પદ્મ પુરાણ · અધ્યાય 6.249

શ્રીરુદ્ર ઉવાચ-
સત્રાજિતસ્ય તનયા નામ્ના સત્યા યશસ્વિની ।
પૃથિવ્યંશેન સંભૂતા ભાર્યાં કૃષ્ણસ્ય વા પરા

વૈવસ્વતી મહાભાગા કાલિંદી નામ નામતઃ ।
તૃતીયા તસ્ય ભાર્યા સા લીલાંશા સમુપસ્થિતા

વિંદાનુવિંદસ્ય સુતાં મિત્રવિંદાં શુચિસ્મિતામ્ ।
સ્વયંવરસ્થિતાં કન્યામુપયેમે જનાર્દનઃ

પાશેનૈકેન બદ્ધ્વા તાન્ વૃષભાન્સપ્તદુર્મદાન્ ।
તાં વીર્યશુલ્કાં જગ્રાહ પદ્મપત્રાયતેક્ષણઃ

સત્રાજિતો મહારત્નં સ્યમંતાખ્યં મહીપતિઃ ।
અનુજાય દદૌ સોઽયં પ્રસેનાય મહાત્મને

યયાચે તં મણિવરં કદાચિન્મધુસૂદનઃ ।
ઉવાચ વાસુદેવં તં પ્રસેનઃ પ્રસભં તદા

પ્રસેન ઉવાચ-
ભારાનષ્ટસુવર્ણાનિ નિત્યં પ્રસવતે મણિઃ ।
તસ્માત્કસ્ય ન દાતવ્યં સ્યમંતાખ્યમિદં મયા

મહાદેવ ઉવાચ-
કૃષ્ણસ્તુ તદભિપ્રાયં જ્ઞાત્વા તૂષ્ણીમુવાસ હ ।
કદાચિન્મૃગયાં કર્ત્તું કૃષ્ણઃ સર્વૈર્યદૂત્તમૈઃ

પ્રવિવેશ મહારણ્યં પ્રસેનાદ્યૈર્મહાબલૈઃ ।
પ્રત્યેકં વૈ મૃગાન્હંતુમનુયાતાઃ સહસ્રશઃ

એક એવ મહારણ્યે પ્રસેનો દૂરમાગતઃ ।
તં સિંહો દૃષ્ટમાસાદ્ય હત્વા રત્નં જહાર સઃ

તં સિંહં જાંબબાન્હત્વા મણિં ગૃહ્ય મહાબલઃ ।
પ્રવિવેશ બિલં તૂર્ણં દિવ્યસ્ત્રીભિર્નિષેવિતમ્

તસ્મિન્નસ્તંગતે સૂર્યે વાસુદેવં સહાનુગઃ ।
ચતુર્થ્યામુદિતં ચંદ્રં દૃષ્ટ્વા સ્વં પુરમાવિશત્

તતઃ સર્વે પુરજનાઃ કૃષ્ણં પ્રોચુઃ પરસ્પરમ્ ।
હત્વા પ્રસેનં ગોવિંદો મૃગવ્યાજેન કાનને

સ્યમંતકં મણિવરમગ્રહીદવિશંકયા ।
તદાકર્ણ્ય હરિસ્તસ્મિન્દ્વારકાજનભાષિતમ્

અજ્ઞલોકભયાત્સર્વૈર્યદુભિર્ગહનં યયૌ ।
દર્શયામાસ તાન્સર્વાન્સિંહેન નિહતં વને

લબ્ધાત્મશુદ્ધિસ્તત્રૈવ સંસ્થાપ્ય મહતીં ચમૂમ્ ।
એકઃ શાર્ઙ્ગગદાપાણિર્જગામ ગહનં વનમ્

દૃષ્ટ્વા મહાબિલં કૃષ્ણઃ પ્રવિવેશ વિશંકિતઃ ।
તત્ર નાના મણિવરદ્યોતિતે વિમલે ગૃહે

સુતં જાંબવતો ધાત્રી દોલામારોપ્ય લીલયા ।
દોલામુખે મણિં ધૃત્વા દોલયન્ગાયતી મુદા

સિંહઃ પ્રસેનમવધીત્સિંહો જાંબવતા હતઃ ।
સુકુમારક મા રોદીસ્તવ હ્યેષ સ્યમંતકઃ

તચ્છ્રુત્વા વાસુદેવોઽથ શંખં દધ્મૌ પ્રતાપવાન્ ।
તેન નાદેન મહતા નિર્જગામાત્ર જાંબવાન્

