પઞ્ચસાયક · અધ્યાય 3

ઇતિ શ્રીકવિશેખરજ્યોતીશ્વરવિરચિતે પઞ્ચસાયકે દ્વિતીયઃ સાયકઃ ।
અથ તૃતીયઃ સાયકઃ ।
દેહદૌર્ગન્ધ્યહરણયોગાઃ ।
પ્રાગઙ્ગરાગઃ પુરુષેણ કાર્યઃ સ્રિયા ચ સમ્ભોગસુખાય ગાત્રે ।
તસ્માદહં ગન્ધવિધાનમાદૌ વિલાસિનઃ સર્વમુદીરયામિ

હરીતકીલોધ્રમરિષ્ટપત્રં સપ્તચ્છદો દાડિમકલ્કલં ચ ।
એષો ઽઙ્ગનાયાઃ કથિતઃ કવીન્દ્રૈઃ શરીરદૌર્ગન્ધ્યહરઃ પ્રલેપઃ

હરીતકીચન્દનમુસ્તનાગૈરુશીરલોધ્રામયરાત્રિતુલ્યૈઃ ।
સ્ત્રીપુંસયોર્ઘર્મજગાત્રગન્ધં વિનાશયત્યાશુ વિલેપનં ચ

હરીતઈશ્રીફલમુસ્તયુક્તૈર્બિમ્બીફલૈઃ પૂતકરઞ્જબીજૈઃ ।
કક્ષાદિદૌર્ગન્ધ્યમતિપ્રભૂતં વિનાશયત્યાશુ હઠેન યોગઃ

(સચન્દનોશીરકબિલ્વપત્રૈઃ કોલાક્ષમજ્જાગુરુનાગપુષ્પૈઃ ।
લિપ્ત્વા શરીરં પ્રમદા જવેન ચિરપ્રરૂઢં વિનિહન્તિ ગન્ધમ્

સકેસરોશીરશિરીષલોઘ્રૈશ્ચૂર્ણીકૃતૈરઙ્ગવિલેપનેન ।
ગ્રીષ્મે નરાણાં કદાચિદેવ ઘર્મસ્રુતિઃ સ્યાદિતિ ભોજરાજઃ

મહાપરિમલં તૈલમ્ ।
આદૌ બિલ્વદલં તતો મરુવકં પુષ્પાણ્યશોકસ્ય તુ પ્રત્યાદિત્યમજસ્રમેવ તિલજે તૈલે ઘટે નિઃક્ષિપેત્ ।
કેતક્યાં કુસુમાનિ ચેહ મુહુશઃ શેષે ક્ષિપેદાદરાદ્ ઇત્થં કાર્યમિદં મહાપરિમલં તૈલં નરૈઃ સિદ્ધયે

સ્નાનીયસુગન્ધિનિરૂપણમ્ ।
સ્વર્ણામ્બુદોશીરમિશીયુતાનાં પથ્યાન્વિતાનાં ચ વિલેપનેન ।
સ્નાત્વા નરઃ સૌરભમેવ માસાચ્ચૈકણ્યમાપ્નોતિ શિરોરુહાણામ્

પથ્યારસાલામલકીફલાનાં સજમ્બુજીમૂતદલામયાનામ્ ।
માંસીયુતાનાં પરિલેપનેન સ્નાયાન્નરઃ સૌરભકાન્તિવૃદ્ધ્યૈ

દેહસૌરભ્યકરા યોગાઃ ।
હરીતકીતોયદતુલ્યભાગૌ વનેચરસ્યાપિ ચતુર્થભાગઃ ।
તદર્થભાગઃ કથિતો નખસ્ય સ્યાદેષ ગન્ધો મદનપ્રકાશઃ

એલાશટીપત્રકચન્દનાનિ તોયાભયાચન્દ્રઘનામયાનિ ।
સુસૌરભો ઽયં સુરરાજયોગ્યઃ ખ્યાતઃ સુગન્ધો નરમોહનાર્થઃ

ઐણેયકાશ્મીરઘનામ્બુલોહનિશાકરોશીરસમાનિ પિષ્ટ્વા ।
લેપઃ પ્રિયો ઽયં સુરમાનવાનામુદીરિતઃ પૂર્વકવીન્દ્રવર્યૈઃ

ઉશીરકૃષ્ણાગુરુચન્દનાનિ પત્રામ્બુતુલ્યાનિ સમાનિ પિષ્ટ્વા ।
એતાનિ ગાત્રેષુ વિલાસિનીનાં શ્રીખણ્ડતુલ્યં પ્રથયન્તિ ગન્ધમ્

