Pañcasāyaka · Chapter 3

iti śrīkaviśekharajyotīśvaraviracite pañcasāyake dvitīyaḥ sāyakaḥ /
atha tṛtīyaḥ sāyakaḥ /
dehadaurgandhyaharaṇayogāḥ /
prāgaṅgarāgaḥ puruṣeṇa kāryaḥ sriyā ca sambhogasukhāya gātre /
tasmādahaṃ gandhavidhānamādau vilāsinaḥ sarvamudīrayāmi

harītakīlodhramariṣṭapatraṃ saptacchado dāḍimakalkalaṃ ca /
eṣo 'ṅganāyāḥ kathitaḥ kavīndraiḥ śarīradaurgandhyaharaḥ pralepaḥ

harītakīcandanamustanāgairuśīralodhrāmayarātritulyaiḥ /
strīpuṃsayorgharmajagātragandhaṃ vināśayatyāśu vilepanaṃ ca

harītaīśrīphalamustayuktairbimbīphalaiḥ pūtakarañjabījaiḥ /
kakṣādidaurgandhyamatiprabhūtaṃ vināśayatyāśu haṭhena yogaḥ

(sacandanośīrakabilvapatraiḥ kolākṣamajjāgurunāgapuṣpaiḥ /
liptvā śarīraṃ pramadā javena ciraprarūḍhaṃ vinihanti gandham

sakesarośīraśirīṣaloghraiścūrṇīkṛtairaṅgavilepanena /
grīṣme narāṇāṃ kadācideva gharmasrutiḥ syāditi bhojarājaḥ

mahāparimalaṃ tailam /
ādau bilvadalaṃ tato maruvakaṃ puṣpāṇyaśokasya tu pratyādityamajasrameva tilaje taile ghaṭe niḥkṣipet /
ketakyāṃ kusumāni ceha muhuśaḥ śeṣe kṣipedādarād itthaṃ kāryamidaṃ mahāparimalaṃ tailaṃ naraiḥ siddhaye

snānīyasugandhinirūpaṇam /
svarṇāmbudośīramiśīyutānāṃ pathyānvitānāṃ ca vilepanena /
snātvā naraḥ saurabhameva māsāccaikaṇyamāpnoti śiroruhāṇām

pathyārasālāmalakīphalānāṃ sajambujīmūtadalāmayānām /
māṃsīyutānāṃ parilepanena snāyānnaraḥ saurabhakāntivṛddhyai

dehasaurabhyakarā yogāḥ /
harītakītoyadatulyabhāgau vanecarasyāpi caturthabhāgaḥ /
tadarthabhāgaḥ kathito nakhasya syādeṣa gandho madanaprakāśaḥ

elāśaṭīpatrakacandanāni toyābhayācandraghanāmayāni /
susaurabho 'yaṃ surarājayogyaḥ khyātaḥ sugandho naramohanārthaḥ

aiṇeyakāśmīraghanāmbulohaniśākarośīrasamāni piṣṭvā /
lepaḥ priyo 'yaṃ suramānavānāmudīritaḥ pūrvakavīndravaryaiḥ

uśīrakṛṣṇāgurucandanāni patrāmbutulyāni samāni piṣṭvā /
etāni gātreṣu vilāsinīnāṃ śrīkhaṇḍatulyaṃ prathayanti gandham

sarvottamasugandhayogāḥ /
jātīkarkaṭaraktacandanaghanaśrīvāsaśaileyakaṃ kastūrīkanakāmataṅgakusumaiḥ sthauṇeyakaiḥ saṃyutam /
etānīnduyutāni parṇajarasaiḥ piṣṭo 'ṅgarāgaḥ śubhaḥ kāryo gandhakalākalāpakuśalaiḥ kṣoṇīndrayogyaḥ sadā

pathyā bhāgacatuṣṭayaṃ jalamuco bhāgaikamātraṃ mataṃ vyādherbhāgacatuṣṭayaṃ ca śaśinaṇa sthauṇeyabhāgadvayam /
bhāgāḥ pañca śilodbhavasya kathitā bhāgo nakhasyāpi ca kastūrīdalasañjñakaṃ nigaditaṃ saurabhyavijñairidam

pathyābhāgacatuṣṭayaṃ jalamuco bhāgaikamātraṃ sadā śrīkhaṇḍāgurujātikāmṛgamadasyoktāśca bhāgāstrayaḥ /
māṃsīpadmatuṣāravālakasamaiḥ samyaktayā peṣitaḥ sarvairebhirihottamaḥ prakathitaḥ saurabhyagarbhābhidhaḥ