તયોર્યુદ્ધમભૂદ્ઘોરં દશરાત્રં નિરંતરમ્ ।
મુષ્ટિભિર્વજ્રકલ્પૈશ્ચ સર્વભૂતભયાવહમ્

કૃષ્ણસ્ય બલવૃદ્ધિં ચ તથાત્મબલસંક્ષયમ્ ।
અવેક્ષ્ય પૂર્વવચનં બુબુધે પરમાત્મનઃ

સોઽયં રામોઽવતીર્ણોઽત્ર ધર્મત્રાણાય વૈ પુનઃ ।
સ આગતો મમ સ્વામી દાતું મમ મનોરથમ્

એવં જ્ઞાત્વાથ ઋક્ષેશો નિર્વર્ત્ય રણકર્મ તત્ ।
પ્રાંજલિ પ્રાહ ગોવિંદં કો ભવાનિતિ વિસ્મયાત્

નિવર્ત્ય કદનં શૌરિઃ પ્રોચે ગંભીરયા ગિરા ।
શ્રીકૃષ્ણ ઉવાચ-
પુત્રોઽહં વસુદેવસ્ય વાસુદેવ ઇતીરિતઃ

મમરત્નં સ્યમંતાખ્યં હૃતવાંસ્ત્વં સુનિર્ભયઃ ।
તદ્દીયતાં ચ શીઘ્રં મે અન્યથા વધમેષ્યસિ

મહાદેવ ઉવાચ-
તચ્છ્રુત્વા જાંબવાન્હૃષ્ટઃ પ્રણનામાથ દંડવત્ ।
પરિણીય નમસ્કૃત્ય વિનયાત્પ્રાહ કેશવમ્

જાંબવાનુવાચ-
ધન્યોસ્મિ કૃતકૃત્યોસ્મિ તવ સંદર્શનાત્પ્રભો ।
દાસોઽહં પૂર્વભાવેન તવ દેવકિનંદન

દત્તવાનસિ ગોવિંદ કદનં પૂર્વકાંક્ષિતમ્ ।
મયેદં કદનં મોહાદ્યત્કૃતં સ્વામિના ત્વયા ।
તત્ક્ષમ્યતાં જગન્નાથ કરુણાકર શાશ્વત

મહાદેવ ઉવાચ-
ઇત્યુક્ત્વા પ્રણતો ભૂત્વા નમસ્કૃત્ય પુનઃ પુનઃ ।
નાનારત્નમયે પીઠે નિવેશ્ય વિનયાત્પ્રભુમ્

શારદાબ્જનિભૌ પાદૌ પ્રક્ષાલ્ય શુભવારિણા ।
મધુપર્કવિધાનેન પૂજયિત્વા યદૂદ્વહમ્

વસ્ત્રૈરાભરણૈર્દિવ્યૈઃ પૂજયિત્વા વિધાનતઃ ।
પુત્રીં જાંબવતીં નામ કન્યાં લાવણ્યસંયુતામ્

કન્યારત્નં દદૌ તસ્મૈ ભાર્યાર્થમમિતૌજસે ।
અન્યૈશ્ચ મણિમુખ્યૈશ્ચ સ્યમંતાખ્યં દદૌ મણિમ્

તત્રૈવોદ્વાહ્ય તાં કન્યાં પ્રહૃષ્ટપરવીરહા ।
દદૌ તસ્મૈ પરાં મુક્તિં પ્રીત્યા જાંબવતે હરિઃ

ગૃહીત્વા તનયાં તસ્ય કન્યાં જાંબવતીં મુદા ।
વિનિર્ગત્ય બિલાત્તસ્માત્પ્રયયૌ દ્વારકાં પુરીમ્

સત્રાજિતે દદૌ રત્નં સ્યમંતાખ્યં યદૂત્તમઃ ।
દુહિત્રે પ્રદદૌસોઽપિ કન્યાયૈ મણિમુત્તમમ્

માસિ ભાદ્રપદે શુક્લે ચતુર્થ્યાં ચંદ્રદર્શનમ્ ।
મિથ્યાભિદૂષણં પ્રાહુસ્તસ્માત્તત્પરિવર્જયેત્