સર્વોત્તમસુગન્ધયોગાઃ ।
જાતીકર્કટરક્તચન્દનઘનશ્રીવાસશૈલેયકં કસ્તૂરીકનકામતઙ્ગકુસુમૈઃ સ્થૌણેયકૈઃ સંયુતમ્ ।
એતાનીન્દુયુતાનિ પર્ણજરસૈઃ પિષ્ટો ઽઙ્ગરાગઃ શુભઃ કાર્યો ગન્ધકલાકલાપકુશલૈઃ ક્ષોણીન્દ્રયોગ્યઃ સદા

પથ્યા ભાગચતુષ્ટયં જલમુચો ભાગૈકમાત્રં મતં વ્યાધેર્ભાગચતુષ્ટયં ચ શશિનણ સ્થૌણેયભાગદ્વયમ્ ।
ભાગાઃ પઞ્ચ શિલોદ્ભવસ્ય કથિતા ભાગો નખસ્યાપિ ચ કસ્તૂરીદલસઞ્જ્ઞકં નિગદિતં સૌરભ્યવિજ્ઞૈરિદમ્

પથ્યાભાગચતુષ્ટયં જલમુચો ભાગૈકમાત્રં સદા શ્રીખણ્ડાગુરુજાતિકામૃગમદસ્યોક્તાશ્ચ ભાગાસ્ત્રયઃ ।
માંસીપદ્મતુષારવાલકસમૈઃ સમ્યક્તયા પેષિતઃ સર્વૈરેભિરિહોત્તમઃ પ્રકથિતઃ સૌરભ્યગર્ભાભિધઃ

મુખવાસયોગાઃ ।
રસાલજમ્બૂફલગર્ભસારઃ સકર્કટો માક્ષિકસંયુતશ્ચ ।
સ્થિતો મુખાન્તઃ પુરુષસ્ય રાત્રૌ કરોતિ સૌરભ્યસુખં મુખસ્ય

ગુડત્વગેલાનખજાતિકાહ્વૈઃ સ્વર્ણાન્વિતૈઃ ક્ષુદ્રવટી વિધેયા ।
તામ્બૂલગર્ભા દિવસે ચ રાત્રૌ કરોતિ પુંસાં મુખવાસમિષ્ટમ્

યઃ કુષ્ઠચૂર્ણં મધુના ઘૃતેન પીકાક્ષબીજાન્વિતમત્તિ નિત્યમ્ ।
માસૈકમાત્રેણ મુખં તદીયં ગન્ધાયતે કેતકિપુષ્પતુલ્યમ્

વાજીકરણસમુદ્દેશઃ ।
બલેન નારી પરિતોષમેતિ ન હીનવીર્યસ્ય કદા ઽપિ સૌખ્યમ્ ।
અતો બલાર્થં રતિલમ્પટસ્ય બીજાભિવૃદ્ધિં પ્રથમં વિદધ્યાત્

ચૂર્ણં વિદાર્યાઃ સ્વરસેન તસ્યાઃ સુભાવિતં ભાસ્કરરશ્મિજાલૈઃ ।
મધ્વાજ્યસમ્મિશ્રિતમાશુ લીઢ્વા દશ સ્ત્રિયો ગચ્છતિ નિર્વિશઙ્કઃ

ભૂયો વિભાવ્યામલકસ્ય ચૂર્ણં રસેન તસ્યૈવ સિતાજ્યમિશ્રમ્ ।
સક્ષૌદ્રમાલેઢિ નિશામુખે યો નૂનં સ વૃદ્ધસ્તરુણત્વમેતિ

શતાવરીગોક્ષુરવાનરીણાં ગોરક્ષામાતઙ્ગબલાબલાનામ્ ।
ક્ષીરેણ ચૂર્ણાનિ નિપીય રાત્રૌ મથ્નાતિ દર્પં તરુણીજનસ્ય

યો વર્તકીલાવકપિઞ્જલાનાં માંસં તથા વેશ્મવિહઙ્ગમસ્ય ।
ઘૃતેન સિદ્ધં સહ સૈન્ધવેન મહાબલઃ સ્યાદુપભુજ્ય નૂનમ્

શતાવરીગર્ભમિદં સસર્પિઃ પચેત્પયોભિર્દશભાગયુક્તૈઃ ।
સિતોપલાભ્યાં મધુસમ્પ્રયુક્તં નાસ્માદ્દ્વિતીયં ભુવિ દૃષ્ટમન્યત્

