પૈપ્પલાદ-સંહિતા · અધ્યાય 15.13

અગ્નિં બ્રૂમો વનસ્પતીન્
ઓષધીર્ ઉત વીરુધઃ ।
ઇન્દ્રં બૃહસ્પતિં સૂર્યં
તે નો મુઞ્ચન્ત્વ્ અંહસઃ ॥

બ્રૂમો દેવં સવિતારં
ધાતારમ્ ઉત પૂષણમ્ ।
ત્વષ્ટારમ્ અગ્ર્યં બ્રૂમસ્
તે (…) ॥

બ્રૂમો રાજાનં વરુણં
મિત્રં વિષ્ણુમ્ અથો ભગમ્ ।
અંશં વિવસ્વન્તં બ્રૂમસ્
તે (…) ॥

ગન્ધર્વાપ્સરસો બ્રૂમો
અશ્વિના બ્રહ્મણસ્પતિમ્ ।
અર્યમા નામ યો દેવસ્
તે (…) ॥

વાતં બ્રૂમઃ પર્જન્યમ્
અન્તરિક્ષમ્ અથો દિશઃ ।
આશાશ્ ચ સર્વા બ્રૂમસ્
તે (…) ॥

અહોરાત્રે ઇદં બ્રૂમ
સૂર્યાચન્દ્રમસા ઉભા ।
આદિત્યાન્ સર્વાન્ બ્રૂમસ્
તે નો મુઞ્ચન્ત્વ્ અંહસઃ ॥

મુઞ્ચન્તુ મા શપથ્યાદ્
અહોરાત્રે અથો ઉષાઃ ।
સોમો મા દિવ્યો મુઞ્ચતુ
યમ્ આહુશ્ ચન્દ્રમા ઇતિ ॥

પઞ્ચ રાજ્યાનિ વીરુધાં
સોમશ્રેષ્ઠાનિ બ્રૂમસિ ।
ભઙ્ગો દર્ભો યવઃ સહસ્
તે નો મુઞ્ચન્ત્વ્ અંહસઃ ॥

યે ગ્રામ્યાઃ સપ્ત પશવ
આરણ્યા ઉત યે મૃગાઃ ।
શકુન્તાન્ પક્ષિણો બ્રૂમસ્
તે નો મુઞ્ચન્ત્વ્ અંહસઃ ॥

ભવાશર્વાવ્ ઇદં બ્રૂમ
ઉગ્રઃ પશુપતિશ્ ચ યઃ ।
ઇષૂર્ યા એષાં વિદ્મસ્
તે નો મુઞ્ચન્ત્વ્ અંહસઃ ॥