પૈપ્પલાદ-સંહિતા · અધ્યાય 18.63

અઙ્ગિરસો નઃ પિતરો નવગ્વા
અથર્વાણો ભૃગવઃ સોમ્યાસઃ ।
તેષાં વયં સુમતૌ યજ્ઞિયાનામ્
અપિ ભદ્રે સૌમનસે સ્યામ ॥

અઙ્ગિરોભિર્ યજ્ઞિયૈર્ આ ગહીહ
યમ વૈરૂપૈર્ ઇહ માદયસ્વ ।
વિવસ્વન્તં હુવે યઃ પિતા તે
અસ્મિન્ યજ્ઞે બર્હિષ્ય્ આ નિષદ્ય ॥

ઇમં યમ પ્રસ્તરમ્ આ હિ સીદ-
-અઙ્ગિરોભિઃ પિતૃભિઃ સંવિદાનઃ ।
આ ત્વા મન્ત્રાઃ કવિશસ્તા વહન્ત્ય્
એના રાજન્ હવિષો માદયસ્વ ॥

યમાય સોમં સુનુત
યમાય જુહુતા હવિઃ ।
યમં હ યજ્ઞો ગચ્છત્વ્
અગ્નિદૂતો અરંકૃતઃ ॥

યમાય ઘૃતવદ્ ધવિર્
જુહોતા પ્ર ચ તિષ્ઠત ।
સ નો જીવેષ્વ્ આ યમદ્
દીર્ઘમ્ આયુષ્ યદ્ ઈયસે ॥

યમાય મધુમત્તમં
રાજ્ઞે હવ્યં જુહોતન ।
ઇદં નમ ઋષિભ્યઃ પૂર્વજેભ્યઃ
પૂર્વેભ્યઃ પથિકૃદ્ભ્યઃ ॥

ત્રિકદ્રુકેભિઃ પતતિ
ષડ્ ઉર્વીર્ એકમ્ ઇદ્ બૃહત્ ।
ત્રિષ્ટુબ્ ગાયત્રી છન્દાંસિ
સર્વા તા યમ આર્પિતા ॥

મૈનમ્ અગ્ને વિ દહો મા વિ શોચો
માસ્ય ત્વચં ચક્ષુષો મા શરીરમ્ ।
યદા શૃતં કૃણવો જાતવેદો
ઽથેમ્ એનં પ્ર હિણુતાત્ પિતૃભ્યઃ ॥

શૃતં યદા કરસિ જાતવેદો
ઽથેમ્ એનં પરિ દત્તાત્ પિતૃભ્યઃ ।
યદા ગચ્છાત્ય્ અસુનીતિમ્ એષો
ઽથા દેવાનાં વશનીર્ ભવાતિ ॥

સૂર્યં ચક્ષુર્ ગચ્છતુ
વાતમ્ આત્મા દિવં ચ ગચ્છ
પૃથિવીં ચ ધર્મણા ।
અપો વા ગચ્છ યદિ તત્ર તે હિતમ્
ઓષધીષુ પ્રતિ તિષ્ઠા શરીરૈઃ ॥