સિતપિકતરુબીજં તણ્ડુલાઃ ષષ્ટિકાનાં સઘૃતમધુસમેતં પ્રત્યહં યો ઽવલેઢિ ।
જઠરકુહરમધ્યે યાતિ યાવન્ન પાકં રમયતિ કૃશદેહો ઽપ્યઙ્ગનાનાં સમૂહમ્

માંસીં વિદારીં ચ તથોચ્ચટાં ચ ક્ષીરે ગવાં ક્ષૌદ્રઘૃતોપપન્નામ્ ।
પીત્વા નરઃ શર્કરયા સુયુક્તાં કુલિઙ્ગવદ્ધૃષ્યતિ સર્વરાત્રમ્

લઘુશાલ્મલિમૂલેન તાલમૂલીં સુચૂર્ણિતામ્ ।
સર્પિષા પયસા પીત્વા રતૌ ચટકવદ્ભવેત્

વૃદ્ધશાલ્મલિમૂલસ્ય રસં શર્કરયા પિબેત્ ।
એતત્પ્રયોગાત્સપ્તાહાજ્જાયતે રેતસો ઽમ્બુધિઃ

યોનિગાઢીકરણસમુદ્દેશઃ ।
પ્રૌઢાઙ્ગનાયા નવસૂતિકાયાઃ શ્લથં વરાઙ્ગં ન સુખાય યૂનામ્ ।
તસ્માન્નરૈર્ભેષજતો વિધેયા ગાઢક્રિયા મન્મથમન્દિરસ્ય

નિશાદ્વયં પઙ્કજકેસરં ચ નિષ્પિષ્ય દેવદ્રુતમતુલ્યભાગમ્ ।
અનેન લિપ્તં મદનાતપત્રં પ્રયાતિ સઙ્કોચમલં યુવત્યાઃ

સધાતુકીપુષ્પફલત્રિકેણ જમ્બુત્વચા સારઘસંયુતેન ।
લિપ્ત્વા વરાઙ્ગં મધુકેન તુલ્યં વૃદ્ધા ઽપિ કન્યેવ ભવત્પુરન્ધ્રી

પિકાક્ષબીજેન મનોજગેહં વિલિપ્ય યોષા નિયમં ચરન્તી ।
હઠેન ગાઢં લભતે વરાઙ્ગં દૃષ્ટો નરૈરેષ સદૈવ યોગઃ

યા શક્રગોપં સ્વયમેવ પિષ્ટ્વા વિલિમ્પતિ સ્ત્રી કુસુમેષુવેશ્મ ।
આહ સ્મ તસ્યાઃ કઠિનં ચ ગાઢં ભવેચ્ચ નાત્રાસ્તિ વિકલ્પશઙ્કા

ઇન્દીવરવ્યાધિવચાકણાનાં તુરઙ્ગગન્ધાયુગયામિનીણામ્ ।
લેપેન નાર્યાઃ સ્મરવેશ્મરન્ધ્રં સઙ્કોચયત્યાશુ હઠેન યોગઃ

મદનકઘનસારૈઃ ક્ષૌદ્રતુલ્યૈર્વરાઙ્ગં શિથિલિતમપિ યસ્યાઃ પૂરિતં ભૂય એવ ।
ભવતિ કઠિનમુચ્ચૈઃ કર્કશં કામિનીનામ્ ઇતિ નિગદતિ યોગં રન્તિદેવો નરેન્દ્રઃ

દ્રાવણસમુદ્દેશઃ ।
યદ્યપ્યષ્ટગુણાધિકો નિગદિતઃ કામો ઽઙ્ગનાનાં સદા નો યાતિ દ્રવતાં તથા ઽપિ ઝટિતિ વ્યાયામિનાં સઙ્ગમે ।
તસ્માદ્ભેષજસમ્પ્રયોગવિધિના સઙ્ક્ષેપતો દ્રાવણં કિઞ્ચિત્પલ્લવયામિ પઙ્કજદૃશાં પ્રત્યાયકં કામિનોઃ

સિન્દૂરચિઞ્ચાફલમાક્ષિકાણિ તુલ્યાનિ યસ્યા મદનાતપત્રે ।
ક્ષિપ્તાનિ વૈ સા પુરુષપ્રસઙ્ગાત્પ્રાગેવ રેતઃસ્રુતિમાતનોતિ

ઘોષારજઃ ક્ષૌદ્રસમન્વિતં તુ ક્ષિપ્તં યદીયે સ્મરયન્ત્રગેહે ।
દ્રુતા ભવેત્સા હઠતો હિ નારી દૃષ્ટઃ સદા ઽયં કિલ યોગરાજઃ