mukhavāsayogāḥ /
rasālajambūphalagarbhasāraḥ sakarkaṭo mākṣikasaṃyutaśca /
sthito mukhāntaḥ puruṣasya rātrau karoti saurabhyasukhaṃ mukhasya

guḍatvagelānakhajātikāhvaiḥ svarṇānvitaiḥ kṣudravaṭī vidheyā /
tāmbūlagarbhā divase ca rātrau karoti puṃsāṃ mukhavāsamiṣṭam

yaḥ kuṣṭhacūrṇaṃ madhunā ghṛtena pīkākṣabījānvitamatti nityam /
māsaikamātreṇa mukhaṃ tadīyaṃ gandhāyate ketakipuṣpatulyam

vājīkaraṇasamuddeśaḥ /
balena nārī paritoṣameti na hīnavīryasya kadā 'pi saukhyam /
ato balārthaṃ ratilampaṭasya bījābhivṛddhiṃ prathamaṃ vidadhyāt

cūrṇaṃ vidāryāḥ svarasena tasyāḥ subhāvitaṃ bhāskararaśmijālaiḥ /
madhvājyasammiśritamāśu līḍhvā daśa striyo gacchati nirviśaṅkaḥ

bhūyo vibhāvyāmalakasya cūrṇaṃ rasena tasyaiva sitājyamiśram /
sakṣaudramāleḍhi niśāmukhe yo nūnaṃ sa vṛddhastaruṇatvameti

śatāvarīgokṣuravānarīṇāṃ gorakṣāmātaṅgabalābalānām /
kṣīreṇa cūrṇāni nipīya rātrau mathnāti darpaṃ taruṇījanasya

yo vartakīlāvakapiñjalānāṃ māṃsaṃ tathā veśmavihaṅgamasya /
ghṛtena siddhaṃ saha saindhavena mahābalaḥ syādupabhujya nūnam

śatāvarīgarbhamidaṃ sasarpiḥ pacetpayobhirdaśabhāgayuktaiḥ /
sitopalābhyāṃ madhusamprayuktaṃ nāsmāddvitīyaṃ bhuvi dṛṣṭamanyat

sitapikatarubījaṃ taṇḍulāḥ ṣaṣṭikānāṃ saghṛtamadhusametaṃ pratyahaṃ yo 'valeḍhi /
jaṭharakuharamadhye yāti yāvanna pākaṃ ramayati kṛśadeho 'pyaṅganānāṃ samūham

māṃsīṃ vidārīṃ ca tathoccaṭāṃ ca kṣīre gavāṃ kṣaudraghṛtopapannām /
pītvā naraḥ śarkarayā suyuktāṃ kuliṅgavaddhṛṣyati sarvarātram

laghuśālmalimūlena tālamūlīṃ sucūrṇitām /
sarpiṣā payasā pītvā ratau caṭakavadbhavet

vṛddhaśālmalimūlasya rasaṃ śarkarayā pibet /
etatprayogātsaptāhājjāyate retaso 'mbudhiḥ

yonigāḍhīkaraṇasamuddeśaḥ /
prauḍhāṅganāyā navasūtikāyāḥ ślathaṃ varāṅgaṃ na sukhāya yūnām /
tasmānnarairbheṣajato vidheyā gāḍhakriyā manmathamandirasya

niśādvayaṃ paṅkajakesaraṃ ca niṣpiṣya devadrutamatulyabhāgam /
anena liptaṃ madanātapatraṃ prayāti saṅkocamalaṃ yuvatyāḥ

sadhātukīpuṣpaphalatrikeṇa jambutvacā sāraghasaṃyutena /
liptvā varāṅgaṃ madhukena tulyaṃ vṛddhā 'pi kanyeva bhavatpurandhrī

pikākṣabījena manojagehaṃ vilipya yoṣā niyamaṃ carantī /
haṭhena gāḍhaṃ labhate varāṅgaṃ dṛṣṭo naraireṣa sadaiva yogaḥ

yā śakragopaṃ svayameva piṣṭvā vilimpati strī kusumeṣuveśma /
āha sma tasyāḥ kaṭhinaṃ ca gāḍhaṃ bhavecca nātrāsti vikalpaśaṅkā

indīvaravyādhivacākaṇānāṃ turaṅgagandhāyugayāminīṇām /
lepena nāryāḥ smaraveśmarandhraṃ saṅkocayatyāśu haṭhena yogaḥ

