પૈપ્પલાદ-સંહિતા · અધ્યાય 2.60

યજ્ઞં યન્તં તપસા બૃહન્તમ્
અન્વ્ આ રોહામિ મનસા સયોનિઃ ।
ઉપહૂતા અગ્ને જરસઃ પરસ્તાત્
તૃતીયે નાકે સધમાદં મદેમ ॥

તં પ્રજાનન્ પ્રતિ ગૃહ્ણાતુ વિદ્વાન્
પ્રજાપતિઃ પ્રથમજા ઋતસ્ય ।
અસ્માભિર્ દત્તં જરસઃ પરસ્તાદ્
અચ્છિન્નં તન્તુમ્ અનુ સં ચરેમ ॥

શ્યેનઃ સુપર્ણો દિવ્યો નૃચક્ષાઃ
સહસ્રપાચ્ છતયોનિર્ વયોધાઃ ।
સ નો નિ યંસદ્ વસુ યત્ પરાભૃતમ્
અસ્માકમ્ અસ્તુ પિતૃષુ સ્વધાવત્ ॥

એતં સધસ્થાઃ પરિ વો દદામિ
યમ્ આવહાચ્ છેવધિં જાતવેદાઃ ।
અન્વાગન્તા યજમાનઃ સ્વસ્તિ
તં સ્મ જાનીત પરમે વ્યોમન્ ॥

જાનીત સ્મૈનં પરમે વ્યોમન્
દેવાઃ સધસ્થા વિદ લોકમ્ એતમ્ ।
ઇષ્ટાપૂર્તમ્ અનુ સં ક્રામ વિદ્વાન્
યત્ર તે દત્તં બહુધા વિબન્ધુષુ ॥