અગસ્તિપત્રદ્રવસંયુતેન મધ્વાજ્યસમ્મિશ્રિતટઙ્કણેન ।
લિપ્ત્વા ધ્વજં યો રમતે ઽઙ્ગનાં યાં સા શુક્રમાવર્ષતિ શીઘ્રમેવ

સરોધ્રધત્તૂરકપિપ્પલીનાં ક્ષુદ્રોષણક્ષૌદ્રવિમિશ્રિતાનામ્ ।
લેપેન લિઙ્ગસ્ય કરોતિ રેતઃસ્રુતિં વિપક્ષપ્રમદાજનસ્ય

તુષજલપરિમિશ્રૈર્બીજપૂરસ્ય મૂલૈર્ દિવસકરમયૂખૈર્મર્દિતૈઃ કામવેશ્મ ।
દ્રવતિ ઝટિતિ લિપ્તં ભેષજસ્યાસ્ય યોગાદ્ ઇતિ વદતિ નરેન્દ્રો રન્તિદેવઃ કવીન્દ્રઃ

લિઙ્ગસ્થૂલીકરણસમુદ્દેશઃ ।
સકુષ્ઠમાતઙ્ગબલાબલાનાં વચાશ્વગન્ધાગજપિપ્પલીનામ્ ।
તુરઙ્ગશત્રોર્નવનીતયોગાલ્લેપેન લિઙ્ગં મુશલત્વમેતિ

સરોધ્રકાશીશતુરઙ્ગગન્ધામાતઙ્ગગન્ધાપરિપાચિતેન ।
તૈલેન વૃદ્ધિં ખલુ યાન્તિ શીઘ્રં વરાઙ્ગકર્ણસ્તનમેહનાનિ

અથ ધ્વજદૃઢીકરણસમુદ્દેશઃ ।
હયારિપત્રં નવનીતપિષ્ટં વચાબલાનાગબલામયૈશ્ચ ।
લેપેન લિઙ્ગં સહસૈવ પુંસાં લોહોપમં સ્યાદિતિ દૃષ્ટમેતત્

અથ વીર્યસ્તમ્ભનસમુદ્દેશઃ ।
ક્ષીરેણ બસ્તસ્ય ચ બદ્ધમૂલં લજ્જાલુમૂલં સ્વયમેવ પિષ્ટ્વા ।
યસ્તુ સ્વપાદૌ પરિલિપ્ય શેતે રેતો ન તસ્ય સ્રવતે કદાચિત્

શ્વેતેષુપુઙ્ખાખ્યતરોઃ ફલાનિ ક્ષીરેણ પિષ્ટ્વા વટપાદપસ્ય ।
કરઞ્જબીજોદરમધ્યગાનિ બધ્નન્તિ વીર્યં વદને ધૃતાનિ

શ્વેતેષુપુઙ્ખાચરણં ગૃહીત્વા પુષ્યાર્કયોગે પુરુષસ્ય કટ્યામ્ ।
કુમારિકાકર્તિતસૂત્રકેણ બદ્ધં ન યાત્યાશુ મનોજજીરમ્

આદાય કૃષ્ણેતરકાકજઙ્ઘામૂલં સિતામ્ભોરુહકેશરં ચ ।
ક્ષૌદ્રેન પિષ્ટ્વા પરિલિપ્તનાભેઃ સ્તમ્ભં પ્રયાત્યાશુ નરસ્ય બીજમ્

અથ વશીકરણતિલકસમુદ્દેશઃ ।
મઞ્જિષ્ઠતોયદવચાસિતભાનુમૂલૈઃ સ્વીયાઙ્ગશોણિતયુતૈઃ સમકુષ્ઠકૈશ્ચ ।
કૃત્વા લલાટફલકે તિલકં કૃતજ્ઞો લોકત્રયં વશયતિ ક્ષણમાત્રકેણ

અથ વશીકરણાઞ્જનસમુદ્દેશઃ ।
દેવીમહોત્સવદિને કિલ કજ્જલં યત્ સિદ્ધાર્થકસ્ય સુરસેન નરોત્તમાઙ્ગે ।
નિષ્પાતિતં નરવરેણ નિશિ શ્મશાને તન્નેત્રગં ભુવનમેવ વશં કરોતિ

અથ વશીકરણચૂર્ણસમુદ્દેશઃ ।
કુષ્ઠોત્પલં મધુકરસ્ય ચ પત્રયુગ્મં મૂલં તથા તગરજં સિતકાકજઙ્ઘા ।
યસ્યાઃ શિરોગતમિદં વિહિતં તુ ચૂર્ણં દાસીભવેજ્ઝટિતિ સા તરુણી ન ચિત્રમ્

