પદ્મ પુરાણ · અધ્યાય 3.22

નારદ ઉવાચ-
એવં તે કથિતં રાજન્નર્મદાતીર્થમુત્તમમ્ ।
પુરા ગંધર્વકન્યાનાં શાપજં ભયમુલ્બણમ્

નાશિતં તન્મહારાજ રેવાજલકણાગ્નિના ।
રેવાજલકણસ્પર્શાન્મુક્તો ભવતિ માનવઃ

યુધિષ્ઠિર ઉવાચ-
ભગવન્બહુકન્યાભિઃ શાપો લંભિ કથં કુતઃ ।
કસ્યાપત્યાનિ તાસ્તાસાં નામ કિં કીદૃશં વયઃ

કથં રેવાજલસ્પર્શાદ્વિપાકાચ્છાપસંભવાત્ ।
વિમુક્તાઃ કુત્ર તાઃ સસ્નુઃ સર્વં મે કથય પ્રભો

નર્મદાતીર્થમાહાત્મ્યં ચમત્કારકરં ભવેત્ ।
શ્રવણાદપિ પાપાનાં મલનાશનમુચ્યતે

નર્મદાનર્મદાશબ્દો યેન કેનચિદુચ્યતે ।
તસ્ય સ્યાચ્છાશ્વતી મુક્તિર્યાવદાચંદ્ર તારકમ્

વ્યાહૃતં ભવતા પૂર્વં રેવામાહાત્મ્યમુત્તમમ્ ।
તથાપિ ચરિતં સાધો યદેતત્તન્નિગદ્યતામ્

અથ ચોત્તમવાર્તાયા સેવિતવ્યા મનીષિભિઃ ।
અતઃ પૃચ્છામિ વિપ્રેંદ્ર રેવામાહાત્મ્યમુત્તમમ્ ।
ઇતિહાસં વદ વિભો કન્યાનાં ચરિતોજ્જ્વલમ્

નારદ ઉવાચ-
શ્રૂયતાં રાજશાર્દૂલ ધર્મગર્ભાપરા કથા ।
યથારણિર્વહ્નિગર્ભા ધર્મ્મસ્તુ બ્રહ્મસૂરિવ

ગંધર્વઃ શુકસંગીતિસ્તસ્ય કન્યા પ્રમોહિની ।
સુશીલસ્ય સુશીલા ચ સુસ્વરા સ્વરવેદિનઃ

સુતારા ચંદ્રકાંતસ્ય ચંદ્રિકા સુપ્રભસ્ય ચ ।
ઇમાનિ વરનામાનિ તાસામપ્સરસાં નૃપ

કુમાર્યઃ પંચ સર્વાસ્તા વયસા સુભગાઃ પુનઃ ।
ભાષંતે ચ મિથસ્તાસ્તુ ભગિન્ય ઇવ સર્વદા

ચંદ્રાદિવ વિનિષ્ક્રાંતાશ્ચંદ્રિકા ઇવ સોજ્જ્વલાઃ ।
ચંદ્રાનનાઃ સુકેશ્યશ્ચ ચંદ્રકાંતાઇવોજ્જ્વલાઃ

દેવેષ્વેતા વિલાસિન્યઃ કૌમુદ્યઃ કૈરવેષ્વિવ ।
લાવણ્યપિંડસંભૂતા દિવ્યરૂપા મનોહરાઃ

ઉદ્ભિન્નકુચપદ્મિન્યઃ કેતક્ય ઇવ માધવે ।
ઉત્પન્નયૌવનૈઃ કાંતા વલ્લીવ નવપલ્લવૈઃ

હેમગૌરાશ્ચ હેમાભા હેમાભરણભૂષિતાઃ ।
હેમચંપકમાલિન્યો હેમચ્છવિસુવાસસઃ

સ્વરગ્રામાવલીહાસુ વિવિધા મૂર્ચ્છનાસુ ચ ।
તાલવાદ્યવિનોદેષુ વેણુવીણાપ્રવાદને

મૃદંગનાદસંભિન્નલાસ્યમધ્યલયેષુ ચ ।
ચિત્રાદિષુ વિનોદેષુ કલાસુ ચ વિશારદાઃ

એવંભૂતાશ્ચ તાઃ કન્યા મુમુહુઃ ક્રીડનૈર્વરૈઃ ।
પિતૃભિર્લાલિતાઃ સર્વાશ્ચેરુશ્ચ ધનદાલયે

