રામાયણ · અધ્યાય 4.044

તદ્ ઉગ્રશાસનં ભર્તુર્ વિજ્ઞાય હરિપુંગવાઃ
શલભા ઇવ સંછાદ્ય મેદિનીં સંપ્રતસ્થિરે

રામઃ પ્રસ્રવણે તસ્મિન્ ન્યવસત્ સહલક્ષ્મણઃ
પ્રતીક્ષમાણસ્ તં માસં યઃ સીતાધિગમે કૃતઃ

ઉત્તરાં તુ દિશં રમ્યાં ગિરિરાજસમાવૃતામ્
પ્રતસ્થે સહસા વીરો હરિઃ શતબલિસ્ તદા

પૂર્વાં દિશં પ્રતિ યયૌ વિનતો હરિયૂથપઃ

તારાઙ્ગદાદિ સહિતઃ પ્લવગઃ પવનાત્મજઃ
અગસ્ત્યચરિતામ્ આશાં દક્ષિણાં હરિયૂથપઃ

પશ્ચિમાં તુ દિશં ઘોરાં સુષેણઃ પ્લવગેશ્વરઃ
પ્રતસ્થે હરિશાર્દૂલો ભૃશં વરુણપાલિતામ્

તતઃ સર્વા દિશો રાજા ચોદયિત્વા યથા તથમ્
કપિસેના પતીન્ મુખ્યાન્ મુમોદ સુખિતઃ સુખમ્

એવં સંચોદિતાઃ સર્વે રાજ્ઞા વાનરયૂથપાઃ
સ્વાં સ્વાં દિશમ્ અભિપ્રેત્ય ત્વરિતાઃ સંપ્રતસ્થિરે

નદન્તશ્ ચોન્નદન્તશ્ ચ ગર્જન્તશ્ ચ પ્લવંગમાઃ
ક્ષ્વેલન્તો ધાવમાનાશ્ ચ યયુઃ પ્લવગસત્તમાઃ
આનયિષ્યામહે સીતાં હનિષ્યામશ્ ચ રાવણમ્

અહમ્ એકો હનિષ્યામિ પ્રાપ્તં રાવણમ્ આહવે
તતશ્ ચોન્મથ્ય સહસા હરિષ્યે જનકાત્મજામ્

વેપમાનં શ્રમેણાદ્ય ભવદ્ભિઃ સ્થીયતામ્ ઇતિ
એક એવાહરિષ્યામિ પાતાલાદ્ અપિ જાનકીમ્

વિધમિષ્યામ્ય્ અહં વૃક્ષાન્ દારયિષ્યામ્ય્ અહં ગિરીન્
ધરણીં દારયિષ્યામિ ક્ષોભયિષ્યામિ સાગરાન્

અહં યોજનસંખ્યાયાઃ પ્લવિતા નાત્ર સંશયઃ
શતં યોજનસંખ્યાયાઃ શતં સમધિકં હ્ય્ અહમ્

ભૂતલે સાગરે વાપિ શૈલેષુ ચ વનેષુ ચ
પાતાલસ્યાપિ વા મધ્યે ન મમાચ્છિદ્યતે ગતિઃ

ઇત્ય્ એકૈકં તદા તત્ર વાનરા બલદર્પિતાઃ
ઊચુશ્ ચ વચનં તસ્મિન્ હરિરાજસ્ય સંનિધૌ