પદ્મ પુરાણ · અધ્યાય 6.248

રુદ્ર ઉવાચ-
અથ કૃષ્ણસ્તુ રામેણ રુક્મિણ્યા દારુકેણ ચ ।
દિવ્યં સ્યંદનમારુહ્ય યયૌ તૂર્ણં સ્વમાલયમ્

તતઃ પ્રવિશ્ય નગરીં દ્વારકાં દેવકીસુતઃ ।
શુભેહ્રિ શુભલગ્ને વૈ વેદોક્તવિધિના હરિઃ

ઉપયેમે નૃપસુતાં રુક્મિણીં રુક્મભૂષિતામ્ ।
તસ્મિન્નુદ્વાહસમયે દેવદુંદુભયો દિવિ

વિનેદુઃ પુષ્પવર્ષાણિ વવૃષુઃ સુરસત્તમાઃ ।
વસુદેવોગ્રસેનૌ ચ તથાક્રૂરો યદૂત્તમઃ

બલભદ્રો મહાતેજા યે ચાન્યે યદુપુંગવાઃ ।
ચક્રુઃ કૃષ્ણસ્ય રુક્મિણ્યા વિવાહં સુસુખં યથા

નંદગોપોથ ગોપાલૈર્ગોપવૃંદૈઃ સમાગતઃ ।
સ્વલંકૃતાભિર્યોષાભિર્યશોદા ચ સમાગતા

વસુદેવસ્ત્રિયઃ સર્વા દેવકીપ્રમુખાસ્તથા ।
રેવતી રોહિણી દેવી યાશ્ચાન્યાઃ પુરયોષિતઃ

સર્વાણ્યુદ્વાહકર્માણિ ચક્રુર્હર્ષસમન્વિતાઃ ।
સુરાણામર્ચનં પ્રીત્યા કર્ત્તવ્યં તત્ર દેવકી

વૃદ્ધાભિર્નૃપયોષિદ્ભિશ્ચકાર વિધિના તદા ।
સર્વમૌદ્વાહિકં કર્મ ઉત્સવં હિ દ્વિજોત્તમૈઃ

બ્રાહ્મણાન્ભોજયામાસ વસ્ત્રૈરાભરણૈઃ શુભૈઃ ।
ઉગ્રસેનાદયસ્તત્ર રાજાનશ્ચ સુપૂજિતાઃ

નંદગોપાદયો ગોપા યશોદાદ્યાશ્ચ યોષિતઃ ।
બહુભિઃ સ્વર્ણરત્નાદ્યૈર્વાસોભિઃ સવિભૂષણૈઃ

પૂજિતાઃ સંપ્રહૃષ્ટાસ્તે તદ્વિવાહમહોત્સવે ।
તૌ દંપતી સમાશ્લિષ્ય પ્રણતૌ જાતવેદસમ્

વેદવિદ્ભિર્વિપ્રમુખ્યૈરાશીર્ભિરભિનંદિતૌ ।
તસ્યાં વિવાહવેદ્યાં તુ શુશુભાતે વધૂવરૌ

બ્રાહ્મણેભ્યોઽથ વૃદ્ધેભ્યો રાજન્યઃ સહ ભાર્ય્યયા ।
વવંદે દેવકીપુત્રો જ્યેષ્ઠસ્ય ભ્રાતુરેવ ચ

એવમૌદ્વાહિકં સર્વં નિર્વર્ત્ય મધુસૂદનઃ ।
વ્યસર્જયન્નૃપાન્સર્વાન્યે ચ તત્ર સમાગતાઃ

પ્રસ્થિતા હરિણા તત્ર પૂજિતા નૃપપુંગવાઃ ।
બ્રાહ્મણાઃ સુમહાત્માનો નિર્યયુઃ સ્વકમાલયમ્

રુક્મિણ્યા સહ ધર્માત્મા દેવકીનંદનોઽવ્યયઃ ।
ઉવાસ સુસુખેનૈવ દિવ્યહર્મ્યતલે શુભે

તયા વૈ રમયામાસ નારાયણ ઇવ શ્રિયા ।
સંસ્તૂયમાનો મુનિભિર્દિવિ દેવગણૈરપિ

અહન્યહનિ હૃષ્ટાત્મા સુખેનૈવ જનાર્દનઃ ।
અથોવાસ સુશોભાયાં દ્વારવત્યાં સનાતનઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે શ્રીકૃષ્ણચરિતે રુક્મિણીવિવાહકથનંનામ અષ્ટાચત્વારિંશદધિકદ્વિશતતમોઽધ્યાયઃ