કૌતુકાદેકદા પંચ મિલિત્વા માસિ માધવે ।
કન્યા મંદારપુષ્પાણિ વિચિન્વંત્યો વનાદ્વનમ્

ગૌરીં સમારાધયિતું સ્વરાંગનાઃ કદાચિદચ્છોદસરોવરં યયુઃ ।
હેમાંબુજાનિ પ્રવરાણિ તાઃ પુનસ્તસ્માદુપાદાય વરોત્પલૈઃ સહ

વૈડૂર્યશુદ્ધસ્ફટિકપ્રકુટ્ટિમે સ્નાત્વા તુ ઘટ્ટે પરિધાય ચાંબરમ્ ।
મૌનેન ચ સ્થંડિલપિંડિકામયીં સુવર્ણમુક્તાભરણાં વિનિર્મમુઃ

સમર્ચિતાં ચંદનગંધકુંકુમૈરભ્યર્ચ્ય ગૌરીં વરપંકજાદિભિઃ ।
નાનોપહારૈઃ શુભભક્તિભાવિતા લાસ્યપ્રયોગૈર્નનૃતુઃ કુમારિકાઃ

ગાંધર્વમાશ્રિત્ય પરં સ્વરં તતો ગેયં સ્વભાવધ્વનિભિઃ સમૂર્છનમ્ ।
એણીદૃશસ્તાઃ પ્રજગુઃ કલાક્ષરં તારપ્રવૃદ્ધં ગતિભિશ્ચ સુસ્વરમ્

તસ્મિન્સુભાવે રસવર્ષહર્ષં કન્યાસ્વલં નિર્ભરચિત્તવૃત્તિષુ ।
અચ્છોદતીર્થે પ્રવરે તદાગતઃ સ્નાતું મુનેર્વેદનિધેઃ સુતોગ્રજઃ

રૂપેણ નિઃસીમતરો વરાનનઃ પ્રફુલ્લપદ્માયતલોચનો યુવા ।
વિસ્તીર્ણવક્ષાઃ સુભુજોઽતિસુંદરઃ શ્યામચ્છવિઃ કામૈવાપરો હિ સઃ

સ બ્રહ્મચારી સુશિખો હિ શોભતે દંડેન યુક્તો ધનુષેવ મન્મથઃ ।
એણાજિનપ્રાવરણઃ સમુદ્રધૃઘેમાભમૌંજીકટિમેખલઃ પરઃ

તં દૃષ્ટ્વા બ્રાહ્મણં બાલાસ્તાસ્તત્ર સરસસ્તટે ।
જહૃષુઃ કૌતુકાવિષ્ટા અયં નો ભવિતાતિથિઃ

સંત્યક્તગીતનૃત્યાસ્તાસ્તસ્યાલોકનલાલસાઃ ।
હરિણ્યો લુબ્ધકેનેવ વિદ્ધાઃ કામેન સાયકૈઃ

પશ્યપશ્યેતિ જલ્પંત્યો મુગ્ધાઃ પંચ સસંભ્રમમ્ ।
તસ્મિન્વિપ્રવરે યૂનિ કામદેવભ્રમં યયુઃ

પુનઃપુનસ્તમભ્યર્ચ્ય નયનૈઃ પંકજૈરિવ ।
પશ્ચાદ્વિચારમારબ્ધમપ્સરોભિઃ પરસ્પરમ્

યદ્યયં કામદેવો હિ રતિહીનઃ કથં ભવેત્ ।
અથવાહ્યશ્વિનૌ દેવૌ તાવુભૌ યુગચારિણૌ

ગંધર્વઃ કિન્નરો વાથ સિદ્ધો વા કામરૂપધૃક્ ।
ઋષિપુત્રોઽથવા કશ્ચિત્કશ્ચિદ્વા મનુજોત્તમઃ

અસ્તિ વા કશ્ચિદેવાયં ધાત્રા સૃષ્ટો હિ નઃ કૃતે ।
યથાભાગ્યવતામર્થે નિધાનં પૂર્વકર્મભિઃ

તથાસ્માકં કુમારીણાં ગૌર્યાનીતો વરોત્તમઃ ।
કરુણાજલકલ્લોલ લબ્ધાદ્રી ર્કૃ!તચિત્તયા

મયા વૃતસ્ત્વયા ચાયં ત્વયા વૃતસ્તથાનયા ।
એવં પંચસુકન્યાસુ વદંતીષુ નૃપોત્તમ

શ્રુત્વા તદ્વચનં તત્ર કૃતમાધ્યાહ્નિકક્રિયઃ ।
ચિંતયામાસ મેધાવી કિં કૃત્વા સુકૃતં ભવેત્

