પદ્મ પુરાણ · અધ્યાય 7.19

વ્યાસ ઉવાચ-
નારાયણપ્રપન્ના યે નરાભક્તિસમન્વિતાઃ ।
કદાચિદશુભં તેષાં વિદ્યતે ન દ્વિજોત્તમ

પુનરેવ પ્રવક્ષ્યામિ માહાત્મ્યં કમલાપતેઃ ।
યચ્છ્રુત્વા માનવાઃ સર્વે લભંતે પરમં પદમ્

વાસુદેવસ્ય માહાત્મ્યં શ્રુત્વા તૃપ્યંતિ વૈષ્ણવાઃ ।
પાખણ્ડા ન હિ તૃપ્યંતિ નરકે ક્લેશભાગિનઃ

પાખણ્ડાનાં સમીપે તુ વિષ્ણુમાહાત્મ્યમુત્તમમ્ ।
ન વક્તવ્યં દ્વિજશ્રેષ્ઠ વક્તવ્યં વૈષ્ણવાગ્રતઃ

પૂર્વં ત્રેતાયુગે વિપ્ર ઉર્વીશુર્નામ જૈમિને ।
આસીત્પાપરતો નિત્યં ધર્મનિંદાપરાયણઃ

બ્રહ્મસ્વહારી વિપ્રેન્દ્ર પરસ્ત્રીગમનોદ્યતઃ ।
ગોમાંસાશી સુરાપી ચ વેશ્યાવિભ્રમલોલુપઃ

શરણાગતહંતા ચ પરનિંદાકરઃ સદા ।
વિશ્વાસઘાતી મિત્રઘ્નો જ્ઞાતિપીડાકરસ્તથા

અસત્યભાષી ક્રૂરશ્ચ પાખંડજનસઙ્ગભાક્ ।
વૃત્તિચ્છેદી દ્વિજાતીનાં ન્યાસાપહારકસ્તથા

તાદૃશં તં સમાલોક્ય દુષ્ટં પાપપરાયણમ્ ।
આજગ્મુર્જ્ઞાતયઃ સર્વે ક્રુદ્ધાસ્તસ્ય નિજંગૃહમ્

જ્ઞાતય ઊચુઃ -
પ્રતિષ્ઠોપાર્જિતા પૂર્વૈરસ્માકં વિમલે કુલે ।
સા પ્રતિષ્ઠા ત્વયા મૂઢ વિનાશં પ્રતિનીયતે

ધર્મમાર્ગં પરિત્યજ્ય કુરુષે પાતકં સદા ।
મદ્વંશકીર્તિહનનં જાતોઽસિ જ્ઞાતિદુઃખદઃ

અતિવિસ્મયદા સૃષ્ટિર્વિધાતુર્મન્યતે ત્વયિ ।
યસ્મિન્સિંધૌ શશી જાતસ્તત્ર ક્ષ્વેડોદ્ભવોઽપિ ચ

અહો શક્તિઃ કુપુત્રાણાં સંખ્યાતું ન ચ શક્યતે ।
અનેકૈઃ પુરુષૈઃ કીર્તિં સંચિતાં હંતિ તત્ક્ષણાત્

જાતે પુત્રોત્તમે વંશઃ શ્રેષ્ઠઃ સ્યાદધમોઽપિ ચ ।
પુત્રેધમેતુ શ્રેષ્ઠોઽપિ વંશો ગચ્છતિ હીનતામ્

વ્યાસ ઉવાચ-
ઇત્યુક્ત્વા જ્ઞાતયસ્તે ચ તં સર્વે પાપિનાં વરમ્ ।
અપકીર્તિભયાત્ક્રુદ્ધાસ્તત્યજુઃ સહસા દ્વિજ

જ્ઞાતિભિઃ સ પરિત્યક્તો જનૈઃ સર્વૈશ્ચ ધિક્કૃતઃ ।
પ્રપેદે દસ્યુતાં દુઃખી વિભ્રષ્ટાખિલવૈભવઃ