અથ વશીકરણલેપનસમુદ્દેશઃ ।
સવ્યેન પાણિકમલેન રતાવસાને યો રેતસા નિજભવેન વિલાસદક્ષઃ ।
વામં વિલિમ્પતિ પદં સહસૈવ યસ્યાસ્ તસ્યૈવ સા ભવતિ નાત્ર વિકલ્પભાવઃ

સમ્ભોગશેષસમયે નિજકાન્તમેઢ્રં યા કામિની સ્પૃશતિ વામપદામ્બુજેન ।
તસ્યાઃ પતિઃ સપદિ વિન્દતિ દાસભાવં ગોણીસુતેન કથિતઃ કિલ યાગરાજઃ

સિન્ધૂત્થમાક્ષિકકપોતમલાનિ પિષ્ટ્વા લિઙ્ગં વિલિપ્ય તરુણીં રમતે નરો યઃ ।
સા ઽન્યં પ્રયાતિ પુરુષં ન કદા ઽપિ કામં દાસીભવેદતિમનોહરદિવ્યમૂર્તિઃ

ભલ્લૂકમેઢ્રઘનસારમધૂનિ પિષ્ટ્વા લિપ્તધ્વજો નિધુવનં વિદધીત યસ્યાઃ ।
સા ઽ ઽહ્લાદિની કુસુમસાયકસન્નતાઙ્ગી વશ્યા ભવેચ્ચિરતરં ન હિ સંશયો ઽત્ર

ગોરોચનાશિશિરદીધિતિશમ્ભુબીજકાશ્મીરચન્દનયુતૈઃ કનકદ્રવેણ ।
લિપ્તધ્વજઃ પરિરમત્યબલાં નરો યસ્ તસ્યાઃ સ એવ હૃદયે મુકુટત્વમેતિ

અથ વશીકરણધૂપસમુદ્દેશઃ ।
શૃઙ્ગીવચાયુવતિસર્જરસં સમાનં કૃત્વા ત્રુટિં મલયજં ચ ષડેવ મિશ્રમ્ ।
યો ધૂપયેન્નિજગૃહં વસનં શરીરં તસ્યાપિ દાસ ઇવ મોહમુપૈતિ લોકઃ

અથ વશીકરણમન્ત્રસમુદ્દેશઃ ।
મદમદપદમાદૌ માદયેતિ દ્વિવારં તદનુ ચ લિખનીયં સૌખ્યદં હ્રીં ચ તસ્માત્ ।
અથ ચ પદમુપાન્તે નામરૂપાદિસઞ્જ્ઞો ભવતિ મદનમન્ત્રઃ સ્વાહયા સંયુતો ઽયમ્

ઽઓં મદ મદ માદય માદય હ્રીં અમુકીં વશમાનય સ્વાહાઽ
શતશતપરિજાપાત્ સ્યાદયં સિદ્ધિદાતા દશદશકુસુમાનાં લોહિતાનાં ચ હોમાત્ ।
ઇહ તુ સકલકાર્યં વામહસ્તેન કાર્યમ્ ઉપદિશતિ સમાસાજ્જ્યોતિરીશઃ સ્વરૂપમ્

અસ્ય મન્ત્રસ્ય દશસહસ્ત્રસઙ્ખ્યાકોન્મિતો જપઃ, રક્તવર્ણૈઃ પ્રસૂનૈર્મધુના ઘૃતેન ચ હોમઃ કરણીયઃ । સર્વં વામહસ્તેન કર્તવ્યમ્ । અથ ધ્યાનમ્
કનકરુચિરમૂર્તિઃ કુણ્ડલાકૃષ્ટચાપો યુવતિહૃદયમધ્યે નિશ્ચલારોપિતાક્ષઃ ।
ઇતિ મનસિ મનોજં ધ્યાયયેદ્યો જપસ્થો વશયતિ સ સમસ્તં ભૂતલં મન્ત્રશક્ત્યા

અથ ચામુણ્ડમન્ત્રઃ ।
ચામુણ્ડે પ્રથમં જયેતિ કથિતં સમ્બોધનં મોહય જ્ઞાતવ્યં વશમાનયેતિ ચ પદં સાધ્યં દ્વિતીયાયુતમ્ ।
સ્વાહાન્તઃ પ્રણવાદિરેષ પ્રથિતસ્તન્ત્રે મહામોહનઃ સન્મન્ત્રઃ કવિશેખરેણ કથિતો નાસ્માદ્દ્વિતીયો ભુવિ