ગાધિસંભવપરાશરાદયઃ કંડુદેવલમુખાશ્ચ યે દ્વિજાઃ ।
તેઽપિ યોગિ બલિનો વિમોહિતાઃ લીલયા તદબલાભિરદ્ભુતમ્

યોષિતાં નયનતીક્ષ્ણસાયકૈર્ભ્રૂલતાસુદૃઢચાપનિર્ગતૈઃ ।
ધન્વિના મકરકેતુના હતઃ કસ્ય નો પતતિ વામનો મૃગઃ

તાવદેવ નયધીર્વિરાજતે તાવદેવ જનતાભયં ભવેત્ ।
તાવદેવ ધૃતચિત્તતા ભૃશં તાવદેવ ગણના કુલસ્ય ચ

તાવદેવ તપસઃ પ્રગલ્ભતા તાવદેવ શમસેવનં નૃણામ્ ।
યાવદેવ લલનેક્ષણા સ વૈર્માદ્યતે દ્રુતમદૈર્ન પૂરુષઃ

મોહયંતિ મદયંતિ રાગિણં યોષિતઃ સ્વલલિતૈર્મનોહરૈઃ ।
મોદયંતિ મદયંતિ મામિમા ધર્મરક્ષણપરં હિ સ્વૈર્ગુણૈઃ

માંસરક્તમલમૂત્રનિર્મિતે યોષિતાં વપુષિ નિર્ગુણેઽશુચૌ ।
કામિનસ્તુ પરિકલ્પ્ય ચારુતામાવિશંતિ સુવિમૂઢચેતસઃ

દારુણા હિ પરિકીર્તિતાંગના સાધુભિર્વિમલબુદ્ધિભિર્બુધૈઃ ।
યાવદેવ ન સમીપગા ઇમાસ્તાવદેવ હિ ગૃહં વ્રજામ્યહમ્

સમીપં તસ્ય યાવન્ન આગચ્છંતિ વરસ્ત્રિયઃ ।
વૈષ્ણવેન પ્રભાવેણ તાવદંતર્દધે દ્વિજઃ

તસ્ય યોગબલાદ્ભૂપ ગતસ્યાદર્શનં તદા ।
દૃષ્ટ્વા તદદ્ભુતં કર્મ વૈષ્ણવબ્રહ્મચારિણઃ

વિત્રસ્તનયના બાલા કુરંગ્ય ઇવ કાતરાઃ ।
સંક્રાંતનયનાઃ શૂન્યા દદૃશુસ્તા દિશોદશ

કન્યા ઊચુઃ-।
ઇંદ્રજાલં સ્ફુટં વેત્તિ માયાં જાનાતિ વા પુનઃ ।
દૃષ્ટોઽપ્યદૃષ્ટરૂપોભૂદિત્યૂચુસ્તાઃ પરસ્પરમ્

વ્યાપ્તં ચ હૃદયં તાસાં તદૈવ વિરહાગ્નિના ।
જ્વલદ્દાવાનલેનેવ સુસ્નિગ્ધં સર્વકાનનમ્

ત્યજેંદ્રજાલિકાં વિદ્યાં કાંત દર્શય સત્વરમ્ ।
આત્માનં ન હિ તે યુક્તં પ્રાગ્ગ્રાસે મક્ષિકોપમમ્

હા કષ્ટં દર્શિતઃ કસ્માદ્ધાત્રા ત્વં ઘટિતઃ કુતઃ ।
જ્ઞાતં મહાનુસંતાપહેતુર્નઃ સ્વં વિનિર્મિતઃ

કચ્ચિત્તે નિર્દયં ચેતઃ કચ્ચિદસ્માસુ નો મતિઃ ।
કચ્ચિત્ક્રૂરોઽસિ હે કાંત કચ્ચિન્મુષ્ણાસિ નો મનઃ

કચ્ચિન્ન પ્રત્યયોસ્મા સુ કચ્ચિદસ્માન્પરીક્ષસે ।
કચ્ચિન્નિર્મમતા શીલઃ કચ્ચિન્માયાવિશારદઃ