તં દસ્યુકર્મકુર્વંતં નિર્દ્દયં પરહિંસકમ્ ।
ધૃત્વા જનપદાઃ સર્વે ભૂપાલાય ન્યવેદયન્

તેન ભૂમિભુજા તસ્ય પિતૃસ્નેહાદ્દિવજોત્તમ ।
ન હતોઽસૌ દુરાચારો નિજદેશાદ્વહિષ્કૃતઃ

તતોઽસૌ વનમાશ્રિત્ય દસ્યુભિઃ સહ નિર્દ્દયઃ ।
પાંથસ્વહરણાર્થાય તસ્થૌ બહુભિરુદ્ધતૈઃ

કદાચિત્તટિનીતીરં દસ્યુભિઃ સહ જૈમિને ।
વનપર્યટને શ્રાંતો જગામ સ્નાનહેતવે

તસ્યાં તટિન્યાં ભગવત્પરિચર્યાપરાયણાન્ ।
અસૌ દદર્શ દુષ્ટાત્મા બ્રાહ્મણાકૃતિનો બહૂન્

અથ તે બ્રાહ્મણાઃ સર્વે સમારાધ્ય જનાર્દનમ્ ।
અન્યોન્યં કથયામાસુર્વિહિતા અતિ કૌતુકાત્

અદ્ય ચંપકપુષ્પાણિ મયા ત્યક્તાનિ તાનિ વૈ ।
કશ્ચિદ્વદતિ તાંબૂલં મયા દત્તં મુરારયે

ન ખાદિતવ્યં તાંબૂલં કદાચિદપિ જન્મનિ ।
મયાદ્ય હરયે દત્તં કદલીફલમુત્તમમ્

જન્મજન્માનિ ચ મયા ભક્ષ્યં ચ કદલીફલમ્ ।
કોઽપિ વક્તિ મયા દત્તં હરયે દાડિમીફલમ્

કોઽપિ વક્તિ મયા દત્તં રસાલફલમુત્તમમ્ ।
અન્યોઽન્યમેતદ્વદતાં તેષાં શ્રુત્વા વચાંસિ ચ

ઉર્વીશુશ્ચિન્તયામાસ કિં પ્રદાસ્યામિ વિષ્ણવે ।
સંસારે યાનિ વસ્તૂનિ ભક્ષ્યાણિ સંતિ તાન્યહમ્

ન હિ શક્નોમિ સંત્યક્તું કિં દાસ્યામિ મુરારયે ।
નિત્યં વનાંતરસ્થોઽહં ચૌરો રાજભયાકુલઃ

શકટારોહણે નાસ્તિ હ્યધિકારઃ કદાપિ મે ।
વ્યાસ ઉવાચ-
ઇત્યુક્ત્વા દસ્યુના તેન ભૂયોભૂયો દ્વિજોત્તમ

શકટં હરયે દત્તં ચતુર્વર્ગપ્રદાયિને ।
અથ તેબ્રાહ્મણાઃ સર્વે જગ્મુર્વિપ્ર યથાગતાઃ

સોઽપિ દસ્યુર્દસ્યુભિશ્ચ જગામ નિજમાશ્રયમ્ ।
એકદા ગુડકંડોલં તેનૈવ ખલુ વર્ત્મના

ગૃહીત્વા પથિકઃ કશ્ચિત્કાકીમંડલમાગતઃ ।
તતોઽસૌ સહસા દસ્યુર્નિર્ભયઃ પરહિંસકઃ

જહાર ગુડકંડોલમધ્વનીનસ્ય તસ્ય ચ ।
અથ તે દસ્યવશ્ચક્રુર્ગુડકંડોલ ભંજનમ્

ઉર્વીશુશ્ચાપતદ્ભાગે શકટં ગુડનિર્મિતમ્ ।
ઉર્વીશુઃ શકટં ગૌડં સમાસાદ્ય દ્વિજોત્તમ

મનસા ચિંતયામાસ વચઃસ્મરણપૂર્વકમ્ ।
અનો મયા પુરા દત્તં સ્વયમેવ મુરારયે

તસ્માદનો ન મે ગ્રાહ્યં કદાચિદિહ જન્મનિ ।
વિચિન્ત્યેતિ હૃદા દાતું તદનો ગુડનિર્મિતમ્