madanakaghanasāraiḥ kṣaudratulyairvarāṅgaṃ śithilitamapi yasyāḥ pūritaṃ bhūya eva /
bhavati kaṭhinamuccaiḥ karkaśaṃ kāminīnām iti nigadati yogaṃ rantidevo narendraḥ

drāvaṇasamuddeśaḥ /
yadyapyaṣṭaguṇādhiko nigaditaḥ kāmo 'ṅganānāṃ sadā no yāti dravatāṃ tathā 'pi jhaṭiti vyāyāmināṃ saṅgame /
tasmādbheṣajasamprayogavidhinā saṅkṣepato drāvaṇaṃ kiñcitpallavayāmi paṅkajadṛśāṃ pratyāyakaṃ kāminoḥ

sindūraciñcāphalamākṣikāṇi tulyāni yasyā madanātapatre /
kṣiptāni vai sā puruṣaprasaṅgātprāgeva retaḥsrutimātanoti

ghoṣārajaḥ kṣaudrasamanvitaṃ tu kṣiptaṃ yadīye smarayantragehe /
drutā bhavetsā haṭhato hi nārī dṛṣṭaḥ sadā 'yaṃ kila yogarājaḥ

agastipatradravasaṃyutena madhvājyasammiśritaṭaṅkaṇena /
liptvā dhvajaṃ yo ramate 'ṅganāṃ yāṃ sā śukramāvarṣati śīghrameva

sarodhradhattūrakapippalīnāṃ kṣudroṣaṇakṣaudravimiśritānām /
lepena liṅgasya karoti retaḥsrutiṃ vipakṣapramadājanasya

tuṣajalaparimiśrairbījapūrasya mūlair divasakaramayūkhairmarditaiḥ kāmaveśma /
dravati jhaṭiti liptaṃ bheṣajasyāsya yogād iti vadati narendro rantidevaḥ kavīndraḥ

liṅgasthūlīkaraṇasamuddeśaḥ /
sakuṣṭhamātaṅgabalābalānāṃ vacāśvagandhāgajapippalīnām /
turaṅgaśatrornavanītayogāllepena liṅgaṃ muśalatvameti

sarodhrakāśīśaturaṅgagandhāmātaṅgagandhāparipācitena /
tailena vṛddhiṃ khalu yānti śīghraṃ varāṅgakarṇastanamehanāni

atha dhvajadṛḍhīkaraṇasamuddeśaḥ /
hayāripatraṃ navanītapiṣṭaṃ vacābalānāgabalāmayaiśca /
lepena liṅgaṃ sahasaiva puṃsāṃ lohopamaṃ syāditi dṛṣṭametat

atha vīryastambhanasamuddeśaḥ /
kṣīreṇa bastasya ca baddhamūlaṃ lajjālumūlaṃ svayameva piṣṭvā /
yastu svapādau parilipya śete reto na tasya sravate kadācit

śveteṣupuṅkhākhyataroḥ phalāni kṣīreṇa piṣṭvā vaṭapādapasya /
karañjabījodaramadhyagāni badhnanti vīryaṃ vadane dhṛtāni

śveteṣupuṅkhācaraṇaṃ gṛhītvā puṣyārkayoge puruṣasya kaṭyām /
kumārikākartitasūtrakeṇa baddhaṃ na yātyāśu manojajīram

ādāya kṛṣṇetarakākajaṅghāmūlaṃ sitāmbhoruhakeśaraṃ ca /
kṣaudrena piṣṭvā pariliptanābheḥ stambhaṃ prayātyāśu narasya bījam

atha vaśīkaraṇatilakasamuddeśaḥ /
mañjiṣṭhatoyadavacāsitabhānumūlaiḥ svīyāṅgaśoṇitayutaiḥ samakuṣṭhakaiśca /
kṛtvā lalāṭaphalake tilakaṃ kṛtajño lokatrayaṃ vaśayati kṣaṇamātrakeṇa

atha vaśīkaraṇāñjanasamuddeśaḥ /
devīmahotsavadine kila kajjalaṃ yat siddhārthakasya surasena narottamāṅge /
niṣpātitaṃ naravareṇa niśi śmaśāne tannetragaṃ bhuvanameva vaśaṃ karoti

atha vaśīkaraṇacūrṇasamuddeśaḥ /
kuṣṭhotpalaṃ madhukarasya ca patrayugmaṃ mūlaṃ tathā tagarajaṃ sitakākajaṅghā /
yasyāḥ śirogatamidaṃ vihitaṃ tu cūrṇaṃ dāsībhavejjhaṭiti sā taruṇī na citram