કચ્ચિચ્ચિત્તે પ્રવેષ્ટું ચ વેત્સિ વિજ્ઞાનલાઘવમ્ ।
કચ્ચિન્નિષ્ક્રમણોપાયં ન જાનાસિ કુતઃ પુનઃ

કચ્ચિદ્વિનાપરાધં તુ કિમસ્માસુ પ્રકુપ્યસે ।
કચ્ચિદ્દુઃખં ન જાનાસિ પરેષાં વિપ્રલંભનમ્

ત્વદ્દર્શનં વિના નષ્ટા હૃદયેશ્વર સાંપ્રતમ્ ।
ન જીવામોઽથ જીવામઃ પુનસ્ત્વદ્દર્શનાશયા

વયં ચ નીયતાં તત્ર શીઘ્રં યત્ર ગતો ભવાન્ ।
ત્વદ્દર્શનહરો ધાતા વ્યધાન્મોદાંકુરચ્છિદામ્

સર્વથા દર્શનં દેહિ કારુણ્યં ભજ સર્વથા ।
પર્ય્યંતં ન પ્રપશ્યંતિ કસ્ય ચિત્સુજના જનાઃ

ઇત્થં વિલપ્યતાઃ કન્યાઃ પ્રતીક્ષ્ય ચ બહુક્ષણમ્ ।
પિતુર્ભયાદ્ગૃહં ગંતું શીઘ્રમારેભિરે તતઃ

તત્પ્રેમનિગડૈર્બદ્ધા ભૃશં વિરહવિક્લવાઃ ।
કથંચિદ્ધૈર્યમાલંબ્ય તાઃ સ્વંસ્વં ગૃહમાગતાઃ

આગત્ય પતિતાઃ સર્વા માતૄણાં તુ સમીપતઃ ।
કિમેતન્માતૃભિઃ પૃષ્ટાઃ કુતઃ કાલાત્યયોઽભવત્

ક્રીડંત્યઃ કિન્નરીભિસ્તુ સાર્દ્ધં સંગતકં યદા ।
સંસ્થિતાસ્તેન ન જ્ઞાતો દિવસોઽચ્છોદસરોવરે

પથિ શ્રાંતા વયં માતઃ સંતાપસ્તેન નસ્તનૌ ।
મોહેન મહતા વક્તું ન કેનાપ્યુત્સહામહે

ઇત્યુક્ત્વા લુઠિતાસ્તત્ર મણિભૂમૌ કુમારિકાઃ ।
આકારં ગોપયંત્યસ્તા મુગ્ધા જલ્પંતિ માતૃભિઃ

કાચિન્નર્તયતિ ક્રીડામયૂરં ન મુદા તદા ।
ન પાઠયતિ તં કીરં પંજરેઽન્યા કુતૂહલાત્

લાલયેન્નકુલં નાન્યા નોલ્લાપયતિ સારિકામ્ ।
અપરાતીવ સંમુગ્ધા નૈવ ખેલતિ સારસૈઃ

ભેજિરે ન વિનોદં તા રેમિરે નૈવ મંદિરે ।
ઊચિરે બાંધવૈર્નાલં વીણાવાદ્યં ન ચક્રિરે

કલ્પદ્રુમપ્રસૂનં યત્સર્વં તચ્ચાનલોપમમ્ ।
મંદારકુસુમામોદિ ન પપુર્મધુરં મધુ

યોગિન્ય ઇવ તાઃ કન્યા નાસાગ્રન્યસ્તલોચનાઃ ।
અલક્ષ્યધ્યાનસંતાનાઃ પુરુષોત્તમમાનસાઃ

ચંદ્રકાંતમણિચ્છન્ને સ્રવદ્વારિણિ કંદરે ।
ક્ષણં વાતાયને સ્થિત્વા જલયંત્રગૃહેક્ષણમ્

રચયંતિ ક્ષણં શય્યાં દીર્ઘિકાં ભોજિનીદલૈઃ ।
વીજ્યમાનાઃ સખીભિસ્તાઃ શીતલૈર્નલિનીદલૈઃ

ઇત્થં યુગસમાં રાત્રિમનયંસ્તા વરસ્ત્રિયઃ ।
કથંચિદ્ધારણં કૃત્વા વિહ્વલાઃ સજ્વરા ઇવ

પ્રાતર્વ્યોમમણિં દૃષ્ટ્વા મન્યમાનાઃ સ્વજીવિતમ્ ।
વિજ્ઞાપ્ય માતરં સ્વાંસ્વાં ગૌરીં પૂજયિતું ગતાઃ

