Padma Purana · Chapter 6.97

nārada uvāca-
ye devairnirjitāḥ pūrvaṃ daityāḥ pātālasaṃsthitāḥ

te hi bhūmaṃḍalaṃ jātā nirbhayāstamupāsitum /
kadācicchinnaśirasaṃ rāhuṃ dṛṣṭvā sa daityarāṭ /
papraccha bhārgavaṃ vipraṃ kenedaṃ vihitaṃ prabho

bhārgavastasya śirasaśchedaṃ rāhoḥ śaśaṃsa ha /
amṛtārthaṃ samudrasya mathanaṃ devakāritam

ratnāpaharaṇaṃ caiva daityānāṃ ca parābhavam /
tacchrutvā krodharaktākṣaḥ svapiturmathanaṃ tadā

sa dūtaṃ preṣayāmāsa ghasmaraṃ śakrasaṃnidhau /
dūtastriviṣṭapaṃ gatvā sudharmāṃ prāpya satvaram

garvādakharvamaulistu deveṃdraṃ vākyamabravīt /
dūta uvāca-
jalaṃdharo'bdhitanayaḥ sarvadaityajaneśvaraḥ

dūto'haṃ preṣitastena sa yadāha śṛṇuṣva tat /
kasmāttvayā mama pitā mathitaḥ sāgaro'driṇā

nītāni sarvaratnāni tāni śīghraṃ prayaccha me /
iti dūtavacaḥ śrutvā vismitastridaśādhipaḥ /
uvāca ghasmaraṃ ghoraṃ bhayaroṣasamanvitaḥ

īśvara uvāca-
śṛṇu dūta mayā pūrvaṃ mathitaḥ sāgaro yathā /
adrayo madbhayādbhītāḥ svakukṣisthāstathā kṛtāḥ

anye'pi maddviṣastena rakṣitā ditijāstathā /
tasmāttadratnajātaṃ tu mayāpyapahṛtaṃ kila

śaṃkho'pyevaṃ purā devānadviṣatsāgarātmajaḥ /
mamānujena nihataḥ praviṣṭaḥ sāgarodaram

tadgaccha kathayasvāsyasarvaṃ mathanakāraṇam

nārada uvāca-
itthaṃ visarjito dūtastadeṃdreṇāgamadgṛham /
tadiṃdravacanaṃ daityarājāyākathayattadā

tanniśamya tadā daityo roṣātprasphuritādharaḥ /
udyogamakarottūrṇaṃ sarvadevajigīṣayā

tadodyoge sureṃdrasya digbhyaḥ pātālatastathā /
ditijāḥ pratyapadyaṃta śataśaḥ koṭiśastathā

atha śuṃbhaniśuṃbhādyairbalādhipatikoṭibhiḥ /
gatvā triviṣṭapaṃ daityo yuddhāyādhiṣṭhito'bhavat

niryayustvamarāvatyā devā yuddhāya daṃśitāḥ /
puramāvṛtya tiṣṭhaṃti dṛṣṭvā daityabalaṃ mahat

tataḥ samabhavadyuddhaṃ devadānavasenayoḥ /
muśalaiḥ parighairbāṇairgadāparaśuśaktibhiḥ

te'nyonyaṃ samadhāvetāṃ jaghnatuśca parasparam /
kṣaṇenābhavatāṃ sene rudhiraugha pariplute

patitaiḥ pātyamānaiśca gajāśvarathapattibhiḥ /
vyarājata raṇe bhūmiḥ saṃdhyābhrapaṭalairiva

tatra yuddhe hatāndaityānbhārgavastūdatiṣṭhayat /
vidyayā'mṛtajīvinyā maṃtritaistoyabiṃdubhiḥ

devāstatra tathā yuddhe jīvayedaṃgirassutaḥ /
divyauṣadhīḥ samānīya droṇadeśyāḥ punaḥ punaḥ

dṛṣṭvā devāṃstathā yuddhe punareva samutthitān /
jalaṃdharaḥ krodhavaśo bhārgavaṃ vākyamabravīt

jalaṃdhara uvāca-
mayā devā hatā yuddhe uttiṣṭhaṃti kathaṃ punaḥ /
tava saṃjīvanīvidyā naivānyatreti viśrutam

bhṛguruvāca-
divyauṣadhīḥ samānīya droṇādreraṃgirāḥ surān /
jīvayatyeṣa vai śīghraṃ droṇādriṃ samapāhara

nārada uvāca-
ityuktaḥ sa tu daityeṃdro nītvā droṇācalaṃ tadā /
prākṣipatsāgare tūrṇaṃ punarāgānmahāhavam

atha devānhatāndṛṣṭvā droṇādrimagamadguruḥ /
tāvattatra girīṃdraṃ taṃ na dadarśa surārcitaḥ

jñātvā daityahṛtaṃ droṇaṃ viṣaṇṇo bhayavihvalaḥ /
āgatya dūrādvyājahre śvāsākulitavigrahaḥ

palāyadhvaṃ palāyadhvaṃ nāyaṃ jetuṃ hi śakyate /
rudrāṃśasaṃbhavo hyeṣa smaradhvaṃ śakraceṣṭitam

śrutvā tadvacanaṃ devā bhayavihvalitāstadā /
daityaistairvadhyamānāste palāyaṃta diśo daśa

devānvidāritāndṛṣṭvā daityaḥ sāgaranaṃdanaḥ /
śaṃkhabherījayaravaiḥ praviveśāmarāvatīm

praviṣṭe nagaraṃ daitye devāḥśakrapurogamāḥ /
suvarṇādriguhāṃ prāpya nyavasandaityatāpitāḥ

tataśca sarveṣvasurādhikāreṣviṃdrādikānāṃ viniveśayattadā /
śuṃbhādikāndaityavarānpṛthakpṛthaksvayaṃ suvarṇādriguhāmagātpunaḥ

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye amarāvatīvijayonāma saptanavatitamo'dhyāyaḥ