પદ્મ પુરાણ · અધ્યાય 6.97

નારદ ઉવાચ-
યે દેવૈર્નિર્જિતાઃ પૂર્વં દૈત્યાઃ પાતાલસંસ્થિતાઃ

તે હિ ભૂમંડલં જાતા નિર્ભયાસ્તમુપાસિતુમ્ ।
કદાચિચ્છિન્નશિરસં રાહું દૃષ્ટ્વા સ દૈત્યરાટ્ ।
પપ્રચ્છ ભાર્ગવં વિપ્રં કેનેદં વિહિતં પ્રભો

ભાર્ગવસ્તસ્ય શિરસશ્છેદં રાહોઃ શશંસ હ ।
અમૃતાર્થં સમુદ્રસ્ય મથનં દેવકારિતમ્

રત્નાપહરણં ચૈવ દૈત્યાનાં ચ પરાભવમ્ ।
તચ્છ્રુત્વા ક્રોધરક્તાક્ષઃ સ્વપિતુર્મથનં તદા

સ દૂતં પ્રેષયામાસ ઘસ્મરં શક્રસંનિધૌ ।
દૂતસ્ત્રિવિષ્ટપં ગત્વા સુધર્માં પ્રાપ્ય સત્વરમ્

ગર્વાદખર્વમૌલિસ્તુ દેવેંદ્રં વાક્યમબ્રવીત્ ।
દૂત ઉવાચ-
જલંધરોઽબ્ધિતનયઃ સર્વદૈત્યજનેશ્વરઃ

દૂતોઽહં પ્રેષિતસ્તેન સ યદાહ શૃણુષ્વ તત્ ।
કસ્માત્ત્વયા મમ પિતા મથિતઃ સાગરોઽદ્રિણા

નીતાનિ સર્વરત્નાનિ તાનિ શીઘ્રં પ્રયચ્છ મે ।
ઇતિ દૂતવચઃ શ્રુત્વા વિસ્મિતસ્ત્રિદશાધિપઃ ।
ઉવાચ ઘસ્મરં ઘોરં ભયરોષસમન્વિતઃ

ઈશ્વર ઉવાચ-
શૃણુ દૂત મયા પૂર્વં મથિતઃ સાગરો યથા ।
અદ્રયો મદ્ભયાદ્ભીતાઃ સ્વકુક્ષિસ્થાસ્તથા કૃતાઃ

અન્યેઽપિ મદ્દ્વિષસ્તેન રક્ષિતા દિતિજાસ્તથા ।
તસ્માત્તદ્રત્નજાતં તુ મયાપ્યપહૃતં કિલ

શંખોઽપ્યેવં પુરા દેવાનદ્વિષત્સાગરાત્મજઃ ।
મમાનુજેન નિહતઃ પ્રવિષ્ટઃ સાગરોદરમ્

તદ્ગચ્છ કથયસ્વાસ્યસર્વં મથનકારણમ્

નારદ ઉવાચ-
ઇત્થં વિસર્જિતો દૂતસ્તદેંદ્રેણાગમદ્ગૃહમ્ ।
તદિંદ્રવચનં દૈત્યરાજાયાકથયત્તદા

તન્નિશમ્ય તદા દૈત્યો રોષાત્પ્રસ્ફુરિતાધરઃ ।
ઉદ્યોગમકરોત્તૂર્ણં સર્વદેવજિગીષયા

તદોદ્યોગે સુરેંદ્રસ્ય દિગ્ભ્યઃ પાતાલતસ્તથા ।
દિતિજાઃ પ્રત્યપદ્યંત શતશઃ કોટિશસ્તથા

અથ શુંભનિશુંભાદ્યૈર્બલાધિપતિકોટિભિઃ ।
ગત્વા ત્રિવિષ્ટપં દૈત્યો યુદ્ધાયાધિષ્ઠિતોઽભવત્

નિર્યયુસ્ત્વમરાવત્યા દેવા યુદ્ધાય દંશિતાઃ ।
પુરમાવૃત્ય તિષ્ઠંતિ દૃષ્ટ્વા દૈત્યબલં મહત્

