પદ્મ પુરાણ · અધ્યાય 6.98

નારદ ઉવાચ-
પુનર્દૈત્યં સમાયાંતં દૃષ્ટ્વા દેવાઃ સવાસવાઃ ।
ભયપ્રકંપિતાઃ સર્વે વિષ્ણું સ્તોતું પ્રચક્રમુઃ

દેવા ઊચુઃ।
નમો મત્સ્યકૂર્માદિ નાનાસ્વરૂપૈઃ સદાભક્તકાર્યોદ્યતાયાર્તિહંત્રે ।
વિધાત્રાદિસર્ગસ્થિતિધ્વંસકર્ત્રે ગદાશંખપદ્મારિહસ્તાયતેઽસ્તુ

રમાવલ્લભાયાસુરાણાં નિહંત્રે ભુજંગાદિનાથાય પીતાંબરાય ।
મખાદિક્રિયાપાકકર્ત્રે વિકર્ત્રે શરણ્યાય તસ્મૈ નતાઃ સ્મો નતાઃ સ્મઃ

નમો દૈત્યસંતાપિતા મર્ત્યદુઃખાચલધ્વંસ દંભોલયે વિષ્ણવેતે ।
ભુજંગેશતલ્પેશયાયાર્કચંદ્ર દ્વિનેત્રાય તસ્મૈ નતાસ્મો નતાઃ સ્મઃ

નારદ ઉવાચ-
સંકષ્ટનાશનં સ્તોત્રં નિત્યં યસ્તુ પઠેન્નરઃ ।
સ કદાચિન્નસંકષ્ટૈ પીડ્યતે કૃપયા હરેઃ

ઇતિ દેવાઃ સ્તુતિં યાવત્કુર્વંતિ દનુજદ્વિષઃ ।
તાવત્સુરાણામાપત્તિર્વિજ્ઞાતા વિષ્ણુના તદા

સહસોત્થાય દૈત્યારિઃ કૃપયા ખિન્નમાનસઃ ।
આરુહ્ય ગરુડં વેગાલ્લક્ષ્મીં વચનમબ્રવીત્

વિષ્ણુરુવાચ-
જલંધરેણ તે ભ્રાત્રા દેવાનાં કદનં કૃતમ્ ।
તૈરાહૂતો ગમિષ્યામિ યુદ્ધાયાદ્ય ત્વરાન્વિતઃ

લક્ષ્મીરુવાચ-
અહં તે વલ્લભા નાથ ભક્તા ચ યદિ સર્વદા ।
તત્કથં તે મમ ભ્રાતા યુદ્ધે વધ્યઃ કૃપાનિધે

શ્રીભગવાનુવાચ-
રુદ્રાંશસંભવત્વાચ્ચ બ્રહ્મણો વચનાદપિ ।
પ્રીત્યા ચ તવ નૈવાયં મમ વધ્યો જલંધરઃ

નારદ ઉવાચ-
ઇત્યુક્ત્વા ગરુડારૂઢઃ શંખચક્રગદાસિભૃત્ ।
વિષ્ણુર્વેગાદ્યયૌ યોદ્ધું યત્ર દેવાઃ સ્તુવંતિ તે

અથારુણાનુજાત્યુગ્રપક્ષવાતપ્રપીડિતાઃ ।
વાત્યાવિવર્તિતા દૈત્યા બભ્રમુઃ ખે યથા ઘનાઃ

તતો જલંધરો દૃષ્ટ્વા દૈત્યાન્વાત્યા પ્રપીડિતાન્ ।
નોવાચ વચનં ક્રોધાત્તતો વિષ્ણું સમભ્યયાત્

તતઃ સમભવદ્યુદ્ધં વિષ્ણુદૈત્યેંદ્રયોર્મહત્ ।
આકાશં કુર્વતોર્બાણૈરંતે નિરવકાશવત્

વિષ્ણુર્દૈત્યસ્ય બાણૌઘૈર્ધ્વજં ચ્છત્રં ધનુર્હયાન્ ।
ચિચ્છેદ તં ચ હૃદયે બાણેનૈકેનતાડયન્

તતો દૈત્યં સમુત્પત્ય ગદાપાણિસ્ત્વરાન્વિતઃ ।
આગત્ય ગરુડં મૂર્ધ્નિ પાતયામાસ ભૂતલે

વિષ્ણુર્ગદાં ચ ખડ્ગેન ચિચ્છેદ પ્રહસન્નિવ ।
તાવત્સ સુહૃદે વિષ્ણું જઘાન દૃઢમુષ્ટિના

તતસ્તૌ બાહુયુદ્ધેન યુયુધાતે મહાબલૌ ।
બાહુભિર્મુષ્ટિભિશ્ચૈવ જાનુભિર્નાદયન્મહીમ્

એવં સુરુચિરં યુદ્ધં કૃત્વા વિષ્ણુઃ પ્રતાપવાન્ ।
ઉવાચ દૈત્યરાજાનં મેઘગંભીરયા ગિરા

વિષ્ણુરુવાચ-
વરં વરય દૈત્યેંદ્ર પ્રીતોઽસ્મિ તવ વિક્રમાત્ ।
અદેયમપિ તે દદ્મિ યત્તે મનસિ વર્તતે

જલંધર ઉવાચ-
યદિ ભાવુકતુષ્ટોઽસિ વરમેતં દદસ્વ મે ।
મદ્ભગિન્યા સહ તયા મદ્ગૃહે સગણો વસ

નારદ ઉવાચ-
તથેત્યુક્ત્વા સ ભગવાન્સર્વદેવગણૈઃ સહ ।
જલંધરં નામ પુરમગમદ્રમયા સહ

જલંધરશ્ચ દેવાનામધિકારેષુ દાનવાન્ ।
સ્થાપયિત્વા સહર્ષઃ સન્પુનરાગાન્મહીતલે

દેવગંધર્વસિદ્ધેષુ યત્કિંચિદ્રત્નસંજ્ઞિતમ્ ।
તદાત્મવશગં કૃત્વા તિષ્ઠત્સાગરનંદનઃ

પાતાલભવને દૈત્યં નિશુંભં ચ મહાબલમ્ ।
સ્થાપયિત્વા સ શેષાદીનનયદ્ભૂતલં બલી

દેવગંધર્વસિદ્ધૌઘાન્યક્ષરાસમાનુષાન્ ।
સ્વપુરે નાગરાન્કૃત્વા શશાસ ભુવનત્રયમ્

એવં જલંધરઃ કૃત્વા દેવાંશ્ચ વશવર્ત્તિનઃ ।
ધર્મેણ પાલયામાસ પ્રજાઃ પુત્રાનિવૌરસાન્

ન કશ્ચિત્વ્યાધિતો નૈવ દુઃખિતો ન કૃશસ્તથા ।
ન દીનો દૃશ્યતે તસ્મિન્ધર્માદ્રાજ્યં પ્રશાસતિ

એવં મહીં શાસતિ દાનવેંદ્રે ધર્મેણ સમ્યક્ચ યદૃચ્છયાહમ્ ।
કદાચિદાગામથ તસ્ય લક્ષ્મીં વિલોકિતું શ્રીરમણં ચ સેવિતુમ્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્ત્તિકમાહાત્મ્યે શ્રીકૃષ્ણસત્યભામાસંવાદે જલંધરપ્રવેશોનામ અષ્ટનવતિતમોઽધ્યાયઃ