પૈપ્પલાદ-સંહિતા · અધ્યાય 18.60

અર્ચામિ વાં વર્ધાયાપો ઘૃતસ્નૂ
દ્યાવાભૂમિ શૃણુતં રોદસી મે ।
અહા યદ્ દેવા અસુનીતિમ્ આયન્
મધ્વા નો અત્ર પિતરા શશીતામ્ ॥

સ્વાવૃગ્ દેવસ્યામૃતં યદી ગોર્
અતો જાતાસો ધારયન્ત ઉર્વી ।
વિશ્વે દેવા અનુ તત્ તે યજુર્ ગુર્
દુહે યદ્ એની દિવ્યં ઘૃતં વાઃ ॥

કિં સ્વિન્ નો રાજા જગૃહે કદ્ અસ્ય-
-અતિ વ્રતં ચકૃમા કો વિ વેદ ।
મિત્રશ્ ચિદ્ ધિ ષ્મા જુહુરાણો દેવાન્
શ્લોકો ન યાતાન્ અપિ વાજો અસ્તિ ॥

દુર્મન્ત્વ્ અત્રામૃતસ્ય નામ
સલક્ષ્મા યદ્ વિષુરૂપા ભવાતિ ।
યમસ્ય યો મનવતે સુમન્ત્વ્
અગ્ને તમ્ ઋષ્વ પાહ્ય્ અપ્રયુચ્છન્ ॥

યસ્મિન્ દેવા વિદથે માદયન્તે
વિવસ્વતઃ સદને ધારયન્તે ।
સૂર્યે જ્યોતિર્ અદધુર્ માસ્ય્ અક્તૂન્
પરિ તદ્ દ્યોતનં ચરતો અજસ્રા ॥

યસ્મિન્ દેવા મન્મનિ સંચરન્ત્ય્
અપાચ્યે ત્યે ન વયમ્ અસ્ય વિદ્મ ।
મિત્રો નો અત્રાદિતિર્ અનાગાન્
સવિતા દેવો વરુણાય વોચત્ ॥

સખાય આ શિષામહે
બ્રહ્મેન્દ્રાય વજ્રિણે ।
સ્તુષ ઊ ષુ નૃતમાય ધૃષ્ણવે ॥

શવસા હ્ય્ અસિ શ્રુતો
વૃત્રહત્યેન વૃત્રહા ।
મઘૈર્ મઘોનો અતિ શૂર દાસસિ ॥

સ્તેગો ન ક્ષામ્ અત્ય્ એષિ પૃથિવીં
મહી નુ વાતા ઇહા વાન્તુ ભૂમૌ ।
મિત્રો નો અત્ર વરુણો અજ્યમાનો
ઽગ્નિર્ વને ન વ્ય્ અસૃષ્ટ શોકમ્ ॥

સ્તુહિ શ્રુતં ગર્તસદં જનાનાં
રાજાનં ભીમમ્ ઉપહત્નુમ્ ઉગ્રમ્ ।
મૃડા જરિત્રે રુદ્ર સ્તવાનો
અન્યં તે અસ્મન્ નિ વપન્તુ સેન્યમ્ ॥