દત્તં વિપ્રાય કસ્મૈચિન્માધવપ્રીતિહેતવે ।
તાં ભક્તિં તસ્ય વિજ્ઞાય મહાપાતકિનો દ્વિજ

જહાર સકલં પાપં સદ્યઃ પ્રીતો જનાર્દનઃ ।
તસ્મિન્નેવ દિને વિપ્ર પ્રવિશ્ય ચ મહાવનમ્

હતઃ પૌરજનૈઃ સર્વૈરથ ક્રુદ્ધૈઃ સ ઉર્વિશુઃ ।
ભગવાનથ તં નેતું વિમાનં સ્વર્ણનિર્મિતમ્

દૂતાંશ્ચ પ્રેષયામાસ નાનાભરણભૂષિતાન્ ।
અથ તે ભગવદ્દૂતાસ્તમુર્વીશું ગતૈનસમ્

સમારોપ્ય વિમાને તં સદ્યો જગ્મુઃ પુરં હરેઃ ।
તતૌઽસૌ હરિસાન્નિધ્યં પ્રાપ્ય પુણ્યાત્મનાં વરઃ

પુનર્મન્વંતરશતં સ્થિત્વા કેશવસન્નિધિમ્ ।
પરમં જ્ઞાનમાસાદ્ય સ વિવેશ તનું હરેઃ

વ્યાસ ઉવાચ-
યેન કેનાપ્યુપાયેન હરિભક્તિકરો નરઃ ।
સંસારજલધેઃ પારં રાજહંસ ઇવ વ્રજન્

ક્ષણમેવ હરેર્ભક્તિર્વર્તતે યસ્ય ચેતસિ ।
તત્પદં પરમં યાતિ સ પાપાત્માપિ ગચ્છતિ

એકમપ્યુત્તમં વસ્તુ દત્વાઽસૌ તન્મુરારયે ।
સ્વયમેવ હિ ભોક્તવ્યં પશ્ચાત્પાપોપશાંતયે

યદ્વસ્તુ હરયે દત્તં તચ્ચ દદ્યાદ્દિવજાતયે ।
કિંચિચ્છેષં ન ભોક્તવ્યં તસ્યાવશ્યં સ્વયં બુધૈઃ

વસ્તૂનિ બ્રાહ્મણશ્રેષ્ઠમિષ્ટાનિ યાનિ કાનિ ચ ।
અદત્વા વિષ્ણવે તાનિ ન ભોક્તવ્યાનિ વૈષ્ણવૈઃ

વિષ્ણુનૈવેદ્યમાહાત્મ્યં સર્વપાપપ્રણાશનમ્ ।
સેતિહાસં પુનર્વચ્મિ શૃણુ વિપ્ર સમાહિતઃ

આસીત્સર્વજનિર્નામ બ્રાહ્મણઃ શુદ્ધવંશજઃ ।
શાંતો દાંતો દયાયુક્તો ગુરુબ્રાહ્મણપૂજકઃ

હરેઃ પૂજાપરશ્ચૈવ હરિસ્મરણતત્પરઃ ।
પ્રપન્નક્લેશવિધ્વંસી સત્યવાદી જિતેન્દ્રિયઃ ૫૦

પ્રાતઃસ્નાયી નિજાચારગ્રાહી હિંસા વિવર્જિતઃ ।
એકાદશીવ્રતરતો જ્ઞાતિપૂજાપરાયણઃ

કદાચિત્સ દ્વિજશ્રેષ્ઠઃ સ્વપ્નેઽપશ્યચ્ચ કેશવમ્ ।
શ્યામં વિરજપદ્માક્ષં સ્મેરાસ્યં પીતવાસસમ્

સ્વર્ણકુણ્ડલમઞ્જીરકિરીટોજ્જ્વલવિગ્રહમ્ ।
કૌસ્તુભોદ્ભાસિતોરસ્કં વનમાલાવિભૂષિતમ્

ચતુર્બાહું શઙ્ખચક્રગદાપદ્મધરં પ્રભુમ્ ।
સમસ્તૈર્લક્ષણૈર્યુક્તં સ્વર્ણયજ્ઞોપવીતિનમ્