સ્નાત્વા તેન વિધાનેન પુષ્પૈર્ધૂપૈસ્તથા પુનઃ ।
વિધાય પૂજનં દેવ્યા ગાયંત્યસ્તત્ર તાઃ સ્થિતાઃ

એતસ્મિન્નંતરે વિપ્રઃ સ્નાતું સોઽપિ સમાગતઃ ।
પિતુરાશ્રમતસ્તસ્માદચ્છોદેઽત્ર સરોવરે

મિત્રં દૃષ્ટ્વૈવ રાત્ર્યંતે પદ્મિન્ય ઇવ કન્યકાઃ ।
તત્ફુલ્લનયના જાતાસ્તં દૃષ્ટ્વા બ્રહ્મચારિણમ્

ગત્વા તત્રૈવ તાઃ કન્યા સમીપં બ્રહ્મચારિણઃ ।
સવ્યાપસવ્યબંધેન ભુજપાશં ચ ચક્રિરે

ગતોઽસિ પ્રિય પૂર્વેદ્યુર્ગંતુમદ્ય ન લભ્યતે ।
વૃતસ્ત્વં નૂનમસ્માભિર્નાત્ર તેઽસ્તિ વિચારણા

ઇત્યુક્તો બ્રાહ્મણઃ પ્રાહ પ્રહસન્બાહુપાશગઃ ।
યુષ્માભિરુચ્યતે ભદ્રમનુકૂલં પ્રિયં વચઃ

પ્રથમાશ્રમનિષ્ઠસ્ય કિંતુ નશ્યેત મે વ્રતમ્ ।
વિદ્યાભ્યસનશીલસ્ય નાભૂત્પારં ગુરોઃ કુલે

આશ્રમે યત્ર યો ધર્મો રક્ષણીયઃ સુપંડિતૈઃ ।
વિવાહોઽયમતો મન્યે ન ધર્મ ઇતિ કન્યકાઃ

આકર્ણ્ય વિપ્રવાક્યાનિ વિપ્રમૂચુર્વરસ્ત્રિયઃ ।
સકલધ્વનિસોત્કંઠ્યો કોકિલાઇવ માધવે

ધર્માદર્થોઽર્થતઃ કામઃ કામાત્સુખફલોદયઃ ।
ઇત્યેવં નિશ્ચયજ્ઞાસ્તે વર્ણયંતિ વિપશ્ચિતઃ

સકામો ધર્મબાહુલ્યાત્પુરતસ્તે સમુત્થિતઃ ।
સેવ્યતાં વિવિધૈર્ભોગૈઃ સ્વચ્છાભૂમિરિયં યતઃ

શ્રુત્વા તદ્વચનં તાસાં પ્રાહ ગંભીરયા ગિરા ।
તથ્યં વો વચનં કિંતુ મમાપ્યાવશ્યકં વ્રતમ્

પ્રાપ્યાનુજ્ઞાં ગુરોઃ કુર્વે વિવાહકર્મ નાન્યથા ।
ઇત્યુક્તાઃ પુનરૂચુસ્તાઃ સ્ફુટં મૂઢોઽસિ સુંદર

સિદ્ધૌષધં બ્રહ્મધિયા રસાયનં સિદ્ધિર્નિધિઃ સાધુકુલા વરાંગનાઃ ।
મંત્રસ્તથા સિદ્ધરસશ્ચ ધર્મતો મુને નિષેવ્યાઃ સુધિયા સમાગતાઃ

કાર્યં નુ દૈવાદ્યદિ સિદ્ધિમાગતં તસ્મિન્નુપેક્ષાં ન ચ યાંતિ નીતિગાઃ ।
યસ્માદુપેક્ષા ન પુનઃ ફલપ્રદા તસ્માન્ન દીર્ઘીકરણં પ્રશસ્યતે

વિષાદપ્યમૃતં ગ્રાહ્યમમેધ્યાદપિ કાંચનમ્ ।
નીચાદપ્યુત્તમાં વિદ્યાં સ્ત્રીરત્નં દુષ્કુલાદપિ

સાંદ્રાનુરાગાઃ કુલજન્મનિર્મલાઃ સ્નેહાર્દ્રચિત્તા સુગિરઃ સ્વયંવરાઃ ।
કન્યા સુરૂપાઃ ખલુ ચારુયૌવના ધન્યા લભંતેઽત્ર નરાસ્તુ નેતરે

