વિદિતાઃ સર્વલોકાસ્ તે સસાગરધરાધરાઃ

ગતિર્ વેગશ્ ચ તેજશ્ ચ લાઘવં ચ મહાકપે
પિતુસ્ તે સદૃશં વીર મારુતસ્ય મહૌજસઃ

તેજસા વાપિ તે ભૂતં સમં ભુવિ ન વિદ્યતે
તદ્ યથા લભ્યતે સીતા તત્ત્વમ્ એવોપપાદય

ત્વય્ય્ એવ હનુમન્ન્ અસ્તિ બલં બુદ્ધિઃ પરાક્રમઃ
દેશકાલાનુવૃત્તશ્ ચ નયશ્ ચ નયપણ્ડિત

તતઃ કાર્યસમાસંગમ્ અવગમ્ય હનૂમતિ
વિદિત્વા હનુમન્તં ચ ચિન્તયામ્ આસ રાઘવઃ

સર્વથા નિશ્ચિતાર્થો ઽયં હનૂમતિ હરીશ્વરઃ
નિશ્ચિતાર્થતરશ્ ચાપિ હનૂમાન્ કાર્યસાધને

તદ્ એવં પ્રસ્થિતસ્યાસ્ય પરિજ્ઞાતસ્ય કર્મભિઃ
ભર્ત્રા પરિગૃહીતસ્ય ધ્રુવઃ કાર્યફલોદયઃ

તં સમીક્ષ્ય મહાતેજા વ્યવસાયોત્તરં હરિમ્
કૃતાર્થ ઇવ સંવૃત્તઃ પ્રહૃષ્ટેન્દ્રિયમાનસઃ

દદૌ તસ્ય તતઃ પ્રીતઃ સ્વનામાઙ્કોપશોભિતમ્
અઙ્ગુલીયમ્ અભિજ્ઞાનં રાજપુત્ર્યાઃ પરંતપઃ

અનેન ત્વાં હરિશ્રેષ્ઠ ચિહ્નેન જનકાત્મજા
મત્સકાશાદ્ અનુપ્રાપ્તમ્ અનુદ્વિગ્નાનુપશ્યતિ

વ્યવસાયશ્ ચ તે વીર સત્ત્વયુક્તશ્ ચ વિક્રમઃ
સુગ્રીવસ્ય ચ સંદેશઃ સિદ્ધિં કથયતીવ મે

સ તદ્ ગૃહ્ય હરિશ્રેષ્ઠઃ સ્થાપ્ય મૂર્ધ્નિ કૃતાઞ્જલિઃ
વન્દિત્વા ચરણૌ ચૈવ પ્રસ્થિતઃ પ્લવગોત્તમઃ

સ તત્ પ્રકર્ષન્ હરિણાં બલં મહદ્ બભૂવ વીરઃ પવનાત્મજઃ કપિ
ગતામ્બુદે વ્યોમ્નિ વિશુદ્ધમણ્ડલઃ શશીવ નક્ષત્રગણોપશોભિતઃ

અતિબલબલમ્ આશ્રિતસ્ તવાહં હરિવરવિક્રમવિક્રમૈર્ અનલ્પૈઃ
પવનસુત યથાભિગમ્યતે સા જનકસુતા હનુમંસ્ તથા કુરુષ્વ