સંપ્રાપ્ય દર્શનં સ્વપ્ને સ વિપ્રો જગતીપતેઃ ।
કૃતાઞ્જલિસ્તમસ્તૌષીદ્રોમાંચિતતનુર્મુદા

તુભ્યં નમોઽસ્તુ જગતઃ સકલસ્યભર્ત્ત્રે સલ્લોકશોકભયરોગવિનાશનાય ।
નારાયણાય કમલાહૃદયપ્રિયાય ધર્માર્થકામપરમામૃતદાય તુભ્યમ્

પાપાનિ ચૈવ સકલાનિ મયા કૃતાનિ મત્તેન મોહવશગેન સદા મુરારે ।
તસ્માદ્બિભેમિ જગદંબુનિધેર્ગભીરાન્મામુદ્ધરસ્વ નિજભક્તિતરીં પ્રદાય

જાનામિ યદ્યપિ હરે દુરિતં મનુષ્યો વ્યામોહમાશુચલભે ભુવિ કૈટભારે ।
પાપં તથાપિ ચ મુદા સતતં કરોમિ તસ્માન્ન કોઽપ્યહમિવાસ્તિ જનો વિમૂઢઃ

પુણ્યદ્રુમઃ સુખફલં સહસૈવ ધત્તે કિં વેદ્મિ નેતિ નૃહરે કૃતપાતકોઽહમ્ ।
પુષ્પદ્રુમાર્પણવિધૌ ન મમાસ્તિ વિત્તં નાથ પ્રસીદ ભગવન્કિમહં કરોમિ

ત્વત્પાદપદ્મયુગલં પરમામૃતસ્ય સ્થાનં વિહાય મમ ચિત્તમધુવ્રતોઽયમ્ ।
નારીમુખં વ્રજતિ દેવમૃતિપ્રદં યચ્છ્લેષ્મપ્રકીર્ણમનિશં કમલભ્રમેણ

પાણિઃપ્રદાનરહિતોઽનૃતભાષિવક્ત્રં કર્ણૌ ચ પાપશ્રવણાય સદૈવ દક્ષૌ ।
દોષાનિમાન્મમ હરે હર સેવકસ્ય યસ્માન્નુ નાથ શરણાગતદોષહંતા

સંસારઘોરજલધૌ નૃહરે કદાચિત્ત્વદ્ભક્તિનૌરિહ મયા સુદૃઢા ચ લબ્ધા ।
તત્રાપિ દૈવવશગોઽહમહો દુરાત્મા વર્તેત એવ સતતં મમદુઃખકાલઃ

સંસારપારગમનાય લસત્પથોઽસ્તિ કિં સર્વદુઃખરહિતઃ સદયઃ પ્રસન્નઃ ।
અંધીકૃતસ્ય મમ મોહમહત્તમિસ્રૈર્દૃષ્ટિસ્ત્વયીહ ન કદાપિ ચ યાતિ વિષ્ણો

પાપાત્મનોઽપિ મમ ચિત્તમિદં મુરારે નષ્ટં વિનષ્ટજનકષ્ટવિનષ્ટિકારિ ।
યસ્ત્વાં સમસ્તસુરવંદિતપાદપદ્મ સ્વપ્નેઽપિ કેશિમથનાદ્ય વિભો સમીક્ષે

વ્યાસ ઉવાચ-
ઇતિ તેન સ્તુતો દેવો ભગવાન્કમલાપતિઃ ।
ઉવાચ વાક્યં વાક્યજ્ઞઃ સંસારાર્ણવતારકઃ

શ્રીભગવાનુવાચ-
ભક્તિભિસ્તવ વિપ્રેંદ્ર તુષ્ટોઽહં નિત્યમેવ ચ ।
તસ્માત્તવાચિરેણૈવ સર્વં ભદ્રં ભવિષ્યતિ

