પૈપ્પલાદ-સંહિતા · અધ્યાય 2.59

ત્રયઃ પોષાસ્ ત્રિવૃતઃ શ્રયન્તામ્
અનક્તુ પૂષા પયસા ઘૃતેન ।
અન્નસ્ય ભૂમા પુરુષસ્ય ભૂમા
ભૂમા પશૂનાં ત ઇહ શ્રયન્તામ્ ॥

ઇમમ્ આદિત્યા વસુના સમ્ ઉક્ષત-
-ઇમમ્ અગ્ને વર્ધય વાવૃધાનઃ ।
અસ્મિન્ ત્રિવૃચ્ છ્રયતાં પોષયિષ્ણુર્
ઇમમ્ ઇન્દ્ર સં સૃજ વીર્યેણ ॥

ભૂમિષ્ ટ્વા પાતુ હરિતેન વિશ્વભૃદ્
અગ્નિઃ પિપર્ત્વ્ અયસા સજોષાઃ ।
વીરુદ્ભિસ્ તે અર્જુનં સંવિદાનં
વર્ચો દધાતુ સુમનસ્યમાનમ્ ॥

ત્રેધા જાતં જન્મનેદં હિરણ્યમ્
અગ્નેર્ એકં પ્રિયતમં બભૂવ ।
સોમસ્યૈકં હિંસિતસ્ય પરાપતદ્
અપામ્ એકં વેધસો રેત આહુસ્
તત્ તે હિરણ્યં ત્રિવૃદ્ અસ્ત્વ્ આયુષે ॥

ત્ર્યાયુષં જમદગ્નેઃ
કશ્યપસ્ય ત્ર્યાયુષમ્ ।
ત્રેધામૃતસ્ય ચક્ષણં
ત્રીણ્ય્ આયૂંષિ નસ્ કૃધિ ॥

ત્રયઃ સુપર્ણાસ્ ત્રિવૃતા યદ્ આયન્ન્
એકાક્ષરમ્ અભિસંભૂય શક્રાઃ ।
પ્રત્ય્ ઔહન્ મૃત્યુમ્ અમૃતેન સાકમ્
અન્તર્દધાના ભુવનાનિ વિશ્વા ॥

દિવસ્ ત્વા પાતુ હરિતં
મધ્યાત્ ત્વા પાત્વ્ અર્જુનમ્ ।
ભૂમ્યા અયસ્મયં પાતુ
પ્રાગાદ્ દેવપુરા અયમ્ ॥

ઇમાસ્ તિસ્રો દેવપુરાસ્
તાસ્ ત્વા રક્ષન્તુ સર્વતઃ ।
તાસ્ ત્વં બિભ્રદ્ આયુષ્માન્ વર્ચસ્વાન્
ઉત્તરો દ્વિષતો ભવ ॥

પુરં દેવાનામ્ અમૃતં હિરણ્યં
ય આબેધે પ્રથમો દેવો અગ્રે ।
તસ્મૈ નમો દશ પ્રાચીઃ કૃણોમ્ય્
અનુ મન્યતાં ત્રિવૃતા વધેન ॥

નવ પ્રાણાન્ નવભિઃ સં મિમીતે
દીર્ઘાયુત્વાય શતશારદાય ।
હરિતે ત્રીણિ રજતે ત્રીણ્ય્
અયસિ ત્રીણિ તપસાવિષ્ટિતાનિ ॥

આ તે ચૃતત્વ્ અર્યમા-
-આ પૂષા બૃહસ્પતિઃ ।
અહર્જાતસ્ય યન્ નામ
તેન તે ઽતિ ચૃતામસિ ॥

ઋતુભિષ્ ટ્વાર્તવૈર્ ઇત્ય્ એકા ॥