રાજતરઙ્ગિની · શ્લોક 684-703

શ્રીધેનૌ રાગિણૌ તૌ દ્વૌ મદોદગ્રૌ વૃષાવ્ ઇવ ।
અન્યોઽન્યશૃઙ્ગભઙ્ગાર્થં પ્રાવર્તેતે દ્વિજે મૃતે

કારાયા મોચિતે લદ્દરાજે હંસેન સંયતિ ।
પ્રાણાંસ્ ત્યક્ત્વા ગૌરભટ્ટસ્ સુરસ્ત્રીણાં મુદં વ્યધાત્

ત્યક્ત્વા ગત્યન્તરાભાવાત્ કરિકર્ણવિલોલતામ્ ।
પુંશ્ચલ્યેવ પતિર્ વૃદ્ધો ભેજે હંસસ્ તદા શ્રિયા

બાલો ઽપિ શાહિખાનો ઽસ્ય નોત્સેકં સોઢવાન્ પુનઃ ।
શશીવ તિમિરસ્ફારં ન હિ તેજો વયોઽનુગમ્

ઠક્કુરૈસ્ સહ સમ્મન્ત્ર્ય યુવરાજો ઽથ મન્ત્રવિત્ ।
લદ્દરાજં વિનિઘ્નન્તં હંસભટ્ટં રણે ઽવધીત્

શાહિખાનં પ્રજારાગો નિમ્નં પય ઇવાગમત્ ।
અમન્દચૂતસમ્પત્તૌ કુન્દં નિન્દતિ ષટ્પદઃ

યુવરાજં જયોદગ્રં પરિરબ્ધું સમુત્સુકા ।
રાજ્યશ્રીસ્ સમયાલાભાચ્ ચિન્તાકુલમ્ અવર્તત

સ્નેહાદ્ વિદગ્ધભાવાચ્ ચ પ્રજારાગભરાદ્ અપિ ।
અધિકારભરં રાજા યુવરાજે સમર્પિપત્

મેરકંસારસઞ્જ્ઞસ્ય તુરુષ્કસ્યાથ દુર્મતેઃ ।
દ્વિપસ્યેવ મદાન્ધસ્ય દ્વિષ્ટો ઽભૂત્ તદ્ગુણાઙ્કુશઃ

સુચિરં મલિનૈ રાજ્ઞો માનસં વારિદૈર્ ઇવ ।
પૈશુન્યવર્ષિભિર્ નેતું માલિન્યં ન સ્મ શક્યતે

ભક્તે દક્ષે ઽનુજે સ્નિગ્ધો ભૂભૃદ્ આશ્રિતવત્સલઃ ।
અતિપ્રેરણયા તેષાં રાજ્યે ઽપ્ય્ ઉદ્વિગ્નતામ્ અગાત્

યુવરાજં સેવકાંશ્ ચ રક્ષિતું સ્વાન્ મહીપતિઃ ।
તીર્થાનુસરણાકાઙ્ક્ષી તમ્ ઇત્ય્ એવમ્ અવોચત

"અનર્થિતર્પણં વિત્તં ચિત્તમ્ અધ્યાનદર્પણમ્ ।
અતીર્થસર્પણં દેહં પર્યન્તે શોચ્યતાં વ્રજેત્

દિગ્ગજેષ્વ્ ઇવ યુષ્માસુ ભૂભારં ન્યસ્તવાન્ અહમ્ ।
પુરુષોત્તમસેવાયૈ યતે શેષ ઇવાપરઃ"

શાહિખાનાર્ણવḫ પ્રેમમન્દરાન્દોલિતસ્ તતઃ ।
વાણીં સુધાકરકલામ્ ઈશ્વરાય નવામ્ અદાત્

"અસ્તુ સન્દેહસન્દોહાદ્ દૂરે તીર્થકદર્થના ।
દ્વારં યશસ્સુકૃતયોḫ પ્રજાપાલનમ્ અસ્તુ વઃ

ચિરસ્ય પાલિતાં પિત્ર્યાં હિત્વા નિશ્શરણાં મહીમ્ ।
નૈર્ઘૃણ્યેનૈવ શૂરસ્ ત્વમ્ અશક્ત્યૈવાઙ્ક્યસે ઽખિલૈઃ

દેવસ્ય યદિ તીર્થાર્થમ્ ઉત્કણ્ઠા વર્તતેતરામ્ ।
આરાધકાનામ્ અસ્માકં કિમ્ અન્યત્ કાર્યમ્ ઉચ્યતામ્"

વ્યક્તમ્ ઇત્ય્ ઉક્તવત્ય્ એવ યુવરાજે નરેશ્વરઃ ।
ઈષત્સ્મિતરુચા ચારું પુનર્ વાચમ્ અવોચત

"પ્રજાનુપાલનાત્ પુણ્યં કેવલાત્ કિયદ્ અર્જ્યતે ।
રસાયનાનામ્ અગ્ર્યં યદ્ અનેકરસચર્વણમ્