પ્રાપ્યતે દર્શનં તત્ર ચતુર્થ્યાં શીતગોર્નરઃ ।
સ્યમંતસ્ય કથાં શ્રુત્વા મિથ્યાવાદાત્પ્રમુચ્યતે

સુલક્ષ્મણાં નાગ્નજિતીં સુશીલાં ચ યશસ્વિનીમ્ ।
મદ્રરાજસુતાસ્તિસ્રઃ કન્યકાસ્તાઃ શુભાનનાઃ

સ્વયંવરસ્થાસ્તાઃ કૃષ્ણં વરયામાસુરુજ્જ્વલાઃ ।
એકસ્મિન્દિવસે તાસ્તુ ઉપયેમે યદૂદ્વહઃ

અષ્ટૌ મહિષ્યસ્તાઃ સર્વા રુક્મિણ્યાદ્યા મહાત્મનઃ ।
રુક્મિણી સત્યભામા ચ કાલિંદી ચ શુચિસ્મિતા

મિત્રવિંદા જાંબવતી નાગ્નજિત્યઃ સુલક્ષ્મણા ।
સુશીલા નામ તન્વંગી મહિષી ચાષ્ટમી સ્મૃતા

ભૂમિપુત્રો મહાવીર્યો નરકો નામ રાક્ષસઃ ।
જિત્વા દેવપતિં શક્રં સર્વાંશ્ચૈવ સુરાન્રણે

અદિત્યા દેવમાતુશ્ચ કુંડલે ચ સુવર્ચસી ।
બલાજ્જગ્રાહ દેવાનાં રત્નાનિ વિવિધાનિ ચ

ઐરાવતં મહેંદ્રસ્ય તથૈવોચ્ચૈઃશ્રવં હયમ્ ।
માણિક્યાદિ ધનેશસ્ય શંખપદ્મનિધિં તથા

સ્ત્રિયશ્ચાપ્સરસશ્ચૈવ હૃતવાન્ક્ષિતિનંદનઃ ।
વજ્રાદિહેતીસ્તેષાં ચ બલાદ્ધૃત્વા દિવૌકસામ્

તૈરેવ સ સુરાન્હત્વા સભાં મયવિનિર્મિતામ્ ।
ઉવાસ વ્યોમગો દિવ્યો નગર્યાં વિમલેંબરે

તતો દેવગણાઃ સર્વે પુરસ્કૃત્ય શચીપતિમ્ ।
ભયાર્તાઃ શરણં જગ્મુઃ કૃષ્ણમક્લિષ્ટકારિણમ્

કૃષ્ણોઽપિ તદુપશ્રુત્ય સર્વં નરકચેષ્ટિતમ્ ।
દેવાનામભયં દત્વા વૈનતેયં વ્યચિંતયત્

તસ્મિન્ક્ષણે હરેસ્તસ્ય વૈનતેયો મહાબલઃ ।
પ્રાંજલિઃ પુરતસ્તસ્થૌ સર્વદેવનમસ્કૃતઃ ૫૦

તમારુહ્ય દ્વિજશ્રેષ્ઠં સત્યયા સહ કેશવઃ ।
સંસ્તૂયમાનો મુનિભિઃ પ્રયયૌ રાક્ષસાલયમ્

પ્રદીપ્યમાનમાકાશે યથા સૂર્યસ્ય મંડલમ્ ।
રાક્ષસૈર્બહુભિર્યુક્તં દિવ્યૈરાભરણૈર્યુતમ્

દદર્શ તત્પુરં કૃષ્ણો દુર્ભેદ્યં ત્રિદશૈરપિ ।
તદાવરણાનિ ભગવાન્વીક્ષ્ય ચક્રેણ વીર્યવાન્

ચિચ્છેદ તેજસા દીપ્ત્યા તમાંસિ ચ દિવાકરઃ ।
તતસ્તે રાક્ષસાઃ સર્વે શતશોઽથ સહસ્રશઃ

ઉદ્યમ્ય શૂલાનિ તદા યુદ્ધાયાભિમુખં યયુઃ ।
તતસ્તુ તોમરૈર્દિવ્યૈર્ભિણ્ડિપાલૈઃ સુપટ્ટિશૈઃ

