Paippalāda-Saṃhitā · Chapter 18.60

arcāmi vāṃ vardhāyāpo ghṛtasnū
dyāvābhūmi śṛṇutaṃ rodasī me |
ahā yad devā asunītim āyan
madhvā no atra pitarā śaśītām ||

svāvṛg devasyāmṛtaṃ yadī gor
ato jātāso dhārayanta urvī |
viśve devā anu tat te yajur gur
duhe yad enī divyaṃ ghṛtaṃ vāḥ ||

kiṃ svin no rājā jagṛhe kad asya-
-ati vrataṃ cakṛmā ko vi veda |
mitraś cid dhi ṣmā juhurāṇo devān
śloko na yātān api vājo asti ||

durmantv atrāmṛtasya nāma
salakṣmā yad viṣurūpā bhavāti |
yamasya yo manavate sumantv
agne tam ṛṣva pāhy aprayucchan ||

yasmin devā vidathe mādayante
vivasvataḥ sadane dhārayante |
sūrye jyotir adadhur māsy aktūn
pari tad dyotanaṃ carato ajasrā ||

yasmin devā manmani saṃcaranty
apācye tye na vayam asya vidma |
mitro no atrāditir anāgān
savitā devo varuṇāya vocat ||

sakhāya ā śiṣāmahe
brahmendrāya vajriṇe |
stuṣa ū ṣu nṛtamāya dhṛṣṇave ||

śavasā hy asi śruto
vṛtrahatyena vṛtrahā |
maghair maghono ati śūra dāsasi ||

stego na kṣām aty eṣi pṛthivīṃ
mahī nu vātā ihā vāntu bhūmau |
mitro no atra varuṇo ajyamāno
'gnir vane na vy asṛṣṭa śokam ||

stuhi śrutaṃ gartasadaṃ janānāṃ
rājānaṃ bhīmam upahatnum ugram |
mṛḍā jaritre rudra stavāno
anyaṃ te asman ni vapantu senyam ||