રામાયણ · અધ્યાય 1.046

સપ્તધા તુ કૃતે ગર્ભે દિતિઃ પરમદુઃખિતા
સહસ્રાક્ષં દુરાધર્ષં વાક્યં સાનુનયાબ્રવીત્

મમાપરાધાદ્ ગર્ભો ઽયં સપ્તધા વિફલીકૃતઃ
નાપરાધો ઽસ્તિ દેવેશ તવાત્ર બલસૂદન

પ્રિયં તુ કૃતમ્ ઇચ્છામિ મમ ગર્ભવિપર્યયે
મરુતાં સપ્તં સપ્તાનાં સ્થાનપાલા ભવન્ત્વ્ ઇમે

વાતસ્કન્ધા ઇમે સપ્ત ચરન્તુ દિવિ પુત્રકાઃ
મારુતા ઇતિ વિખ્યાતા દિવ્યરૂપા મમાત્મજાઃ

બ્રહ્મલોકં ચરત્વ્ એક ઇન્દ્રલોકં તથાપરઃ
દિવિ વાયુર્ ઇતિ ખ્યાતસ્ તૃતીયો ઽપિ મહાયશાઃ

ચત્વારસ્ તુ સુરશ્રેષ્ઠ દિશો વૈ તવ શાસનાત્
સંચરિષ્યન્તિ ભદ્રં તે દેવભૂતા મમાત્મજાઃ
ત્વત્કૃતેનૈવ નામ્ના ચ મારુતા ઇતિ વિશ્રુતાઃ

તસ્યાસ્ તદ્ વચનં શ્રુત્વા સહસ્રાક્ષઃ પુરંદરઃ
ઉવાચ પ્રાઞ્જલિર્ વાક્યં દિતિં બલનિષૂદનઃ

સર્વમ્ એતદ્ યથોક્તં તે ભવિષ્યતિ ન સંશયઃ
વિચરિષ્યન્તિ ભદ્રં તે દેવભૂતાસ્ તવાત્મજાઃ

એવં તૌ નિશ્ચયં કૃત્વા માતાપુત્રૌ તપોવને
જગ્મતુસ્ ત્રિદિવં રામ કૃતાર્થાવ્ ઇતિ નઃ શ્રુતમ્

એષ દેશઃ સ કાકુત્સ્થ મહેન્દ્રાધ્યુષિતઃ પુરા
દિતિં યત્ર તપઃ સિદ્ધામ્ એવં પરિચચાર સઃ

ઇક્ષ્વાકોસ્ તુ નરવ્યાઘ્ર પુત્રઃ પરમધાર્મિકઃ
અલમ્બુષાયામ્ ઉત્પન્નો વિશાલ ઇતિ વિશ્રુતઃ

તેન ચાસીદ્ ઇહ સ્થાને વિશાલેતિ પુરી કૃતા

વિશાલસ્ય સુતો રામ હેમચન્દ્રો મહાબલઃ
સુચન્દ્ર ઇતિ વિખ્યાતો હેમચન્દ્રાદ્ અનન્તરઃ

સુચન્દ્રતનયો રામ ધૂમ્રાશ્વ ઇતિ વિશ્રુતઃ
ધૂમ્રાશ્વતનયશ્ ચાપિ સૃઞ્જયઃ સમપદ્યત

સૃઞ્જયસ્ય સુતઃ શ્રીમાન્ સહદેવઃ પ્રતાપવાન્
કુશાશ્વઃ સહદેવસ્ય પુત્રઃ પરમધાર્મિકઃ

કુશાશ્વસ્ય મહાતેજાઃ સોમદત્તઃ પ્રતાપવાન્
સોમદત્તસ્ય પુત્રસ્ તુ કાકુત્સ્થ ઇતિ વિશ્રુતઃ

તસ્ય પુત્રો મહાતેજાઃ સંપ્રત્ય્ એષ પુરીમ્ ઇમામ્
આવસત્ય્ અમરપ્રખ્યઃ સુમતિર્ નામ દુર્જયઃ

ઇક્ષ્વાકોસ્ તુ પ્રસાદેન સર્વે વૈશાલિકા નૃપાઃ
દીર્ઘાયુષો મહાત્માનો વીર્યવન્તઃ સુધાર્મિકાઃ

ઇહાદ્ય રજનીં રામ સુખં વત્સ્યામહે વયમ્
શ્વઃ પ્રભાતે નરશ્રેષ્ઠ જનકં દ્રષ્ટુમ્ અર્હસિ

સુમતિસ્ તુ મહાતેજા વિશ્વામિત્રમ્ ઉપાગતમ્
શ્રુત્વા નરવરશ્રેષ્ઠઃ પ્રત્યુદ્ગચ્છન્ મહાયશાઃ

પૂજાં ચ પરમાં કૃત્વા સોપાધ્યાયઃ સબાન્ધવઃ
પ્રાઞ્જલિઃ કુશલં પૃષ્ટ્વા વિશ્વામિત્રમ્ અથાબ્રવીત્

ધન્યો ઽસ્મ્ય્ અનુગૃહીતો ઽસ્મિ યસ્ય મે વિષયં મુને
સંપ્રાપ્તો દર્શનં ચૈવ નાસ્તિ ધન્યતરો મમ