પૈપ્પલાદ-સંહિતા · અધ્યાય 16.41

ચતુઃસ્રક્તિં પરિચક્રાં
કવિભિર્ નિમિતાં મિતામ્ ।
ઇન્દ્રાગ્ની રક્ષતઃ શાલામ્
અમૃતૌ સોમ્યં સદઃ ॥

મા નઃ પાશાન્ પ્રતિ મુચો
ગુરુર્ ભારો લઘુર્ ભવ ।
વધૂમ્ ઇવ ત્વા શાલે
યત્રકામં ભરામસિ ॥

ઇમા આપઃ પ્ર હરામ્ય્
અયક્ષ્મા યક્ષ્મનાશનીઃ ।
ગૃહાન્ અભિ પ્ર સીદામ્ય્
અમૃતેન સહાગ્નિના ॥

પ્રતીચીં ત્વા પ્રતીચીનઃ
શાલે પ્રૈમ્ય્ અહિંસતીમ્ ।
અગ્નિર્ હ્ય્ અન્તર્ આપશ્ ચ-
-ઋતસ્ય પ્રથમોભા ॥

સ્વાહા દેવેભ્યઃ સ્વાહ્યેભ્યઃ
પ્રાચ્યા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્યો
દક્ષિણસ્યા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્યઃ
પ્રતીચ્યા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્ય
ઉદીચ્યા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્યો
ધ્રુવાયા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્ય
ઊર્ધ્વાયા દિશઃ શાલાયા નમો મહિમ્ને ॥

સ્વાહા દેવેભ્યઃ સ્વાહ્યેભ્યો
દિશોદિશઃ શાલાયા નમો મહિમ્ને ॥