પદ્મ પુરાણ · અધ્યાય 6.48

યુધિષ્ઠિર ઉવાચ-
વૈશાખસ્યાસિતે પક્ષે કિંનામૈકાદશી ભવેત્ ।
મહિમાનં કથય મે વાસુદેવ નમોઽસ્તુ તે

શ્રીકૃષ્ણ ઉવાચ-
સૌભાગ્યદાયિની રાજન્નિહલોકે પરત્ર ચ ।
વૈશાખકૃષ્ણપક્ષે તુ નામ્ના ચૈવ વરૂથિની

વરૂથિન્યા વ્રતેનૈવ સૌખ્યં ભવતિ સર્વદા ।
પાપહાનિશ્ચ ભવતિ સૌભાગ્યપ્રાપ્તિરેવ ચ

દુર્ભગા યા કરોત્યેનાં સા સ્ત્રી સૌભાગ્યમાપ્નુયાત્ ।
લોકાનાં ચૈવ સર્વેષાં ભુક્તિમુક્તિપ્રદાયિની

સર્વપાપહરા નૄણાં ગર્ભવાસનિકૃંતની ।
વરૂથિન્યા વ્રતેનૈવ માંધાતા સ્વર્ગતિં ગતઃ

ધુંધુમારાદયશ્ચાન્યે રાજાનો બહવસ્તથા ।
બ્રહ્મકપાલનિર્મુક્તો બભૂવ ભગવાન્ભવઃ

દશવર્ષસહસ્રાણિ તપસ્તપ્યતિ યો નરઃ ।
કુરુક્ષેત્રે રવિગ્રહે સ્વર્ણભારં દદાતિ યઃ ।
તત્તુલ્યંફલમાપ્નોતિવરૂથિન્યાવ્રતંચરન્

શ્રદ્ધાવાન્યસ્તુ કુરુતે વરૂથિન્યા વ્રતં નરઃ ।
વાંછિતં લભતે સોઽપિ ઇહલોકે પરત્ર ચ

પવિત્રા પાવની હ્યેષા મહાપાતકનાશિની ।
ભુક્તિમુક્તિપ્રદા ચૈવ કર્તૄણાં નૃપસત્તમ

અશ્વદાનાન્નૃપશ્રેષ્ઠ ગજદાનં વિશિષ્યતે ।
ગજદાનાદ્ભૂમિદાનં તિલદાનં તતોઽધિકમ્

તસ્માચ્ચ સ્વર્ણદાનં વૈ અન્નદાનં તતોઽધિકમ્ ।
અન્નદાનાત્પરં દાનં ન ભૂતં ન ભવિષ્યતિ

પિતૃદેવમનુષ્યાણાં તૃપ્તિરન્નેન જાયતે ।
તત્સમં કવિભિઃ પ્રોક્તં કન્યાદાનં નૃપોત્તમ

ધેનુદાનં ચ તત્તુલ્યમિત્યાહ ભગવાન્સ્વયમ્ ।
પ્રોક્તેભ્યઃ સર્વદાનેભ્યો વિદ્યાદાનં વિશિષ્યતે

તત્ફલં સમવાપ્નોતિ નરઃ કૃત્વા વરૂથિનીમ્ ।
કન્યાવિત્તેન જીવંતિ યે નરાઃ પાપમોહિતાઃ

પુણ્યક્ષયં તે ગચ્છંતિ નિરયં યાતનામયમ્ ।
તસ્માત્સર્વપ્રયત્નેન ન ગ્રાહ્યં કન્યકાધનમ્

યશ્ચ ગૃહ્ણાતિ લોભેન કન્યાં ક્રીત્વા ચ તદ્ધનમ્ ।
સોઽન્યજન્મનિ રાજેંદ્ર ઓતુર્ભવતિ નિશ્ચિતમ્

કન્યાં પુણ્યેન યો દદ્યાદ્યથાશક્તિ સ્વલંકૃતામ્ ।
તત્પુણ્યસંખ્યાં નૃપતે ચિત્રગુપ્તો ન શક્નુયાત્

તત્તુલ્યં ફલમાપ્નોતિ નરઃ કૃત્વા વરૂથિનીમ્ ।
કાંસ્યં માંસં મસૂરાંશ્ચ ચણકાન્કોદ્રવાંસ્તથા

શાકં મધુ પરાન્નં ચ પુનર્ભોજન મૈથુને ।
વૈષ્ણવો વ્રતકર્તા ચ દશમ્યાં દશ વર્જયેત્

દ્યૂતં ક્રીડાં ચ નિદ્રાં ચ તાંબૂલં દંતધાવનમ્ ।
પરાપવાદં પૈશુન્યં સ્તેયં હિંસાં તથા રતિમ્

ક્રોધં ચૈવાનૃતં વાક્યમેકાદશ્યાં વિવર્જયેત્ ।
કાંસ્યં માંસં સુરાં ક્ષૌદ્રં તૈલં પતિતભાષણમ્

વ્યાયામં ચ પ્રવાસં ચ પુનર્ભોજનમૈથુનમ્ ।
વૃષપૃષ્ઠં મસૂરાન્નં દ્વાદશ્યાં પરિવર્જયેત્

અનેન વિધિના રાજન્વિહિતા યૈર્વરૂથિની ।
સર્વપાપક્ષયં કૃત્વા દદ્યાત્પ્રાંતેઽક્ષયાં ગતિમ્ ।
રાત્રૌ જાગરણં કૃત્વા પૂજિતો મધુસૂદનઃ

સર્વપાપવિનિર્મુક્તાસ્તે યાંતિ પરમાં ગતિમ્ ।
તસ્માત્સર્વપ્રયત્નેન કર્તવ્યા પાપભીરુભિઃ

ક્ષપારિતનયાદ્ભીતો નરઃ કુર્યાદ્વરૂથિનીમ્ ।
પઠનાચ્છ્રવણાદ્રાજન્ગોસહસ્રફલં લભેત્ ।
સર્વપાપવિનિર્મુક્તો વિષ્ણુલોકે મહીયતે

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુમાપતિનારદસંવાદે વૈશાખકૃષ્ણવરૂથિની એકાદશી નામ અષ્ટચત્વારિંશોઽધ્યાયઃ