atha vaśīkaraṇalepanasamuddeśaḥ /
savyena pāṇikamalena ratāvasāne yo retasā nijabhavena vilāsadakṣaḥ /
vāmaṃ vilimpati padaṃ sahasaiva yasyās tasyaiva sā bhavati nātra vikalpabhāvaḥ

sambhogaśeṣasamaye nijakāntameḍhraṃ yā kāminī spṛśati vāmapadāmbujena /
tasyāḥ patiḥ sapadi vindati dāsabhāvaṃ goṇīsutena kathitaḥ kila yāgarājaḥ

sindhūtthamākṣikakapotamalāni piṣṭvā liṅgaṃ vilipya taruṇīṃ ramate naro yaḥ /
sā 'nyaṃ prayāti puruṣaṃ na kadā 'pi kāmaṃ dāsībhavedatimanoharadivyamūrtiḥ

bhallūkameḍhraghanasāramadhūni piṣṭvā liptadhvajo nidhuvanaṃ vidadhīta yasyāḥ /
sā ' 'hlādinī kusumasāyakasannatāṅgī vaśyā bhaveccirataraṃ na hi saṃśayo 'tra

gorocanāśiśiradīdhitiśambhubījakāśmīracandanayutaiḥ kanakadraveṇa /
liptadhvajaḥ pariramatyabalāṃ naro yas tasyāḥ sa eva hṛdaye mukuṭatvameti

atha vaśīkaraṇadhūpasamuddeśaḥ /
śṛṅgīvacāyuvatisarjarasaṃ samānaṃ kṛtvā truṭiṃ malayajaṃ ca ṣaḍeva miśram /
yo dhūpayennijagṛhaṃ vasanaṃ śarīraṃ tasyāpi dāsa iva mohamupaiti lokaḥ

atha vaśīkaraṇamantrasamuddeśaḥ /
madamadapadamādau mādayeti dvivāraṃ tadanu ca likhanīyaṃ saukhyadaṃ hrīṃ ca tasmāt /
atha ca padamupānte nāmarūpādisañjño bhavati madanamantraḥ svāhayā saṃyuto 'yam

'oṃ mada mada mādaya mādaya hrīṃ amukīṃ vaśamānaya svāhā'
śataśataparijāpāt syādayaṃ siddhidātā daśadaśakusumānāṃ lohitānāṃ ca homāt /
iha tu sakalakāryaṃ vāmahastena kāryam upadiśati samāsājjyotirīśaḥ svarūpam

asya mantrasya daśasahastrasaṅkhyākonmito japaḥ, raktavarṇaiḥ prasūnairmadhunā ghṛtena ca homaḥ karaṇīyaḥ / sarvaṃ vāmahastena kartavyam / atha dhyānam
kanakaruciramūrtiḥ kuṇḍalākṛṣṭacāpo yuvatihṛdayamadhye niścalāropitākṣaḥ /
iti manasi manojaṃ dhyāyayedyo japastho vaśayati sa samastaṃ bhūtalaṃ mantraśaktyā

atha cāmuṇḍamantraḥ /
cāmuṇḍe prathamaṃ jayeti kathitaṃ sambodhanaṃ mohaya jñātavyaṃ vaśamānayeti ca padaṃ sādhyaṃ dvitīyāyutam /
svāhāntaḥ praṇavādireṣa prathitastantre mahāmohanaḥ sanmantraḥ kaviśekhareṇa kathito nāsmāddvitīyo bhuvi

'oṃ cāmuṇḍe jaya cāmuṇḍe mohaya amukīṃ vaśamānaya svāhā' iti mantraḥ / asya mantrasya japa ekalakṣamitaḥ, palāśakusumairhomaḥ daśāṃśaṃ, sarvaṃ vāmahastena kartavyam / atha cāmuṇḍāyā dhyānam-
daṃṣṭrākoṭivisaṅkaṭā suvadanā sāndrāndhakāre sthitā khaṭvāṅgāsinigūḍhadakṣiṇakarā vāme sapāśaṃ śiraḥ /
śyāmā piṅgalamūrdhajā bhayakarī śārdūlacarmāmbarā cāmuṇḍā śavavāhinī japavidhau dhyeyā sadā sādhakaiḥ

atha viśveśvarīmantraḥ /
oṅkāraḥ prathamaṃ namo nama iti proktaṃ ca tasmātpadaṃ cāmuṇḍe parikīrtitaṃ hili hili jñeyā ca sañjñā tataḥ /
jñātavyaṃ tu samānayeti ca padaṃ sanmantriṇāṃ sammato mantro 'yaṃ kaviśekhareṇa kathitaḥ khyātaḥ sadā siddhidaḥ