ઽઓં ચામુણ્ડે જય ચામુણ્ડે મોહય અમુકીં વશમાનય સ્વાહાઽ ઇતિ મન્ત્રઃ । અસ્ય મન્ત્રસ્ય જપ એકલક્ષમિતઃ, પલાશકુસુમૈર્હોમઃ દશાંશં, સર્વં વામહસ્તેન કર્તવ્યમ્ । અથ ચામુણ્ડાયા ધ્યાનમ્-
દંષ્ટ્રાકોટિવિસઙ્કટા સુવદના સાન્દ્રાન્ધકારે સ્થિતા ખટ્વાઙ્ગાસિનિગૂઢદક્ષિણકરા વામે સપાશં શિરઃ ।
શ્યામા પિઙ્ગલમૂર્ધજા ભયકરી શાર્દૂલચર્મામ્બરા ચામુણ્ડા શવવાહિની જપવિધૌ ધ્યેયા સદા સાધકૈઃ

અથ વિશ્વેશ્વરીમન્ત્રઃ ।
ઓઙ્કારઃ પ્રથમં નમો નમ ઇતિ પ્રોક્તં ચ તસ્માત્પદં ચામુણ્ડે પરિકીર્તિતં હિલિ હિલિ જ્ઞેયા ચ સઞ્જ્ઞા તતઃ ।
જ્ઞાતવ્યં તુ સમાનયેતિ ચ પદં સન્મન્ત્રિણાં સમ્મતો મન્ત્રો ઽયં કવિશેખરેણ કથિતઃ ખ્યાતઃ સદા સિદ્ધિદઃ

ઽઓં નમો નમશ્ચામુણ્ડે હિલી હિલિ અમુકીં વશમાનય સ્વાહાઽ
અસ્ય મન્ત્રસ્ય જપ એકલક્ષપરિમિતઃ, તદ્દશાંશઃ પલાશકુસુમૈર્હોમઃ કરણીયઃ, સર્વં વામહસ્તેન કર્તવ્યમ્ ॥
અથવિશ્વેશ્વરીધ્યાનમ્ ।
વજ્રાસક્તશરાસના ત્રિનયના સવ્યેતરેણાઙ્કુશં વામેનાપિ કરેણ પાશમુરસિ ન્યસ્તોત્તમાઙ્ગસ્રજા ।
વ્યામુક્તોરુકચા કરાલવદના વહ્નિપ્રભા મધ્યગા ધ્યેયા જાપવિધૌ નરૈરિતિ સદા વિશ્વેશ્વરી સિદ્ધયે

અથ પદ્મિનીવશીકરણમન્ત્રઃ ।
ઽઓં કામેશ્વર ! મોહય સ્વાહાઽ ઇતિ મન્ત્રઃ । અનેન મન્ત્રેણ મધુમિશ્રિતજાતિકુસુમસહિતં તામ્બૂલમાદિત્યદિને સહસ્રવારમભિમન્ત્રિતં પદ્મિન્યૈ દાતવ્યમ્ । પદ્મિની વશ્યા ભવતિ ॥
અથ ચિત્રિણીવશીકરણમન્ત્રઃ ।
ઽઓં પચ પચ ઓં વિહઙ્ગમ વિહઙ્ગમ ઓં કામદેવાય સ્વાહાઽ ઇતિ મન્ત્રઃ । અનેન મન્ત્રેણ રમ્ભામૂલજલભાવિતજાતીફલમિલિતતામ્બૂલમાદિત્યદિને પઞ્ચશતવારમભિમન્ત્રિતં ચિત્રિણ્યૈ દાતવ્યમ્ । ચિત્રિણી વશ્યા ભવતિ ॥
અથ શઙ્ખિનીવશીકરણમન્ત્રઃ ।
ઽઓં હર હર ઓં પચ પચ કામદેવાય સ્વાહાઽ ઇતિ મન્ત્રઃ । અનેન મન્ત્રેણ તરગમૂલં શ્રીફલઞ્ચાદિત્યવારે અષ્ટોત્તરશતવારમભિમન્ત્રિતં શઙ્ખિન્યૈ દાતવ્યમ્ । સા વશ્યા ભવતિ ॥
અથ હસ્તિનીવશીકરણમન્ત્રઃ ।
ઽઓં ચિરિ ચિરિ વશં કુરુ કામદેવાય સ્વાહાઽ ઇતિ મન્ત્રઃ । અનેન મન્ત્રેણ આદિત્યદિને ક્ષૌદ્રાક્તૌ કપોતભ્રમરપક્ષૌ તામ્બૂલદલે વિન્યસ્ય અષ્ટોત્તરશતમભિમન્ત્રિતં કૃત્વા હસ્તિન્યૈ દેયમ્ । હસ્તિની વશ્યા ભવતિ ॥
અથ અનિચ્છાહરણોપાયનિરૂપણમ્ ।
ક્ષીરોદનં દ્વિજવરાય પુરા પ્રદદ્યાત્ પુષ્યોદ્ધૃતં સિતબલાચરણં કુમાર્યા ।
પિષ્ટં પ્રદત્તમિતિ વૈરકૃતામનિચ્છાં નિઃસારયેદિહ મુહુર્વિદિતપ્રભાવઃ

