પદ્મ પુરાણ · અધ્યાય 6.150

મહાદેવૌવાચ।
જંબૂતીર્થં તતો ગચ્છેત્સ્નાનાર્થં પાપનાશનમ્ ।
કલિકાલે ચ યત્પુંસાં સ્વર્ગસોપાનવત્સ્થિતમ્

યત્ર જાંબવતા પૂર્વં દશાંગે પર્વતોત્તમે ।
સ્થાપિતં ઋક્ષરાજેશં લિગં સુરગણાર્ચિતમ્

રામેણ હિ યદા પૂર્વં હતો વૈ રાવણોઽસુરઃ ।
તદા જાંબવતા દિક્ષુ ભેરીઘોષૈઃ પ્રઘોષિતમ્

જિતં વૈ રામચંદ્રેણ રાવણો નિહતો રણે ।
લબ્ધ્વા સીતેતિ સંઘુષ્ય સ્નાતં તીર્થવરે શુભે

સ્થાપિતં તત્ર લિંગં તુ સ્વનામ્ના તુ સુરેશ્વરિ ।
તત્ર સ્નાત્વા નરઃ સદ્યઃ સ્મૃત્વા રામં સહાનુજમ્

જાબવંતેશ્વરં સ્નાત્વા રુદ્રલોકે મહીયતે ।
યત્રયત્ર હિ ભો દેવિ શ્રીરામસ્મરણં કૃતમ્ ।
ભવબંધવિમોક્ષો હિ દૃશ્યતે સ ચરાચરે

અહં રામસ્તુ વિજ્ઞેયો રામો વૈ રુદ્ર એવ ચ ।
એવં જ્ઞાત્વા તુ તે દેવિ ન ભેદો વર્તતે ક્વચિત્

રામરામેતિ રામેતિ મનસા યે જપંતિ ચ ।
તેષાં સર્વાર્થસિદ્ધિશ્ચ ભવિષ્યતિ યુગેયુગે

અહં હિ સર્વદા દેવિ શ્રીરામસ્મરણં ચરે ।
યં શ્રુત્વા તુ પુનર્દેવિ ન ભવો જાયતે ક્વચિત્

કાશ્યાં હિ નિવસન્નિત્યં શ્રીરામં કમલેક્ષણમ્ ।
સ્મરામિ સતતં દેવિ ભક્ત્યા ચ વિધિપૂર્વકમ્

જાંબવતા તદા પૂર્વં સ્મૃત્વા રામં સુશોભનમ્ ।
જાંબવંતમિતિ ખ્યાતં પ્રસ્થાપ્ય જગતાં ગુરુમ્

તત્ર સ્નાત્વા ચ ભુક્ત્વા ચ કૃત્વા દેવસ્ય પૂજનમ્ ।
શિવલોકમવાપ્નોતિ યાવદિંદ્રાશ્ચતુર્દશ

અત્ર હિ સ્નાનમાત્રેણ યથા જાંબવતો બલમ્ ।
તથા વૈ બલમાપ્નોતિ શ્રીવિશ્વેશપ્રસાદતઃ

અત્ર ગત્વા તુ ભૂદાનં પુમાન્યશ્ચ કરોતિ વૈ ।
ફલં સહસ્રગુણિતં જાંબવંતેશ દર્શનાત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે જાંબવતતીર્થમાહાત્મ્યંનામ પંચાશદધિકશતતમોઽધ્યાયઃ