રામાયણ · અધ્યાય 1.045

હતેષુ તેષુ પુત્રેષુ દિતિઃ પરમદુઃખિતા
મારીચં કાશ્યપં રામ ભર્તારમ્ ઇદમ્ અબ્રવીત્

હતપુત્રાસ્મિ ભગવંસ્ તવ પુત્રૈર્ મહાબલૈઃ
શક્રહન્તારમ્ ઇચ્છામિ પુત્રં દીર્ઘતપોઽર્જિતમ્

સાહં તપશ્ ચરિષ્યામિ ગર્ભં મે દાતુમ્ અર્હસિ
ઈદૃશં શક્રહન્તારં ત્વમ્ અનુજ્ઞાતુમ્ અર્હસિ

તસ્યાસ્ તદ્ વચનં શ્રુત્વા મારીચઃ કાશ્યપસ્ તદા
પ્રત્યુવાચ મહાતેજા દિતિં પરમદુઃખિતામ્

એવં ભવતુ ભદ્રં તે શુચિર્ ભવ તપોધને
જનયિષ્યસિ પુત્રં ત્વં શક્ર હન્તારમ્ આહવે

પૂર્ણે વર્ષસહસ્રે તુ શુચિર્ યદિ ભવિષ્યસિ
પુત્રં ત્રૈલોક્ય હન્તારં મત્તસ્ ત્વં જનયિષ્યસિ

એવમ્ ઉક્ત્વા મહાતેજાઃ પાણિના સ મમાર્જ તામ્
સમાલભ્ય તતઃ સ્વસ્તીત્ય્ ઉક્ત્વા સ તપસે યયૌ

ગતે તસ્મિન્ નરશ્રેષ્ઠ દિતિઃ પરમહર્ષિતા
કુશપ્લવનમ્ આસાદ્ય તપસ્ તેપે સુદારુણમ્

તપસ્ તસ્યાં હિ કુર્વત્યાં પરિચર્યાં ચકાર હ
સહસ્રાક્ષો નરશ્રેષ્ઠ પરયા ગુણસંપદા

અગ્નિં કુશાન્ કાષ્ઠમ્ અપઃ ફલં મૂલં તથૈવ ચ
ન્યવેદયત્ સહસ્રાક્ષો યચ્ ચાન્યદ્ અપિ કાઙ્ક્ષિતમ્

ગાત્રસંવાહનૈશ્ ચૈવ શ્રમાપનયનૈસ્ તથા
શક્રઃ સર્વેષુ કાલેષુ દિતિં પરિચચાર હ

અથ વર્ષસહસ્રેતુ દશોને રઘુ નન્દન
દિતિઃ પરમસંપ્રીતા સહસ્રાક્ષમ્ અથાબ્રવીત્

તપશ્ ચરન્ત્યા વર્ષાણિ દશ વીર્યવતાં વર
અવશિષ્ટાનિ ભદ્રં તે ભ્રાતરં દ્રક્ષ્યસે તતઃ

તમ્ અહં ત્વત્કૃતે પુત્ર સમાધાસ્યે જયોત્સુકમ્
ત્રૈલોક્યવિજયં પુત્ર સહ ભોક્ષ્યસિ વિજ્વરઃ

એવમ્ ઉક્ત્વા દિતિઃ શક્રં પ્રાપ્તે મધ્યં દિવાકરે
નિદ્રયાપહૃતા દેવી પાદૌ કૃત્વાથ શીર્ષતઃ

દૃષ્ટ્વા તામ્ અશુચિં શક્રઃ પાદતઃ કૃતમૂર્ધજામ્
શિરઃસ્થાને કૃતૌ પાદૌ જહાસ ચ મુમોદ ચ

તસ્યાઃ શરીરવિવરં વિવેશ ચ પુરંદરઃ
ગર્ભં ચ સપ્તધા રામ બિભેદ પરમાત્મવાન્

બિધ્યમાનસ્ તતો ગર્ભો વજ્રેણ શતપર્વણા
રુરોદ સુસ્વરં રામ તતો દિતિર્ અબુધ્યત

મા રુદો મા રુદશ્ ચેતિ ગર્ભં શક્રો ઽભ્યભાષત
બિભેદ ચ મહાતેજા રુદન્તમ્ અપિ વાસવઃ

ન હન્તવ્યો ન હન્તવ્ય ઇત્ય્ એવં દિતિર્ અબ્રવીત્
નિષ્પપાત તતઃ શક્રો માતુર્ વચનગૌરવાત્

પ્રાઞ્જલિર્ વજ્રસહિતો દિતિં શક્રો ઽભ્યભાષત
અશુચિર્ દેવિ સુપ્તાસિ પાદયોઃ કૃતમૂર્ધજા

તદન્તરમ્ અહં લબ્ધ્વા શક્રહન્તારમ્ આહવે
અભિન્દં સપ્તધા દેવિ તન્ મે ત્વં ક્ષન્તુમ્ અર્હસિ