પાપિનોઽપિ તવોદ્ધારો મયા પૂર્વં કૃતો દ્વિજ ।
અધુના મમ ભક્તોઽસિ ન વિપત્તિર્ભવિષ્યતિ

બ્રાહ્મણ ઉવાચ।
કોઽહં તસ્થૌ પુરા વિષ્ણો કિં વા પાપં મયા કૃતમ્ ।
પાપિનોઽપિ મમોદ્ધારઃ કથં પૂર્વં ત્વયા કૃતઃ

સંસારેઽસ્મિન્કથં જાતો જનિતોઽહં કથં ત્વયા ।
એતત્સર્વં વિભો બ્રૂહિ યતસ્ત્વં સદયઃ સદા

શ્રીભગવાનુવાચ-
અપ્રકાશ્યમિદં ગુહ્યં યદ્યપિ દ્વિજસત્તમ ।
તથાપિ તવ વાત્સલ્યાન્નિગદામિ નિશામય

પુરા ત્વં બ્રાહ્મણશ્રેષ્ઠ પક્ષિવંશસમુદ્ભવઃ ।
ભૂતોઽસિ ભૂમિભાગેષુ નિજકર્મવિપાકતઃ

ક્ષુધયા તૃષયા વાપિ સતતં વ્યાકુલો ભવાન્ ।
બભ્રામ ભક્ષયન્કીટાન્નિર્ઝરોષ્ણોદકં તથા

નાનાદુઃખં સદા ભુંજન્પક્ષિયોનૌ સમુદ્ભવઃ ।
ચતુર્વર્ષસહસ્રાણિ સ્થિતોઽસિ ત્વં પુરા ક્ષિતૌ

એકદા કુલભદ્રાખ્યો બ્રાહ્મણઃ સર્વતત્વવિત્ ।
પૂજયામાસ માં ભક્ત્યા નૈવેદ્યાદ્યૈર્નદીતટે

સમભ્યર્ચ્ય સ વિપ્રેંદ્રો મમ નૈવેદ્યતંદુલમ્ ।
યયૌ તત્રૈવ નિક્ષિપ્ય ભૂય એવ નિજં ગૃહમ્

તતો વૃક્ષાત્સમાગત્ય ક્ષુધિના પક્ષિણા ત્વયા ।
મમ નૈવેદ્યસંબંધિ ભક્ષિતં સર્વતંદુલમ્

ભુક્ત્વૈવ સદ્યો મુક્તોઽસિ પાતકૈરતિદારુણૈઃ ।
કદાચિત્પ્રાપ્તકાલસ્ત્વં કાલધર્મગતો દ્વિજ

ત્વામાનેતું મયા દૂતાઃ પ્રેષિતાઃ સર્વથા નિજાઃ ।
તતો રથે સમારોપ્ય ભવંતં નષ્ટકલ્મષમ્

સદ્યો દૂતગણાઃ સર્વે સમાયાતાઃ પરં પદમ્ ।
યુગકોટિસહસ્રાણિ સ્થિતોઽસિ મમ સન્નિધૌ

ભુંજન્સુખાનિ સર્વાણિ દુર્લ્લભાનિ સુરૈરપિ ।
તતો યાતોઽસિ વિપ્રેન્દ્ર વિશુદ્ધે બ્રાહ્મણાન્વયે

તત્રાપિ મયિ ભક્તિસ્તે જાતાતિસુદૃઢા પુનઃ ।
ક્રિયાયોગેન માં નિત્યં સમારાધ્ય દ્વિજોત્તમ

આયુષોંતે મત્પ્રસાદાન્મામકં પદમાપ્સ્યસિ ।
યદા તુષ્ટોઽસ્મ્યહં વિપ્ર સપાપાત્માપિ મુક્તિભાક્

કદાચિદ્યસ્ય રુષ્ટોસ્મિ પુણ્યાત્માપિ ચ પાપભાક્ ।
તસ્માદ્બ્રાહ્મણ ભદ્રં તે ભક્તોઽસિ મમ સુવ્રત