કેશવં તાડયામાસુઃ પલાલૈરિવ પાવકમ્ ।
તતસ્તુ શાર્ઙ્ગમાદાય ભગવાન્ગરુડધ્વજઃ

દિવ્યશસ્ત્રાણિ ચિચ્છેદ બાણૈરગ્નિશિખોપમૈઃ ।
તેષાં શિરોધરા નાગાનશ્વાંશ્ચૈવ તરસ્વિનઃ

ચક્રેણૈવ પ્રચિચ્છેદ વીર્યવાન્પુરુષોત્તમઃ ।
કેચિચ્ચક્રેણ સંછિન્નાસ્તથાન્યે શરતાડિતાઃ

ગદયા નિહતાઃ કેચિદ્રાક્ષસાસ્તદ્રણાજિરે ।
એવં તે રાક્ષસાઃ સર્વે પાતિતા ધરણીતલે

શક્રોત્સૃષ્ટેન વજ્રેણ નિર્ભિન્ના ઇવ ભૂધરાઃ ।
નિહત્ય દાનવાન્સર્વાન્પુંડરીકાયતેક્ષણઃ

પાઞ્ચજન્યં મહાશંખં પ્રદધ્મૌ પુરુષોત્તમઃ ।
તતઃ સ નરકો દૈત્યો ધનુરાદાય વીર્યવાન્

દિવ્યં સ્યંદનમારુહ્ય યયૌ યુદ્ધાય કેશવમ્ ।
તયોર્યુદ્ધમભૂદ્ઘોરં તુમુલં લોમહર્ષણમ્

બહુભિર્બાણસાહસ્રૈર્મેઘયોરિવ વર્ષતોઃ ।
તતોઽર્દ્ધચંદ્ર બાણેન વાસુદેવઃ સનાતનઃ

તસ્ય રાક્ષસમુખ્યસ્ય ધનુશ્ચિચ્છેદ વીર્યવાન્ ।
સસર્જાસ્ત્રં મહાદિવ્યં નરકસ્ય મહોરસિ

સ તેન ભિન્નહૃદયઃ પપાતોર્વ્યાં મહાસુરઃ ।
શક્રવજ્રેણ નિર્ભિન્નો મહાચલ ઇવોન્નદન્

ઉપગમ્ય તતઃ કૃષ્ણઃ સમીપં તસ્ય રક્ષસઃ ।
ભૂમ્યા સંપ્રાર્થિતઃ પ્રાહ વરં વૃણ્વિતિ રાક્ષસમ્ ।
સ ચાહ રાક્ષસઃ કૃષ્ણં ગરુડોપરિ સંસ્થિતમ્

ન મે કૃત્યં વરેણાસ્તિ નરકોઽહં તથાપિ ચ ।
અન્યલોકહિતાર્થાય વૃણેઽહં વરમુત્તમમ્

મૃતાહનિ તુ મે કૃષ્ણ સર્વભૂતેશ્વરેશ્વર ।
યે નરા મંગલસ્નાનં કુર્વંતિ મધુસૂદન ।
ન તેષાં નિરયપ્રાપ્તિર્ભવત્વેવં ભયાપહ

મહાદેવ ઉવાચ-
એવમસ્ત્વિતિ ગોવિંદો દદૌ તસ્મૈ વરં પ્રભુઃ ।
તતઃ પશ્યન્હરેઃ સાક્ષાચ્છરદંબુજ સન્નિભૌ

ચરણૌ વજ્રવૈડૂર્ય્યનૂપુરાભ્યાં વિરાજિતૌ ।
અર્ચિતૌ વિધિરુદ્રાદ્યૈસ્ત્રિદશૈર્મુનિભિસ્તથા

ત્યક્ત્વા પ્રાણાન્મહીપુત્રઃ સારૂપ્યમગમદ્ધરેઃ ।
તતો દેવગણાઃ સર્વે હર્ષનિર્ભરમાનસાઃ

વવૃષુઃ પુષ્પવર્ષાણિ તુષ્ટુવુશ્ચ મહર્ષયઃ ।
પ્રવિશ્ય નગરં તસ્ય કૃષ્ણઃ કમલલોચનઃ

બલાત્તેન ગૃહીતાનિ રત્નાનિ ત્રિદિવૌકસામ્ ।
કુંડલે દેવમાતુશ્ચ તથૈવોચ્ચૈઃશ્રવો હયમ્

ઐરાવતં ગજશ્રેષ્ઠં પ્રદીપ્તં મણિપર્વતમ્ ।
સર્વમેતદ્યદુશ્રેષ્ઠો દદૌ શક્રાય વજ્રિણે

પાર્થિવાન્સર્વરાષ્ટ્રેભ્યો જિત્વાઽસૌ નરકો બલી ।
કન્યાષોડશસાહસ્રં હૃતવાન્નરકસ્તદા

સન્નિરુદ્ધાસ્તુ તાઃ સર્વા નરકાંતઃપુરે તદા ।
દૃષ્ટ્વા કૃષ્ણં મહાવીર્યં કંદર્પશતસંનિભમ્