અથ સ્તનોત્થાપનસમુદ્દેશઃ ।
માતઙ્ગકૃષ્ણામયવાજિગન્ધા વચાયુતાઃ પર્યુષિતામ્બુમિશ્રાઃ ।
હયારિપત્રીનવનીતયોગાત્ કુર્વન્તિ પીનં કુચકુમ્ભયુગ્મમ્

વસા ભુજઙ્ગસ્ય હયારિપત્રં કોલસ્ય મેદઃ સમભાગયુક્તાઃ ।
વક્ષોજકુમ્ભં મદિરાયતાક્ષ્યાઃ કુર્વન્તિ પીનં સકલં હઠેન

તૈલં હઠાદ્દાડિમકલ્કસિદ્ધં સિદ્ધાર્થજં લેપનતો નિતાન્તમ્ ।
નારીસ્તનૌ ચારુતરૌ સુપીનૌ કુર્યાદસૌ યોગવરઃ સદૈવ

શ્રીપર્ણિકાયા રસકલ્કસિદ્ધં તિલોદ્ભવં તૈલવરં પ્રદિષ્ટમ્ ।
પ્લોતેન વક્ષોજયુગે પ્રદેયં પ્રયાતિ વૃદ્ધિં પતિતો ઽપિ નાર્યાઃ

યોનિસંસ્કારસમુદ્દેશઃ ।
પ્રક્ષાલયેન્નિમ્બકષાયનીરૈર્નિશાજ્યકૃષ્ણાગુરુગુગ્ગુલૂનામ્ ।
ધૂપેન યોનિં નિશિ ધૂપયિત્વા નારી પ્રમોદં વિદધાતિ ભર્તુઃ

જાતીપ્રસૂનૈઃ સિતસર્ષપસ્ય તૈલં પચેલ્લઘ્વનલે પ્રકામમ્ ।
અભ્યઙ્ગયોગેન સદૈવ યોનૌ સૌભાગ્યમાપ્નોતિ રતે પુરન્ધ્રી

અથ રોમશાતનસમુદ્દેશઃ ।
ભુજઙ્ગચૂર્ણં કટુતૈલમધ્યે સપ્તાહમાદિત્યકરે નિધેયમ્ ।
તત્તૈલયોગેન વિલાસિનીનાં નશ્યન્તિ રોમાણિ સમૂલમેવ

પલાશભસ્માન્વિતતાલચૂર્ણૈઃ રમ્ભામ્બુમિશ્રૈરુપલિપ્ય ભૂયઃ ।
કન્દર્પગેહે મૃગલોચનાનાં રોમાણિ રોહન્તિ કદાપિ નૈવ

રમ્ભાજલે સપ્તદિનં વિભાવ્ય ભસ્મેહ કમ્બોર્મસૃણં ચ પશ્ચાત્ ।
તાલેન યુક્તં ચ વિલેપનેન રોમાણિ નિર્મૂલયતિ ક્ષણેન

અથ પુષ્પજનનસમુદ્દેશઃ ।
જ્યોતિષ્મતીકોમલપત્રમગ્નૌ ભૃષ્ટં જપાયાઃ કુસુમેન પિષ્ટમ્ ।
ગૃહામ્બુના પીતમિદં યુવત્યા કરોતિ પુષ્પં સ્મરમન્દિરસ્ય

અથ ગર્ભસાધારણસમુદ્દેશઃ ।
તુરઙ્ગગન્ધાશ્રુતવારિસિદ્ધમાજં પયઃ સ્નાનદિને નિપીય ।
પ્રાપ્નોતિ ગર્ભં નિયમં ચરન્તી વન્ધ્યા ઽપિ નૂનં પુરુષપ્રસઙ્ગાત્

પુષ્યોદ્ધૃતં લાક્ષ્મણમેવ મૂલં ભર્ત્રા નિપિષ્ટં સઘૃતં ચ પીતમ્ ।
ક્ષીરૌદનં પ્રાશ્ય પતિપ્રસઙ્ગાદ્ગર્ભં વિધત્તે તરુણી ન ચિત્રમ્