તતઃ સમભવદ્યુદ્ધં દેવદાનવસેનયોઃ ।
મુશલૈઃ પરિઘૈર્બાણૈર્ગદાપરશુશક્તિભિઃ

તેઽન્યોન્યં સમધાવેતાં જઘ્નતુશ્ચ પરસ્પરમ્ ।
ક્ષણેનાભવતાં સેને રુધિરૌઘ પરિપ્લુતે

પતિતૈઃ પાત્યમાનૈશ્ચ ગજાશ્વરથપત્તિભિઃ ।
વ્યરાજત રણે ભૂમિઃ સંધ્યાભ્રપટલૈરિવ

તત્ર યુદ્ધે હતાન્દૈત્યાન્ભાર્ગવસ્તૂદતિષ્ઠયત્ ।
વિદ્યયાઽમૃતજીવિન્યા મંત્રિતૈસ્તોયબિંદુભિઃ

દેવાસ્તત્ર તથા યુદ્ધે જીવયેદંગિરસ્સુતઃ ।
દિવ્યૌષધીઃ સમાનીય દ્રોણદેશ્યાઃ પુનઃ પુનઃ

દૃષ્ટ્વા દેવાંસ્તથા યુદ્ધે પુનરેવ સમુત્થિતાન્ ।
જલંધરઃ ક્રોધવશો ભાર્ગવં વાક્યમબ્રવીત્

જલંધર ઉવાચ-
મયા દેવા હતા યુદ્ધે ઉત્તિષ્ઠંતિ કથં પુનઃ ।
તવ સંજીવનીવિદ્યા નૈવાન્યત્રેતિ વિશ્રુતમ્

ભૃગુરુવાચ-
દિવ્યૌષધીઃ સમાનીય દ્રોણાદ્રેરંગિરાઃ સુરાન્ ।
જીવયત્યેષ વૈ શીઘ્રં દ્રોણાદ્રિં સમપાહર

નારદ ઉવાચ-
ઇત્યુક્તઃ સ તુ દૈત્યેંદ્રો નીત્વા દ્રોણાચલં તદા ।
પ્રાક્ષિપત્સાગરે તૂર્ણં પુનરાગાન્મહાહવમ્

અથ દેવાન્હતાન્દૃષ્ટ્વા દ્રોણાદ્રિમગમદ્ગુરુઃ ।
તાવત્તત્ર ગિરીંદ્રં તં ન દદર્શ સુરાર્ચિતઃ

જ્ઞાત્વા દૈત્યહૃતં દ્રોણં વિષણ્ણો ભયવિહ્વલઃ ।
આગત્ય દૂરાદ્વ્યાજહ્રે શ્વાસાકુલિતવિગ્રહઃ

પલાયધ્વં પલાયધ્વં નાયં જેતું હિ શક્યતે ।
રુદ્રાંશસંભવો હ્યેષ સ્મરધ્વં શક્રચેષ્ટિતમ્

શ્રુત્વા તદ્વચનં દેવા ભયવિહ્વલિતાસ્તદા ।
દૈત્યૈસ્તૈર્વધ્યમાનાસ્તે પલાયંત દિશો દશ

દેવાન્વિદારિતાન્દૃષ્ટ્વા દૈત્યઃ સાગરનંદનઃ ।
શંખભેરીજયરવૈઃ પ્રવિવેશામરાવતીમ્

પ્રવિષ્ટે નગરં દૈત્યે દેવાઃશક્રપુરોગમાઃ ।
સુવર્ણાદ્રિગુહાં પ્રાપ્ય ન્યવસન્દૈત્યતાપિતાઃ

તતશ્ચ સર્વેષ્વસુરાધિકારેષ્વિંદ્રાદિકાનાં વિનિવેશયત્તદા ।
શુંભાદિકાન્દૈત્યવરાન્પૃથક્પૃથક્સ્વયં સુવર્ણાદ્રિગુહામગાત્પુનઃ

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્તિકમાહાત્મ્યે અમરાવતીવિજયોનામ સપ્તનવતિતમોઽધ્યાયઃ