'oṃ namo namaścāmuṇḍe hilī hili amukīṃ vaśamānaya svāhā'
asya mantrasya japa ekalakṣaparimitaḥ, taddaśāṃśaḥ palāśakusumairhomaḥ karaṇīyaḥ, sarvaṃ vāmahastena kartavyam //
athaviśveśvarīdhyānam /
vajrāsaktaśarāsanā trinayanā savyetareṇāṅkuśaṃ vāmenāpi kareṇa pāśamurasi nyastottamāṅgasrajā /
vyāmuktorukacā karālavadanā vahniprabhā madhyagā dhyeyā jāpavidhau narairiti sadā viśveśvarī siddhaye

atha padminīvaśīkaraṇamantraḥ /
'oṃ kāmeśvara ! mohaya svāhā' iti mantraḥ / anena mantreṇa madhumiśritajātikusumasahitaṃ tāmbūlamādityadine sahasravāramabhimantritaṃ padminyai dātavyam / padminī vaśyā bhavati //
atha citriṇīvaśīkaraṇamantraḥ /
'oṃ paca paca oṃ vihaṅgama vihaṅgama oṃ kāmadevāya svāhā' iti mantraḥ / anena mantreṇa rambhāmūlajalabhāvitajātīphalamilitatāmbūlamādityadine pañcaśatavāramabhimantritaṃ citriṇyai dātavyam / citriṇī vaśyā bhavati //
atha śaṅkhinīvaśīkaraṇamantraḥ /
'oṃ hara hara oṃ paca paca kāmadevāya svāhā' iti mantraḥ / anena mantreṇa taragamūlaṃ śrīphalañcādityavāre aṣṭottaraśatavāramabhimantritaṃ śaṅkhinyai dātavyam / sā vaśyā bhavati //
atha hastinīvaśīkaraṇamantraḥ /
'oṃ ciri ciri vaśaṃ kuru kāmadevāya svāhā' iti mantraḥ / anena mantreṇa ādityadine kṣaudrāktau kapotabhramarapakṣau tāmbūladale vinyasya aṣṭottaraśatamabhimantritaṃ kṛtvā hastinyai deyam / hastinī vaśyā bhavati //
atha anicchāharaṇopāyanirūpaṇam /
kṣīrodanaṃ dvijavarāya purā pradadyāt puṣyoddhṛtaṃ sitabalācaraṇaṃ kumāryā /
piṣṭaṃ pradattamiti vairakṛtāmanicchāṃ niḥsārayediha muhurviditaprabhāvaḥ

atha stanotthāpanasamuddeśaḥ /
mātaṅgakṛṣṇāmayavājigandhā vacāyutāḥ paryuṣitāmbumiśrāḥ /
hayāripatrīnavanītayogāt kurvanti pīnaṃ kucakumbhayugmam

vasā bhujaṅgasya hayāripatraṃ kolasya medaḥ samabhāgayuktāḥ /
vakṣojakumbhaṃ madirāyatākṣyāḥ kurvanti pīnaṃ sakalaṃ haṭhena

tailaṃ haṭhāddāḍimakalkasiddhaṃ siddhārthajaṃ lepanato nitāntam /
nārīstanau cārutarau supīnau kuryādasau yogavaraḥ sadaiva

śrīparṇikāyā rasakalkasiddhaṃ tilodbhavaṃ tailavaraṃ pradiṣṭam /
plotena vakṣojayuge pradeyaṃ prayāti vṛddhiṃ patito 'pi nāryāḥ

yonisaṃskārasamuddeśaḥ /
prakṣālayennimbakaṣāyanīrairniśājyakṛṣṇāguruguggulūnām /
dhūpena yoniṃ niśi dhūpayitvā nārī pramodaṃ vidadhāti bhartuḥ

jātīprasūnaiḥ sitasarṣapasya tailaṃ pacellaghvanale prakāmam /
abhyaṅgayogena sadaiva yonau saubhāgyamāpnoti rate purandhrī

atha romaśātanasamuddeśaḥ /
bhujaṅgacūrṇaṃ kaṭutailamadhye saptāhamādityakare nidheyam /
tattailayogena vilāsinīnāṃ naśyanti romāṇi samūlameva

