પૈપ્પલાદ-સંહિતા · અધ્યાય 16.105

ઉરુઃ કોશો વસુધાનસ્ તવાયં
યસ્મિન્ન્ ઇમા વિશ્વા ભૂતાન્ય્ અન્તઃ ।
સ નો મૃડ પશુપતે નમસ્ તે
પરઃ ક્રોષ્ટારો અભિભાઃ શ્વાનઃ ।
પરો યન્ત્વ્ અઘરુદો વિકેશ્યઃ ॥

ધનુર્ બિભર્ષિ હરિતં હિરણ્યયં
સહસ્રઘ્નિ શતવધં શિખણ્ડિન્ ।
રુદ્રસ્યેષુશ્ ચરતિ દેવહેતિસ્
તસ્મૈ નમો યતમસ્યાં દિશીતઃ ॥

યો ઽભિયાતો નિલયતે
ત્વામ્ ઉગ્ર નિચિકીર્ષતિ ।
પશ્ચાદ્ અનુપ્રયુઙ્ક્ષે
તં વિદ્ધસ્ય પદનીર્ ઇવ ॥

ભવારુદ્રૌ સયુજા સંવિદાનાવ્
ઉભા ઉગ્રૌ ચરતો વીર્યાય ।
તયોર્ ભૂમિર્ અન્તરિક્ષં સ્વર્ દ્યૌસ્
તાભ્યાં નમો ભવમત્યાય કૃણ્મઃ ॥

નમસ્ તે અસ્ત્વ્ આયતે
નમો અસ્તુ પરાયતે ।
નમસ્ તે રુદ્ર તિષ્ઠત
આસીનાયોત તે નમઃ ॥

નમઃ સાયં નમઃ પ્રાતર્
નમો રાત્ર્યા નમો દિવા ।
ભવાય ચ શર્વાય ચ-
-ઉભાભ્યામ્ અકરં નમઃ ॥

સહસ્રાક્ષમ્ અતિપશ્યં પુરસ્તાદ્
રુદ્રમ્ અસ્યન્તં બહુધા વિપશ્ચિતમ્ ।
મોપારામ જિહ્વયેયમાનમ્ ॥

શ્યાવાસ્વાં કૃષ્ણમ્ અસિતં મૃણન્તં
ભીમં રથં કેશિનઃ પાદયન્તમ્ ।
પૂર્વે પ્રતીમો નમો અસ્ત્વ્ અસ્મૈ ॥

મા નો ઽભિ સ્રા મત્યં દેવહેતિં
મા નઃ ક્રુધઃ પશુપતે નમસ્ તે ।
અન્યત્રાસ્મદ્ દિવ્યાં શાખાં વિ ધૂનુ ॥

મા નો હિંસીર્ અધિ બ્રૂહિ
પરિ ણો વૃઙ્ધિ મા ક્રુધ ।
મા ત્વયા સમ્ અરામહિ ॥