દાસ્યામિ તે પરં સ્થાનં યદલભ્યં સુરૈરપિ ।
બ્રાહ્મણ ઉવાચ-
ત્વત્પ્રસાદાચ્છ્રુતં નાથ પૂર્વવૃત્તાંતમાત્મનઃ

ઇદાનીં શ્રોતુમિચ્છામિ યત્કિઞ્ચિદ્બ્રૂહિ તત્પ્રભો ।
કસ્ય તુષ્ટોઽસિ દેવેન્દ્ર કસ્ય રુષ્ટોઽસિ વા પ્રભો

મહત્યા કૃપયા સર્વમેતન્મે વક્તુમર્હસિ ।
શ્રીભગવાનુવાચ-
કર્મણા યેનવિપ્રેન્દ્ર તુષ્ટિર્મે હૃદિ જાયતે

ક્રોધશ્ચ તત્સમસ્તં ચ કથયામિ સમાસતઃ ।
યો દયાવાન્દ્વિજશ્રેષ્ઠ સર્વભૂતેષુ સર્વદા

અહંકારવિહીનશ્ચ તસ્ય તુષ્ટોઽસ્મ્યહં સદા ।
કર્મ કુર્યાન્મદર્થં યો ધર્મભક્તિસમન્વિતઃ

બ્રૂતે મદર્થં યઃ શાંતં તસ્ય તુષ્ટોઽસ્મ્યહં સદા ।
મિષ્ટં વસ્તુ સમાસાદ્ય દત્વા મે યશ્ચ માનવઃ

માનાપમાને સદૃશસ્તસ્ય તુષ્ટોઽસ્મ્યહં સદા ।
સર્વભૂતશરીરસ્થં યો માં જાનાતિ માનવઃ

પરહિંસાવિહીનો યસ્તસ્ય તુષ્ટોઽસ્મ્યહં સદા ।
કર્માણિ કુરુતે યસ્તુ સુવિચાર્ય પુનઃ પુનઃ

ગોબ્રાહ્મણહિતૈષી યસ્તસ્ય તુષ્ટોઽસ્મ્યહં સદા ।
સ્વયં નિરુક્તં વચનં યત્નાદ્યઃ પરિપાલયેત્

પ્રપન્નં યાતિ યત્નાદ્યસ્તસ્ય તુષ્ટોઽસ્મ્યહં સદા ।
દદાત્યનુપકારિભ્યો દાનાનિ દ્વિજસત્તમ

મયિ ચિત્તં સદા યસ્ય તસ્ય તુષ્ટોઽસ્મ્યહં સદા ।
કર્મણા યેનતુષ્ટોઽસ્મિ નિરુક્તં તત્સમાસતઃ

રુષ્ટોઽસ્મિ કર્મણા યેન વિપ્ર વચ્મિ શૃણુષ્વતમ્ ।
પરહિંસારતો યસ્તુ નિર્દ્દયઃ સર્વજંતુષુ

અહંયુઃ સર્વદા ક્રુદ્ધઃ સમાં નયતિ શત્રુતામ્ ।
અસત્યભાષીક્રૂરશ્ચ પરનિંદાપરસ્તુ યઃ

કવિવર્તનવિધ્વંસી સમાં નયતિ શત્રુતામ્ ।
અદૃષ્ટદોષૌ પિતરૌ સ્ત્રીભ્રાતૃભગિની તથા

મોહાત્ત્યજતિ યો મૂઢઃ સમાં નયતિ શત્રુતામ્ ।
પિતૃભિર્ભર્ત્સનં યસ્તુ કુરુતે મૂઢધીર્નરઃ

ગુર્વવજ્ઞાકરો વિપ્ર સમાં નયતિ શત્રુતામ્ ।
આરામચ્છેદિનો યે ચ જલાશયવિલાયિનઃ

ગ્રામનાશકરાયેચતેમાંનયંતિશત્રુતામ્ ।
પરસ્ત્રિયં સમાલોક્ય વિષાદં યાન્તિ યે જનાઃ ૧૦૦