palāśabhasmānvitatālacūrṇaiḥ rambhāmbumiśrairupalipya bhūyaḥ /
kandarpagehe mṛgalocanānāṃ romāṇi rohanti kadāpi naiva

rambhājale saptadinaṃ vibhāvya bhasmeha kambormasṛṇaṃ ca paścāt /
tālena yuktaṃ ca vilepanena romāṇi nirmūlayati kṣaṇena

atha puṣpajananasamuddeśaḥ /
jyotiṣmatīkomalapatramagnau bhṛṣṭaṃ japāyāḥ kusumena piṣṭam /
gṛhāmbunā pītamidaṃ yuvatyā karoti puṣpaṃ smaramandirasya

atha garbhasādhāraṇasamuddeśaḥ /
turaṅgagandhāśrutavārisiddhamājaṃ payaḥ snānadine nipīya /
prāpnoti garbhaṃ niyamaṃ carantī vandhyā 'pi nūnaṃ puruṣaprasaṅgāt

puṣyoddhṛtaṃ lākṣmaṇameva mūlaṃ bhartrā nipiṣṭaṃ saghṛtaṃ ca pītam /
kṣīraudanaṃ prāśya patiprasaṅgādgarbhaṃ vidhatte taruṇī na citram

yā bījapūradrumamūlamekaṃ kṣīreṇa siddhaṃ haviṣā vimiśram /
ṛtau nipīya svapatiṃ prayāti dīrghāyuṣaṃ sā tanayaṃ prasūte

atha garbhasaṃsthāpanasamuddeśaḥ /
kaśeruśṛṅgāṭakajīvanākhyapayodharairaṇḍaśatāvarībhiḥ /
siddhaṃ payaḥ śarkarayā vimiśraṃ saṃsthāpayedgarbhamudīrṇaśūlam

atha sukhaprasavasamuddeśaḥ / atha sukhaprasavamantraḥ -
oṃ ihāmṛtañca somaśca citrabhānuśca bhāmini /
uccaiḥśravā turaṅgāṇāṃ mandire nivasantu te

oṃ idamamamṛtamapāṃ samuddhṛtaṃ vai tava laghu garbhamimaṃ vimuñcatu stri /
tadanalapavanārkavāsarāste saha lavaṇāmbudharairdiśantu śāntim

oṃ muktāḥ pāśā vipāśāśca muktāḥ sūryeṇa raśmayaḥ /
muktaḥ sarvabhayādgarbha ehyehi mā cira svāhā

ebhirjalaṃ cyāvanamantrarājairjaptvā pradeyaṃ kila garbhavatyai /
sadyaḥ prasūte navamūḍhagarbhā yogo 'yamātreyamunipradiṣṭaḥ

ebhirmantraiḥ saptavāramabhimantritaṃ jalaṃ garbhavatyai pātuṃ dātavyam /
"oṃ manmatha manmatha manmathavāhini ! lambodaraṃ muñca muñca laghu svāhā" iti mantraḥ / anena mantreṇa saptavāramabhimantritaṃ jalaṃ garbhavatyai pātuṃ dātavyam / sukhāt prasavo bhavati //
atha vandhyākaraṇasamuddeśaḥ /
palāśakṣīridrumayoḥ phalāni puṣpāṇyatho śālmalipādapasya /
madyena māsārdhadinaṃ nipīya vandhyā bhavenniścitameva nārī

phalaṃ kadambasya ca mākṣikaṃ hi tuṣodakena tridinaṃ nipīya /
snānāvasāne niyamena cāpi vandhyāmavaśyaṃ kurute haṭhena

karṣadvayaṃ rākṣasavṛkṣabījaṃ saptāhamātraṃ sitaśālivārā /
ṛtau nipītaṃ mṛgaśāvakākṣyā vandhyātvametanniyataṃ karoti

atha keśasaṃskārasamuddeśaḥ /
tilaprasūnaṃ saha gokṣureṇa sasāraghaṃ gavyaghṛtena piṣṭam /
saptāhamātreṇa śiraḥpralepādbhavanti dīrghāḥ pracurāśca keśāḥ

karṣārdhamātraṃ prasavaṃ phalena nimbasya tailaṃ niyamena pītam /
krameṇa kundendutuṣāragauraṃ śiroruhaṃ mecakatāmupaiti

atha indraluptasamuddeśaḥ /
guñjāphalaiḥ kṣaudrayutairvilipya keśapradeśe sakalendraluptam /
anena yogena sadaiva keśā rohanti kṛṣṇāḥ kuṭilā viśālāḥ