ક્વ વયં સુરસુંદર્ય્યઃ ક્વ ભવાંસ્તાપસો બટુઃ ।
દુર્ઘટસ્ય વિધાનેન મન્યે ધાતૈવ પંડિતઃ

તસ્માદસ્માનિદાનીં તુ સ્વીકુર્ય્યાત્મંગલં ભવાન્ ।
ગાંધર્વેણ વિવાહેન અન્યથા નોપજીવનમ્

શ્રુત્વા વાક્યં તતઃ પ્રાહ બ્રાહ્મણો ધર્મવિત્તમઃ ।
ભો મૃગાક્ષ્યઃ કથં ત્યાજ્યો ધર્મો ધર્મધનૈર્નરૈઃ

ધર્મશ્ચાર્થશ્ચકામશ્ચ મોક્ષશ્ચૈતચ્ચતુષ્ટયમ્ ।
યથોક્તં ફલદં જ્ઞેયં વિપરીતં તુ નિષ્ફલમ્

નાકાલેઽહં વ્રતી કુર્યામતો દારપરિગ્રહમ્ ।
ન ક્રિયા ફલમાપ્નોતિ ક્રિયાકાલં ન વેત્તિ યઃ

યતો ધર્મવિચારેઽસ્મિન્પ્રસક્તં મમ માનસમ્ ।
તસ્માચ્છૃણુત હે કન્યા ન સમીહે સ્વયંવરમ્

એવં જ્ઞાત્વાશયં તસ્ય સમીક્ષ્યૈવ પરસ્પરમ્ ।
કરાત્કરં વિમુચ્યાથ જગ્રાહાંઘ્રિં પ્રમોહિની

ભુજૌ જગૃહતુસ્તસ્ય સુશીલા સુસ્વરા તથા ।
આલિલિંગ સુતારા ચ વક્ત્રં ચુંબતિ ચંદ્રિકા

તથાપિ નિર્વિકારોઽસૌ પ્રલયાનલસન્નિભઃ ।
શશાપ બ્રહ્મચારી તાઃ ક્રોધેનાત્યંતમૂર્છિતઃ

પિશાચ્ય ઇવ માં લગ્ના તત્પિશાચ્યો ભવિષ્યથ ।
એવં તેનાશુ શપ્તાસ્તાસ્તં ત્યક્ત્વા પુરતઃ સ્થિતાઃ

કિમેતચ્ચેષ્ટિતં પાપં હ્યનાગસિ વિચેષ્ટયા ।
પ્રિયંકૃતોઽપ્રિયંકૃત્વા ધિક્ત્વાં ધર્મકૃતાંતકમ્

અનુરક્તેષુ ભક્તેષુ મિત્રેષુ દ્રોહકારિણઃ ।
પુંસો લોકોભયોઃ સૌખ્યં નાશમેતીતિ નઃ શ્રુતમ્

તસ્માત્ત્વમપિ નઃ શાપાત્પિશાચો ભવ સત્વરમ્ ।
ઇત્યુક્ત્વાપિ ચ તા બાલા નિઃશ્વસંત્યઃ ક્રુધાકુલાઃ

તદેવાન્યોન્યસંરંભાત્તસ્મિન્સરસિ પાર્થિવ ।
તાઃ કન્યા બ્રહ્મચારી ચ સર્વે પૈશાચ્યમાગતાઃ

સ પિશાચઃ પિશાચ્યસ્તાઃ ક્રંદમાનાઃ સુદારુણમ્ ।
ક્ષપયંતિ વિપાકાંસ્તાન્પૂર્વોપાત્તસ્ય કર્મ્મણઃ

સ્વકાલે પ્રભવત્યેવ પૂર્વોપાત્તં શુભાશુભમ્ ।
સ્વચ્છાયામિવ દુર્વારં દેવાનામપિ પાર્થિવ

ક્રંદંતિ પિતરસ્તાસાં માતરસ્તત્ર તત્ર ચ ।
ભ્રાતરશ્ચૈવ બાલાનાં દૈવં હિ દુરતિક્રમમ્

અતઊર્ધ્વં પિશાચાસ્તે આહારાર્થં સુદુઃખિતાઃ ।
ઇતસ્તતશ્ચ ધાવંતો વસંતિ સરસસ્તટે

ઇતિ શ્રીપાદ્મે મહાપુરાણે સ્વર્ગખંડે દ્વાવિંશોધ્યાયઃ