શૃણ્વંતિ પાપચર્ચાં ચ તેષાં રુષ્ટોસ્મ્યહં સદા ।
દ્વિષંતિ નાથં યે મૂઢા અનાથસ્વં હરંતિ યે

વિશ્વાસઘાતિનો યે ચ તેષાં રુષ્ટોઽસ્મ્યહં સદા ।
યે ચ ગોવીર્યહંતારો વૃષલીપતયશ્ચ યે

અશ્વત્થઘાતિનો યે ચ તેષાં રુષ્ટોઽસ્મ્યહં સદા ।
બ્રહ્મવિષ્ણુમહેશાનાં મધ્યે યે ભેદકારિણઃ

પરદારાતિરક્તા યે તેષાં રુષ્ટોઽસ્મ્યહં સદા ।
એકાદશ્યાં ભુંજતે યે લોભાત્પાપધિયો નરાઃ

વેદનિંદાકરા યે ચ તેષાંરુષ્ટોઽસ્મ્યહં સદા ।
પાપબુદ્ધિરતા યે ચ મિત્રદ્રોહરતાસ્તથા

ધાત્રીતરું ચ યે ઘ્નંતિ તેષાં રુષ્ટોઽસ્મ્યહં સદા ।
દિવસે મૈથુનં યે ચ કુર્વંતે કામમોહિતાઃ

રજસ્વલા સ્ત્રિયાં ચૈવ તેષાં રુષ્ટોઽસ્મ્યહં સદા ।
યે ચાદૃષ્ટાર્તવાં નારીં મોહાદ્ગચ્છંતિ સત્તમ

વ્રતસ્થાં ચ સદા જાલ્માસ્તે માં નયંતિ શત્રુતામ્ ।
અમાવાસ્યાતિથૌ યે ચ કુર્વંતે નિશિભોજનમ્

ભોજનદ્વયમેવાર્કે તેષાં રુષ્ટોઽસ્મ્યહં સદા ।
આમિષં મૈથુનં તૈલમમાવાસ્યાદિને દ્વિજાઃ

ન યે ત્યજંતિ વિપ્રેન્દ્ર તેષાં રુષ્ટોઽસ્મ્યહં સદા ।
બહુનાત્ર કિમુક્તેન સંક્ષેપાત્તે વદામ્યહમ્

નિંદંતિ વૈષ્ણવાન્યે ચ તેષાં રુષ્ટોસ્મ્યહં સદા ।
વ્યાસ ઉવાચ-
ઇત્યુક્ત્વા ભગવાન્વિષ્ણુરદૃશ્યઃ સહસાઽભવત્

સ ચ વિપ્રઃ સમુત્તસ્થૌ ત્યક્તનિદ્રસ્તુ મંચતઃ ।
કેશવોક્તેન વાક્યેન સ વિપ્રો હરિભક્તિકૃત્

સંત્યજ્ય સકલં કાર્યં ક્રિયાયોગરતોઽભવત્ ।
નારાયણસ્ય નૈવેદ્યં ભુંજતોઽપિ ફલં ત્વિદમ્

હરિપૂજાકૃતાં પુંસાં ન જાને કિં ભવેદિતિ ।
સમાસેન બ્રવીમિ ત્વાં શૃણુ સત્તમ જૈમિને

સકૃત્કૃત્વા હરેઃ પૂજાં પ્રાપ્યતે પરમં પદમ્।
માનુષ્યં દુર્લ્લભં લોકે પૂજા તત્રાપિ ચક્રિણઃ

ભક્તિસ્તત્રાપિ વિપ્રેન્દ્ર દુર્લ્લભા પરિકીર્તિતા

સંસારાબ્ધિં સર્વદુઃખપ્રપૂર્ણં તર્તું વાંછા યસ્ય ચિત્તેસ્તિ પુંસઃ ।
ભક્ત્યા નિત્યં વાસુદેવસ્ય પૂજાં કુર્યાદાર્યઃ કર્મણાં સોઽખિલાનામ્

ઇતિ શ્રીપદ્મપુરાણે ક્રિયાયોગસારે એકોનવિંશતિતમોઽધ્યાયઃ