ભર્તારં વવ્રિરે સર્વાઃ પતિં વિશ્વસ્ય સર્વગમ્ ।
એતસ્મિન્નેવ કાલે તુ ગોવિંદોઽનંતરૂપવાન્

તાસાં કરગ્રહં ચક્રે વિધિના પુરુષોત્તમઃ ।
નરકસ્ય સુતાઃ સર્વે પુરસ્કૃત્ય મહીં તદા

ગોવિંદં શરણં જગ્મુસ્તાનરક્ષદ્ઘૃણાનિધિઃ ।
તદ્રાજ્યે સ્થાપ્ય તાન્સર્વાન્પૃથિવ્યા વાક્ય ગૌરવાત્

ઐન્દ્રં વિમાનમારોપ્ય તાશ્ચ સર્વા વરસ્ત્રિયઃ ।
દેવદૂતૈર્મહાભાગૈર્દ્વારવત્યાં ન્યવેશયત્

વૈનતેયં સમારુહ્ય સત્યયા સહ કેશવઃ ।
સ્વર્લોકં પ્રયયૌ તૂર્ણં દ્રષ્ટું તાં દેવમાતરમ્

પ્રવિશ્ય નગરીં તત્ર દેવરાજ્ઞો જનાર્દનઃ ।
અવરુહ્ય દ્વિજશ્રેષ્ઠાત્પત્ન્યા સહ મહાબલઃ

વવંદે માતરં તત્ર વંદ્યાં તાં ત્રિદિવૌકસામ્ ।
સંપરિષ્વજ્ય બાહુભ્યામદિતિઃ પુત્રવત્સલા

નિવેશ્યાસનમુખ્યે તુ પૂજયામાસ ભક્તિતઃ ।
આદિત્યા વસવો રુદ્રાઃ શતક્રતુપુરોગમાઃ

તત્ર સંપૂજયામાસુર્યથાર્હં પરમેશ્વરમ્ ।
શચીગૃહં સમાગમ્ય સત્યભામા યશસ્વિની

તયા સમર્ચિતા દેવ્યા સમાસીના સુખાસને ।
તસ્મિન્કાલે સુપુષ્પાણિ પારિજાતસ્ય કિંકરાઃ

શચ્યૈ દેવ્યૈ દદુઃ પ્રીત્યા સહસ્રાક્ષેણ ચોદિતાઃ ।
પ્રગૃહ્ય તાનિ પુષ્પાણિ શચીદેવી સુમધ્યમા

નીલનિર્મલકેશે ચ બબંધ સ્વસ્ય મૂર્ધનિ ।
અવમાન્ય શચી તત્ર સત્યભામાં યશસ્વિનીમ્

અનર્હા માનુષી ચેયં દેવાર્હં કુસુમં શુભમ્ ।
ઇતિ કૃત્વા મતિં તસ્યૈ ન દદૌ કુસુમાનિ સા

વિનિષ્ક્રમ્ય પુરાત્તસ્માત્સત્યા કોપસમન્વિતા ।
સમેત્ય કૃષ્ણં ભર્ત્તારમુવાચ કમલેક્ષણા

સત્યોવાચ-
એષા શચી યદુશ્રેષ્ઠ પારિજાતેન ગર્વિતા ।
અદત્ત્વા મમ ગોવિંદ બબંધ સ્વસ્ય મૂર્દ્ધનિ

મહાદેવ ઉવાચ-।
સત્યયા ભાષિતં શ્રુત્વા વાસુદેવો મહાબલઃ ।
ઉત્પાટ્ય પારિજાતં તુ નિવેશ્ય ગરુડોપરિ

