પદ્મ પુરાણ · અધ્યાય 6.158

મહાદેવ ઉવાચ।
પિપ્પલાદાત્તતસ્તીર્થે પિચુમંદાર્કમુત્તમમ્ ।
તીર્થં સાભ્રમતી તીરે વ્યાધિદૌર્ગંધ્યનાશનમ્

પુરા કોલાહલે યુદ્ધે દાનવૈર્નિર્જિતાઃ સુરાઃ ।
વૃક્ષેષુ વિવિશુસ્તત્ર સૂક્ષ્માઃ પ્રાણપરીપ્સયા

તત્ર બિલ્વે સ્થિતઃ શંભુરશ્વત્થે હરિરવ્યયઃ ।
શિરીષેઽભૂત્સહસ્રાક્ષો નિંબે દેવઃ પ્રભાકરઃ

એવમાદિ યથાયોગ્યં વૃક્ષેષુ વિબુધાસ્તથા ।
યાવત્કોલાહલો દૈત્યો વિષ્ણુના પ્રભવિષ્ણુના

હતો મહાહવે તાવત્સ્થિતાસ્તે વૃક્ષમાશ્રિતાઃ ।
યેનયેન હિ યો વૃક્ષો વિબુધેન સમાશ્રિતઃ

સ તુ તન્મયતાં યાતસ્તસ્માત્તં ન વિનાશયેત્ ।
ઇતિ સૂર્ય્યસ્ય વિશ્રામાત્પિચુમંદાર્કમુત્તમમ્

તીર્થંરોગહરં સ્નાનાત્સાભ્રમત્યાસ્તટેઽભવત્ ।
અત્ર ગત્વા વિશેષેણ તં રવિં યદિ પૂજયેત્

પૂજયિત્વા સુરશ્રેષ્ઠે લભતે વાંછિતં ફલમ્ ।
અત્ર દ્વાદશનામાનિ ગત્વા યે વૈ પઠંતિ ચ

તે નરાઃ પુણ્યકર્માણો યાવજ્જીવં ન સંશયઃ ।
આદિત્યં ભાસ્કરં ભાનું રવિં વિશ્વપ્રકાશકમ્

તીક્ષ્ણાંશું ચૈવ માર્તંડં સૂર્યં ચૈવ પ્રભાકરમ્ ।
વિભાવસું સહસ્રાક્ષં તથા પૂષણમેવ ચ

એવં દ્વાદશનામાનિ યઃ પઠેત્પ્રયતઃ સુધીઃ ।
ધનં વૈ પુત્રપૌત્રાંશ્ચ લભતે નગનંદિનિ

એકૈકં નામ આશ્રિત્ય યોઽર્ચયેત નરો ભુવિ ।
સપ્તજન્મભવેદ્વિપ્રો ધનાઢ્યો વેદપરાગઃ

ક્ષત્રિયો લભતે રાજ્યં વૈશ્યો ધનમવાપ્નુયાત્ ।
શૂદ્રો વૈ લભતે ભક્તિં તસ્માત્સૂક્તં પરં જપેત્

નિંબાર્કતઃ પરં તીર્થં ન ભૂતં ન ભવિષ્યતિ ।
અત્ર સ્નાત્વા ચ પીત્વા ચ મુક્તિભાગી ભવેદ્ધ્રુવમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે ઉમામહેશ્વરસંવાદે નિંબાર્કદેવતીર્થંનામાષ્ટપંચાશદધિક શતતમોઽધ્યાયઃ