યા બીજપૂરદ્રુમમૂલમેકં ક્ષીરેણ સિદ્ધં હવિષા વિમિશ્રમ્ ।
ઋતૌ નિપીય સ્વપતિં પ્રયાતિ દીર્ઘાયુષં સા તનયં પ્રસૂતે

અથ ગર્ભસંસ્થાપનસમુદ્દેશઃ ।
કશેરુશૃઙ્ગાટકજીવનાખ્યપયોધરૈરણ્ડશતાવરીભિઃ ।
સિદ્ધં પયઃ શર્કરયા વિમિશ્રં સંસ્થાપયેદ્ગર્ભમુદીર્ણશૂલમ્

અથ સુખપ્રસવસમુદ્દેશઃ । અથ સુખપ્રસવમન્ત્રઃ -
ઓં ઇહામૃતઞ્ચ સોમશ્ચ ચિત્રભાનુશ્ચ ભામિનિ ।
ઉચ્ચૈઃશ્રવા તુરઙ્ગાણાં મન્દિરે નિવસન્તુ તે

ઓં ઇદમમમૃતમપાં સમુદ્ધૃતં વૈ તવ લઘુ ગર્ભમિમં વિમુઞ્ચતુ સ્ત્રિ ।
તદનલપવનાર્કવાસરાસ્તે સહ લવણામ્બુધરૈર્દિશન્તુ શાન્તિમ્

ઓં મુક્તાઃ પાશા વિપાશાશ્ચ મુક્તાઃ સૂર્યેણ રશ્મયઃ ।
મુક્તઃ સર્વભયાદ્ગર્ભ એહ્યેહિ મા ચિર સ્વાહા

એભિર્જલં ચ્યાવનમન્ત્રરાજૈર્જપ્ત્વા પ્રદેયં કિલ ગર્ભવત્યૈ ।
સદ્યઃ પ્રસૂતે નવમૂઢગર્ભા યોગો ઽયમાત્રેયમુનિપ્રદિષ્ટઃ

એભિર્મન્ત્રૈઃ સપ્તવારમભિમન્ત્રિતં જલં ગર્ભવત્યૈ પાતું દાતવ્યમ્ ।
"ઓં મન્મથ મન્મથ મન્મથવાહિનિ ! લમ્બોદરં મુઞ્ચ મુઞ્ચ લઘુ સ્વાહા" ઇતિ મન્ત્રઃ । અનેન મન્ત્રેણ સપ્તવારમભિમન્ત્રિતં જલં ગર્ભવત્યૈ પાતું દાતવ્યમ્ । સુખાત્ પ્રસવો ભવતિ ॥
અથ વન્ધ્યાકરણસમુદ્દેશઃ ।
પલાશક્ષીરિદ્રુમયોઃ ફલાનિ પુષ્પાણ્યથો શાલ્મલિપાદપસ્ય ।
મદ્યેન માસાર્ધદિનં નિપીય વન્ધ્યા ભવેન્નિશ્ચિતમેવ નારી

ફલં કદમ્બસ્ય ચ માક્ષિકં હિ તુષોદકેન ત્રિદિનં નિપીય ।
સ્નાનાવસાને નિયમેન ચાપિ વન્ધ્યામવશ્યં કુરુતે હઠેન

કર્ષદ્વયં રાક્ષસવૃક્ષબીજં સપ્તાહમાત્રં સિતશાલિવારા ।
ઋતૌ નિપીતં મૃગશાવકાક્ષ્યા વન્ધ્યાત્વમેતન્નિયતં કરોતિ

અથ કેશસંસ્કારસમુદ્દેશઃ ।
તિલપ્રસૂનં સહ ગોક્ષુરેણ સસારઘં ગવ્યઘૃતેન પિષ્ટમ્ ।
સપ્તાહમાત્રેણ શિરઃપ્રલેપાદ્ભવન્તિ દીર્ઘાઃ પ્રચુરાશ્ચ કેશાઃ

કર્ષાર્ધમાત્રં પ્રસવં ફલેન નિમ્બસ્ય તૈલં નિયમેન પીતમ્ ।
ક્રમેણ કુન્દેન્દુતુષારગૌરં શિરોરુહં મેચકતામુપૈતિ

અથ ઇન્દ્રલુપ્તસમુદ્દેશઃ ।
ગુઞ્જાફલૈઃ ક્ષૌદ્રયુતૈર્વિલિપ્ય કેશપ્રદેશે સકલેન્દ્રલુપ્તમ્ ।
અનેન યોગેન સદૈવ કેશા રોહન્તિ કૃષ્ણાઃ કુટિલા વિશાલાઃ