આરુહ્ય સત્યયા તૂર્ણં વૈનતેયં મહાબલમ્ ।
પ્રયયૌ દ્વારકાં રમ્યાં નગરીં દેવકીસુતઃ

તતઃ કોપસમાવિષ્ટો દેવરાજઃ શતક્રતુઃ ।
રુદ્રૈર્વસુભિરાદિત્યૈઃ સાધ્યૈશ્ચ મરુતાં ગણૈઃ

ઐરાવતં સમારુહ્ય યયૌ યુદ્ધાય કેશવમ્ ।
તતો દેવગણાઃ સર્વે પરિવાર્ય્ય જનાર્દનમ્

વવૃષુઃ શસ્ત્રવર્ષાણિ મેઘા ઇવ મહાચલમ્ ।
કૃષ્ણશ્ચિચ્છેદ ચક્રેણ તાન્યસ્ત્રાણિ દિવૌકસામ્

વૈનતયસ્તુ સંક્રુદ્ધઃ પક્ષપાતેન વીર્યવાન્ ।
પાતયામાસ તાન્દેવાન્પલાલાનીવ મારુતઃ

તતઃ ક્રુદ્ધઃ સહસ્રાક્ષો દેવાનામીશ્વરઃ પ્રભુઃ ।
મુમોચ સહસા દીપ્તં વજ્રં કૃષ્ણજિઘાંસયા

જગ્રાહ કૃષ્ણસ્તં વજ્રં હસ્તેનૈકેન લીલયા ।
તતો ભીતઃ સહસ્રાક્ષો નાગેંદ્રાદવરુહ્ય સઃ

પ્રાંજલિઃ પુરતઃ સ્થિત્વા નમસ્કૃત્વા જનાર્દનમ્ ।
પ્રાહ ગદ્ગદયા વાચા સ્તુત્વા સ્તુતિભિરેવ ચ ૧૦૦

ઇંદ્ર ઉવાચ-
દેવયોગ્યમિદં કૃષ્ણ પારિજાતં ત્વયા પુરા ।
દત્તો મમ સુરાણાં ચ કથં સ્થાસ્યતિ માનુષે

મહાદેવ ઉવાચ-
તતઃ પ્રોવાચ ભગવાન્સહસ્રાક્ષમુપસ્થિતમ્ ।
શચ્યાવમાનિતા સત્યા તવ ગેહે સુરેશ્વર

અદત્ત્વા પારિજાતાનિ સત્યાયૈ સા પુલોમજા ।
સ્વયમેવ સ્વશિરસિ ધારયામાસ તે પ્રિયા

અસ્યા નિમિત્તં દેવેંદ્ર પારિજાતો હૃતો મયા ।
અસ્યૈ પ્રતિશ્રુતં દાતું મયા સુરગણેશ્વર

તવ ગેહે પારિજાતં સ્થાપયામીતિ વાસવ ।
તસ્માદદ્ય ન દાતવ્યઃ પારિજાતઃ સુરેશ્વર

દેવતાનાં હિતાર્થાય પ્રાપયિષ્યામિ ભૂતલે ।
તાવત્તિષ્ઠતુ દેવેંદ્ર પારિજાતો મમાલયે

મયિ સ્વર્ગં ગતે શક્ર ગૃહાણ ત્વં યથેચ્છયા ।
મહાદેવ ઉવાચ-
એવમુક્ત્વા યદુશ્રેષ્ઠસ્તસ્મૈ વજ્રં દદૌ સ્વયમ્

એવમસ્ત્વિતિ ગોવિંદં નમસ્કૃત્ય સ વજ્રભૃત્ ।
પ્રયયૌ સ્વપુરં દિવ્યં સહ દેવગણૈર્વૃતઃ

કૃષ્ણોઽપિ સત્યયા દેવ્યા ગરુડોપરિ સંસ્થિતઃ ।
સંસ્તૂયમાનો મુનિભિર્દ્વારવત્યાં વિવેશ હ

સત્યયા નિકટે સ્થાપ્ય પારિજાતં સુરદ્રુમમ્ ।
રમયામાસ ભાર્યાભિઃ સર્વાભિઃ સર્વગો હરિઃ

નિશાસુ તાસાં સર્વાસાં ગૃહેષુ મધુસૂદનઃ ।
વિશ્વરૂપધરઃ શ્રીમાનુવાસ સ સુખપ્રદઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ।
ઉમામહેશ્વરસંવાદે શ્રીકૃષ્ણચરિતે શ્રીવાસુદેવવિવાહકથનં નામૈકોનપંચાશદધિકદ્વિશતતમોઽધ્યાયઃ